قازاقستان مەن پولشا سەناتتارى ديالوگتى نىعايتۋدا

پولشا دەلەگاتسياسىن قارسى الا وتىرىپ, ت.مۇقاشەۆ ەكى ەلدى ءداستۇرلى تۇردە جىلى ءارى دوستىق قارىم-قاتىناستار بايلانىستىراتىنىن اتاپ ءوتتى. ديپلوماتيالىق قارىم-قاتىناستار ورناعان كەزدەن باستاپ شيرەك عاسىردا بارلىق دەڭگەيدەگى تۇراقتى ساياسي ديالوگ ورناتىلدى. پرەزيدەنتىمىز نۇرسۇلتان نازارباەۆتىڭ پولشاعا 2016 جىلعى مەملەكەتتىك ساپارى تابىستى بولدى. پولشا پرەزيدەنتى اندجەي دۋدانىڭ قازاقستانعا ساپارى ەكىجاقتى بايلانىستاردى نىعايتۋعا ەداۋىر ۇلەس قوستى, ول «ەكسپو-2017» حالىقارالىق كورمەسىندەگى پولشانىڭ ۇلتتىق كۇنىنە قاتىستى.

سەناتور قوناقتاردى پارلامەنتتىڭ جوعارعى پالاتاسىنىڭ قازاقستاننىڭ ساياسي ومىرىندەگى ءرولى تۋرالى, سونداي-اق ساياسي, ەكونوميكالىق جانە الەۋمەتتىك رەفورمالاردى زاڭنامالىق تۇرعىدان قولداۋ بويىنشا دەپۋتاتتار تاراپىنان جۇرگىزىلىپ جاتقان جۇمىس جايلى حاباردار ەتتى.

ت.مۇقاشەۆ قازاقستان-پولشا پارلامەنتارالىق ديالوگى دەڭگەيىنە جوعارى باعا بەردى. 2016 جىلى سەنات توراعاسى قاسىم-جومارت توقاەۆتىڭ شاقىرۋى بويىنشا پولشا سەناتىنىڭ توراعاسى ستانيسلاۆ كارچەۆسكيدىڭ قازاقستانعا رەسمي ساپارى بولدى. 2017 جىلعى ماۋسىمدا استاناعا پولشا سەناتىنىڭ ۆيتسە-سپيكەرى ماريا كوتس كەلدى.

گۋمانيتارلىق بايلانىستارعا توقتالا كەلە, ت.مۇقاشەۆ قازاقستاننان شىققان پولياكتاردىڭ ەرەكشە ءرولىن اتاپ ءوتتى, سەناتوردىڭ سوزىنشە, ولار «حالىقتارىمىزدىڭ اراسىنداعى دوستىقتى رۋحاني بايلانىستىرۋشى ءارى نىعايتۋشى دانەكەر» بولىپ تابىلادى.

ءوز كەزەگىندە ۆ.كراسكا مەن ا.ۆاجوحا قازاقستان حالقىنا تاريحتىڭ قيىن-قىستاۋ كەزەڭدەرىندە ءوز وتانداستارىن جىلى قابىلداعانى ءۇشىن العىستارىن ءبىلدىردى. پولشا پارلامەنتشىلەرى مەملەكەتتەرىمىزدىڭ ساياسي, ەكونوميكالىق جانە گۋمانيتارلىق سالالارداعى ستراتەگيالىق ارىپتەستىگى ودان ءارى كەڭەيە تۇسەتىندىگىنە سەنەتىندەرىن ايتتى.

كەزدەسۋگە سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەسى نۇرجان نۇرسيپاتوۆ قاتىستى.