نيۋ-يوركتە بىرىككەن ۇلتتار ۇيىمىنىڭ شتاب-پاتەرىندە جاھاندىق ازاماتتىق ماسەلەلەرگە ارنالعان حالىقارالىق كونفەرەنتسيا ءوتتى. «رۋحاني جاڭعىرۋ» باعدارلاماسىنىڭ شەڭبەرىندە وتكەن بۇۇ الاڭىنداعى مۇنداي جوعارى دەڭگەيدەگى ءىس-شارانىڭ باستاماشىسى قازاقستاندىق جەتەكشى جوعارى وقۋ ورنى ءال-فارابي اتىنداعى قازۇۋ بولدى. كونفەرەنتسيانى ۇيىمداستىرۋشىلار قاتارىنا سونداي-اق بۇۇ وركەنيەتتەر اليانسى مەن قازاقستاننىڭ بۇۇ جانىنداعى وكىلدىگى كىردى.
ءىس-شارانى اشا وتىرىپ بۇۇ وركەنيەتتەر اليانسىنىڭ جوعارعى وكىلى ناسسير ابدۋلازيز ءال-ناسەر, اسىرەسە جاس ۇرپاقتىڭ اراسىندا عالامدىق ازاماتتىقتى قالىپتاستىرۋعا ارنالعان كونفەرەنتسيانىڭ ماڭىزدىلىعىن اتاپ ءوتىپ, بۇل پروتسەستە ۋنيۆەرسيتەتتەردىڭ اتقارار ءرولى ۇلكەن ەكەندىگىن جانە وسى باعىتتا جاڭا تاسىلدەردى تابۋ قاجەتتىگىن العا تارتتى.
ءال-فارابي اتىنداعى قازۇۋ-دىڭ رەكتورى, اكادەميك عالىم مۇتانوۆتىڭ «شىعىستىڭ ۇلى فيلوسوفى ءال-ءفارابيدىڭ ىزگىلىكتى قوعام تۋرالى يدەيالارىنا نەگىزدەلگەن ۋنيۆەرسيتەت 4.0» اتتى جوعارى وقۋ ورىندارىن دامىتۋدىڭ جاڭا ۇلگىسىن ۇسىنعان بايانداماسى كونفەرەنتسيا قاتىسۋشىلارىنىڭ ۇلكەن قىزىعۋشىلىعى مەن جاندى پىكىرلەرىن تۋدىردى. مودەل ءتورت قۇرامداس بولىكتى بىرىكتىرەدى: ءبىلىم بەرۋ, زەرتتەۋ, يننوۆاتسيالىق-كاسىپكەرلىك جانە رۋحاني-ادامگەرشىلىك. بۇل مودەلدى جۇزەگە اسىرۋدا ەلباسى ۇسىنعان «بولاشاققا باعدار: رۋحاني جاڭعىرۋ» مەملەكەتتىك باعدارلاماسى ناقتى نۇسقاۋ بولماق. جاڭا بۋىن ۋنيۆەرسيتەتىنىڭ ميسسياسى جاستاردى رۋحاني جانە ادامگەرشىلىك قاسيەتتەرى جوعارى جانە بەلسەندى ازاماتتىق ۇستانىمى بار الەمنىڭ ىزگىلىكتى ازاماتتارى رەتىندە قالىپتاستىرۋعا باعىتتالعان. جاڭا ترەند – ۋنيۆەرسيتەت 4.0 جاھاندانۋ جانە جاڭا تەحنولوگيالاردىڭ قارقىندى دامۋى جاعدايىندا ايرىقشا ماڭىزدى. بۇۇ وركەنيەتتەر اليانسىنىڭ قاراماعىندا الەمنىڭ جوعارى وقۋ ورىندارىن گۋمانيتارلاۋ ءۇشىن مودەلدىك جوسپار ازىرلەۋ جونىندەگى قازۇۋ-دىڭ ۇسىنىسى كونفەرەنتسيا قاتىسۋشىلارى تاراپىنان ماقۇلدانىپ, قولداۋ تاپتى.
ء«بىز مودەلدىك جوسپار تۋرالى ۇسىنىستى اسا ءتيىمدى دەپ سانايمىز. الەمنىڭ ۋنيۆەرسيتەتتەرى جاستاردى گۋمانيستىك قۇندىلىقتار رۋحىندا تاربيەلەۋ ءۇشىن ناقتى قادامدار جاساۋعا بىرىگۋى كەرەك. بۇل بۇۇ-نىڭ «جاھاندىق ازاماتتىق» باعدارلاماسىنىڭ ماقساتتارىنا سايكەس كەلەدى. بۇل تۇرعىدا بۇۇ-نىڭ «اكادەميالىق ىقپال» باعدارلاماسىنىڭ عالامدىق حابى – قازۇۋ-دىڭ تاجىريبەسى مەن باستامالارى, اسىرەسە وزەكتى ءارى سۇرانىسقا يە. ال ءال-ءفارابيدىڭ مۇراسى كۇنى بۇگىنگە دەيىن اقىل مەن جۇرەكتى بىرىكتىرىپ بايىتاتىن تۇبەگەيلى وڭدەۋ كۇشىنە يە ءبىلىمنىڭ ۇلگىسى بولىپ تابىلادى», – دەپ اتاپ ءوتتى اليانستىڭ جوعارعى وكىلى ناسسيرابدۋلازيز ءال-ناسەر.
ايتا كەتەرلىك جايت, قازۇۋ بۇۇ وركەنيەتتەر اليانسىمەن بىرلەسىپ «ىزگىلىكتى قوعامنىڭ ازاماتتارىن قالىپتاستىرۋ. قازىرگى زامانعى ۋنيۆەرسيتەتتەردىڭ ميسسياسى» اتتى حالىقارالىق جوبانى جۇزەگە اسىرۋدا.
ۋنيۆەرسيتەت 4.0 ۇلگىسى اياسىندا قازۇۋ-دا يننوۆاتسيالىق-تەحنولوگيالىق جانە رۋحاني-ادامگەرشىلىك تۇعىرناما ۇندەستىگىنە نەگىزدەلگەن «Al-Farabi university smartcity» اتتى بىرەگەي جوبا ءساتتى جۇزەگە اسۋدا. سونداي-اق بۇۇ باس اسسامبلەياسىنىڭ 66-سەسسياسىندا قازاقستان پرەزيدەنتى ۇسىنعان «جاسىل كوپىر» باستاماسىن ىسكە اسىرۋعا باعىتتالعان «ريو +20» بۇۇ كونفەرەنتسياسىندا العا تارتىلعان «جاسىل كوپىر ۇرپاقتان – ۇرپاققا» جوباسى جۇزەگە اسىرىلۋدا.
حالىقارالىق كونفەرەنتسياعا قازاقستاننىڭ بۇۇ-نىڭ جانىنداعى تۇراقتى وكىلى قايرات وماروۆ, قازاقستان مادەنيەت جانە سپورت مينيسترلىگى, ءارتۇرلى ەلدەردىڭ ديپلوماتيالىق ميسسيالارى, ۇكىمەتتىك ەمەس ۇيىمداردىڭ وكىلدەرى جانە اقش پەن الەمنىڭ الدىڭعى قاتارلى ۋنيۆەرسيتەتتەرىنىڭ عىلىمي ەليتاسى قاتىستى.
ارمان وكتيابر, «ەگەمەن قازاقستان»
الماتى