باتىس قازاقستاندا سوۆەت وداعىنىڭ باتىرىن ەسكە الدى

كونفەرەنتسياعا وبلىستىڭ ءار اۋماعىنان قوناقتار كەلدى. جيىن الدىندا باتىردىڭ ءتىرى كەزىندە جازىلىپ الىنعان قۇندى تاسپا كورسەتىلدى. «سوعىستا مەن نامىستى ەشقاشان ەستەن شىعارمادىم. بارلاۋشى رەتىندە بارلىق تاپسىرمانى ورىندادىم. ورىنداماعان كەزىم جوق», - دەپ سويلەگەن قارت ساربازدىڭ ايبارلى ءجۇزى تالايدى ءتانتى ەتتى.

ميحايل ابدولوۆ قىزىل ارميا قاتارىندا 1938 جىلى شاقىرىلعان. ۇلى وتان سوعىسىنا باستان-اياق قاتىسقان مايدانگەر بارلاۋشى بولعان. 78-ءشى اتقىشتار ديۆيزياسى ساپىندا بريانسك ورماندارىن جارىپ وتكەن جورىقتارعا, موجايسك تاسجولى بويىنداعى ايگىلى شايقاستارعا, ءىىى ۋكراين مايدانىندا, ورلوۆ ماڭىنداعى جان الىپ, جان بەرىسكەن ۇرىسقا قاتىسقان. 74-ءشى اتقىشتار ديۆيزياسى بارلاۋشىلار روتاسى بارلاۋشىلار بولىمشەسىنىڭ كومانديرى ابدولوۆتىڭ ەرلىگىن جاۋ دا مويىنداپتى. 1944 جىلى 7 قاراشاعا قاراعان ءتۇنى دۋناي وزەنىنىڭ وڭ جاعالاۋىنداعى جاۋ پلاتسدارمىن بارلاپ جانە باسىپ الۋ جونىندە شۇعىل تاپسىرمانى ورىنداعان ابدولوۆ توبى نەمىستىڭ 12 جاۋىنگەرى مەن ۋنتەر-وفيتسەرىن تۇتقىنداعان. بۇلار جەتكىزگەن ء«تىل» وتە قۇندى مالىمەتتەر بەرىپتى. وسى ۇرىستا ابدولوۆتىڭ ءوزى 11 ءفاشيستى ءولتىرىپ, تورتەۋىن تۇتقىنداعان.

كونفەرەنتسيادا ءسوز العاندار م.ابدولوۆتىڭ جاۋدىڭ ءتورت ۇشاعىن, قارۋ-جاراق قويماسىن جويۋداعى ەرلىكتەرىن دە اسەرلى اڭگىمەلەپ ءوتتى. مارقۇم بەيبىت ومىردە دە وتە تەنتەك, ەركىن ويلى ازامات بولدى. ومىردەن وتكەنشە شاعىن اۋىلدا تۇردى. ورال قالاسىنا, ءتىپتى اۋدان ورتالىعىنا شاقىرعان ۇسىنىستاردان باس تارتىپتى.

وسى كونفەرەنتسيادا جانىبەك اۋداندىق «شۇعىلا» گازەتىنىڭ رەداكتورى, ءىى دۇنيەجۇزىلىك سوعىس تاقىرىبىن جۇيەلى زەرتتەپ جۇرگەن احمەديار باتىرحانوۆ وسى كەزگە دەيىن كوپشىلىككە بەلگىسىز دەرەكتەر ءالى دە كوپ ەكەنىن ايتادى. مىسالى ول رەسەي قورعانىس مينيسترلىگىنىڭ ورتالىق ءارحيۆى قورىنان بۇرىن-سوڭدى ايتىلماعان 17 قازاق ۇشقىشىن, سوۆەت وداعىنىڭ باتىرى اتاعىنا, ۇلكەن ناگرادالارعا ۇسىنىلىپ, بىراق ماراپاتتالماي قالعان جاۋىنگەرلەر تۋرالى كوپ دەرەك تاپقان. سونىڭ ىشىندە ءدال وسى اقجايىق اۋدانىنان مايدانعان الىنىپ, نەمىس تۇتقىنىندا بولعان, سۇيەكتەرى جات جەردە قالعان 26 سارباز جايىندا ايتىپ بەردى.

ايتا كەتۋ كەرەك, اقجايىق اۋدانىندا ولكە تاريحىن تۇگەندەۋگە, تاريحي تۇلعالاردى حالىق جادىندا جاڭعىرتۋعا باعىتتالعان جۇمىستار جۇيەلى جاسالىپ كەلەدى. وسىعان دەيىن اۋىل-اۋىلدىڭ شەجىرەسىنە, ايتۋلى تۇلعالارعا, ۇلى وتان سوعىسىنا قاتىسۋشىلارعا ارنالىپ بىرنەشە كىتاپ شىعارىلدى. ورتالىقتاندىرىلعان كىتاپحانالار جۇيەسى بۇل باسىلىمداردى كەڭىنەن ناسيحاتتاپ كەلەدى.

اۋدان الاش قوزعالىسىنىڭ 100 جىلدىعىنا «اقجايىقتاعى الاش ىزدەرى», «اقجايىقتىق الاش ارىستارى» اتتى كىتاپتار شىعاردى. جەرلەس اقىن, عالىم, مايدانگەر ساعىنعالي سەيىتوۆتىڭ 100 جىلدىعى دا وتكەن كۇزدە ءماندى, مازمۇندى ءوتتى.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان وبلىسى

سۋرەتتەردى تۇسىرگەن نۇربەك يحسان