10 مامىر, بەيسەنبى كۇنى 311 اقتوبەلىك وتباسى «نۇرلى جەر» باعدارلاماسىمەن سالىنعان جاڭا پاتەرلەرگە يە بولدى. كىلتتەردى جاڭا قونىس يەلەرىنە وبلىس اكىمى بەردىبەك ساپارباەۆ پەن «تۇرعىن ءۇي قۇرىلىس جيناق بانكى» اق باسقارماسىنىڭ ءتورايىمى ءلاززات يبراگيموۆا تابىس ەتتى.
- ءاربىر ادام ءۇشىن باسپانانىڭ ماڭىزى زور. تاۋەلسىزدىك جىلدارى ەلىمىزدە مەملەكەت باسشىسىنىڭ باسشىلىعىمەن قازاقستاندىقتاردى باسپانامەن قامتاماسىز ەتۋ ءۇشىن كوپ دۇنيە جاسالدى. بۇعان وسى شاعىن اۋدان دالەل. بىرنەشە جىل بۇرىن مۇندا دالالىق بولاتىن, ال قازىر مىڭداعان پاتەرلەر سالىنعان. پرەزيدەنتتىڭ بەس الەۋمەتتىك باستامالاسىندا ايتىلعان نەگىزگى ماقساتتاردىڭ ءبىرى دە باسپانامەن قامتاماسىز ەتۋگە باعىتتالعان. بىلتىر ءبىز وبلىستا نەبارى 790 مىڭ شارشى مەتر تۇرعىن ءۇيدى پايدالانۋعا بەردىك, بيىل كەم دەگەندە 850 مىڭ شارشى مەتردى پايدالانۋعا بەرەمىز. ءبىزدىڭ باستى ماقساتىمىز – باسپاناعا مۇقتاج اقتوبەلىكتەردى, سونىڭ ىشىندە تۇرعىن ءۇي قۇرىلىس جيناق بانكىنىڭ 80 مىڭ سالىمشىسى مەن كەزەكتە تۇرعان ازاماتتاردى تۇرعىن ۇيمەن قامتاماسىز ەتۋ,-دەدى ءوڭىر باسشىسى.
ءوز كەزەگىندە, ءلاززات يبراگيموۆا اقتوبە وبلىسىنىڭ تۇرعىن ءۇيدى تاپسىرۋ جاعىنان كوشباسشى ەكەنىن اتاپ ءوتتى.
- اعىمداعى جىلدىڭ سوڭىنا دەيىن قولدانىستاعى 2133 پاتەردەن باسقا, تاعى دا 1 655 پاتەردى تاپسىرۋ جوسپارلانۋدا. مەملەكەتتىك باعدارلامانى تابىستى ىسكە اسىرۋ وبلىس اكىمدىگى جۇمىسىنىڭ ناتيجەسى بولىپ تابىلادى. بانك, ءوز كەزەگىندە, ادامدارعا قولجەتىمدى نەسيەلەر بەرۋ ارقىلى تۇرعىن ءۇيدى ساتىپ الۋعا كومەكتەسەدى. ەندى «نۇرلى جەر» باعدارلاماسىنىڭ اياسىندا نەسيە الۋ وڭايىراق بولادى. بانك باستاپقى جارنانى 30% -دان 20% -عا دەيىن تومەندەتۋ بويىنشا مەملەكەتتىك باعدارلاماعا وزگەرىستەر ەنگىزدى. الداعى ايدا جاڭا ەرەجە جۇمىس ىستەي باستايدى, - دەپ ءتۇسىندىردى ول.
- تۇرعىن ءۇي الابىندا (نۇر اقتوبە) جاڭا ۇيلەر سالىندى. تۇرعىن ۇيلەر تۇرعىنۇيقۇرىلىسجيناق بانكى سالىمشىلارىنا 1 ش.م. 110 000 – 120 000 تەڭگە باعاسىمەن ساتىلادى جانە بۇل باعا «نۇرلى جەر» باعدارلاماسىنان تومەن.
پاتەرلەردى تەكسەرگەننەن كەيىن وبلىس اكىمى مەن تۇقجب باسشىسى جاڭا قونىستانۋشىلارمەن بىرگە اعاش وتىرعىزۋ جۇمىستارىنا قاتىستى. تۇرعىن ۇيلەردىڭ الدارىنا جۇزدەن استام قىلقان جاپىراقتى كوشەتتەر وتىرعىزىلدى.
تەمىر قۇسايىن,
"ەگەمەن قازاقستان"