پرەزيدەنت, قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ جامبىل وبلىسىنداعى «وتار» 40-شى اسكەري بازاسىندا وتكەن اسكەري پارادقا قاتىستى.
«قىمباتتى قازاقستاندىقتار, ساردارلار مەن ساربازدار! قادىرلى ارداگەرلەر! بارشاڭىزدى وتان قورعاۋشى كۇنى مەرەكەسىمەن شىن جۇرەكتەن قۇتتىقتايمىن. ءباھادۇر بابالار ۇلى دالامىزدى اق بىلەكتىڭ كۇشىمەن, اق نايزانىڭ ۇشىمەن قورعاپ, بىزگە امانات ەتىپ قالدىردى. «ۇراندى ەلدىڭ ۇرپاعى ايبارلى كەلەدى» دەگەن دانا حالقىمىز. بۇگىنگى ايبىندى ارميامىز ءۇشىن ەلدىڭ تىنىشتىعىن ساقتاپ, تاۋەلسىزدىكتىڭ قورعانى بولۋ مارتەبەلى زور مىندەت. جاۋجۇرەك جاۋىنگەرلەردىڭ كوتەرەتىن جۇگى اۋىر. بىراق ول ابىرويلى بورىش, قاستەرلى پارىز. قارۋلى كۇشتەرىمىز حالقىمىزدىڭ سەنىمدى تىرەگى, مەملەكەتتىڭ بەرىك قالقانى», دەدى مەملەكەت باسشىسى اسكەري پارادتىڭ اشىلۋ راسىمىندە.
بارشا قازاقستاندىقتى وتان قورعاۋشى كۇنىمەن قۇتتىقتاعان ەلباسى ءار سارباز وتان قورعاۋشى رەتىندە ءوزىنىڭ ەل الدىنداعى ەرەكشە جاۋىنگەرشىلىگىن سەزىنۋى ءتيىس ەكەنىن ايتتى.
«جاۋىنگەرلىك تۋ – تۋعان جەرگە ادالدىقتىڭ, ەرلىك پەن باتىلدىقتىڭ نىشانى بولىپ تابىلادى. قاسيەتتى بايراق رۋحى بيىك, ەرجۇرەك ساربازداردى ءاردايىم جەڭىسكە جەتەلەيدى. باۋىرجان مومىش ۇلىنىڭ «باتىرلىق وسكەن ورتاعا, كورگەن تاربيەگە بايلانىستى قالىپتاسادى», دەگەن ءسوزى بار. ازاماتتارىمىزدى وتانسۇيگىشتىككە تاربيەلەۋ ىسىندە اسكەري ءداستۇر ماڭىزدى ءرول اتقارادى. ءار سارباز وتان قورعاۋشى رەتىندە ءوزىنىڭ ەل الدىنداعى ەرەكشە جاۋىنگەرشىلىگىن سەزىنۋى ءتيىس. قارۋلى كۇشتەرىمىزدە جىگەرلى جىگىتتەر قاتارىن اياۋلى ارۋلارىمىز دا اسكەري قىزمەتتى ابىرويمەن اتقارىپ كەلەدى. سوندىقتان بۇگىنگى مەرەكە ەر ازاماتتارمەن قاتار ساپ تۇزەگەن قايسار قىزدارىمىزعا دا ورتاق. مەملەكەت وتان قورعاۋشىلارعا ەرەكشە قامقورلىق كورسەتىپ كەلەدى, كورسەتە بەرەدى. وتكەن جىلى اسكەري قىزمەتكەرلەردىڭ جالاقىسى 25 پايىزعا ارتتى. اسكەريلەردى تۇرعىن ۇيمەن قامتاماسىز ەتۋ ماسەلەسى شەشىمىن ءوز رەتىمەن تاۋىپ جاتىر. مۇنىڭ ءبارى قارۋلى كۇش ساربازدارىنىڭ ار-نامىسىمەن, ايبىنىن ارتتىرۋعا جول اشادى. سوندىقتان مەن سىزدەردى اسكەري اتقا ادال بولادى دەپ سەنەمىن», دەدى پرەزيدەنت.