وسكەمەندەگى وبلىستىق دراما تەاتردا اقىن, ويشىل, ءدىن قايراتكەرى, حالىق اعارتۋشىسى, قىتاي قازاقتارى اراسىندا ۇلى اباي مۇراسىن العاش تانىپ, ناسيحاتتاعان اقىت قاجى ء ۇلىمجى ۇلىنىڭ «شولاق قول كەلىنشەك» اتتى ءاپساناسى ساحنالاندى.
بايلىق پەن كەدەيلىك, تەكتىلىك پەن توعىشارلىق, جومارتتىق پەن ساراڭدىق سەكىلدى ماڭگىلىك تاقىرىپتاردى ارقاۋ ەتكەن تۋىندى تەك قارىننىڭ قامىن ويلايتىن قارىنباي, بار بولسا اسپايتىن, جوق بولسا ساسپايتىن, باردى ەمەس, اردى بايلىق سانايتىن بەكتاس جانە اقىلدى, يناباتتى عازيزا وبرازدارى ارقىلى بارىنشا اشىلا تۇسكەن دەۋگە بولادى. وقيعا نەگىزىنەن وسى ءۇش تۇلعا توڭىرەگىندە ءوربيدى. جانى جومارت بەكتاستىڭ اكەسى ومىردەن وتەدى, تەكتى اكەدەن قالعان بايلىقتى ول تىلەنشىلەنىپ كەلگەن كەدەي-كەپشىككە تاراتادى, قالعانىن عازيزانىڭ ەسەرسوق كۇيەۋى قارىنباي جاندايشاپتارىمەن بىرگە توناپ, تارتىپ الىپ, ءوزىن كوگالا قويداي ەتىپ ساباپ كەتەدى. كيەرگە كيىمى, ىشەرگە اسى قالماعان بەكتاس بازار جاعالاپ, مەيماناسى تاسىعان قارىنبايدىڭ الدىنا كەلگەندە قولشوقپارلارى دىم تاتتىرمايدى. ءۇمىتىن ءۇزىپ سىرتقا بەت العاندا جۇرەگى مەيىرىمگە تولى عازيزا جانى اشىپ, ۇستىندەگى قىمبات باعالى كامزولىن شەشىپ بەرەدى. شيەلەنىس, ايقاي-شۋ وسى جەردەن باستالادى. قارىننىڭ عانا قامىن ويلايتىن قارىنباي بۇعان ءتوزسىن بە؟ اشۋعا ءمىنىپ, «بەرەگەن قولىڭ وسى ما؟» دەپ ءوزىنىڭ سۇيىكتى جارى عازيزانىڭ وڭ قولىن شاۋىپ تاستايدى. ونىمەن قويماي, قورعانسىز كەلىنشەكتى دالادا قالدىرادى. قىسقارتا ايتقاندا, قولسىز قالعان كەلىنشەكتى جالعىزباستى قاريا تاۋىپ الىپ, ۇيىنە اپارادى, اس-اۋقاتىن بەرەدى, بار مەيىرىمىن توگەدى, ەڭ سوڭىندا ءوزىنىڭ قولىنان ايرىلۋعا سەبەپ بولعان بۇرىنعى تىلەنشى جىگىت – كەيىنگى ساۋداگەر, كەرۋەنباسى بەكتاسپەن كەزدەسىپ, شاڭىراق قۇرادى.
قويىلىمنىڭ ءبىر ەرەكشەلىگى, اقىت قاجى ء ۇلىمجى ۇلى ساحنادا بوي كورسەتىپ, ناقىلعا تولى ولەڭدەرىن وقيدى. ەلى ءۇشىن جاساعان ەڭبەگى ەرەن بولسا دا, ءبىز ءۇشىن ءالى دە بەيمالىم تۇلعانىڭ ءرولىن سومداعان تەاتردىڭ بەلدى اكتەرى قانات نيازبەكوۆ عۇلاما بەينەسىن بەدەرلەۋ وڭايعا تۇسپەگەنىن ايتادى. «قيىندىق بولدى. قيىندىق بولعانى – ءبىزدىڭ اقىت بابامىزدى ءجوندى بىلمەيتىندىگىمىزدە. سوندىقتان داۋلەتكەرەي كاپ ۇلى سەكىلدى كەيىپكەرىمىز جايىندا عىلىمي جوبا قورعاعان ازاماتتارعا جۇگىنۋگە تۋرا كەلدى. سونىڭ وزىندە اقىت قاجىنى تولىق بىلدىك, تانىدىق دەپ ايتا المايمىن. 15-20 پايىز دەۋگە بولاتىن شىعار. قويىلىم بارىسىندا اقىننىڭ ءومىر, بايلىق, كەدەيلىك, ساراڭدىق تۋرالى ولەڭدەرىن وقىدىم. بۇل تۋىندىنىڭ بۇگىنگى جاستارعا بەرەرى كوپ دەپ ويلايمىن», - دەيدى ول. «بۇل ءرولدى العاندا قاتتى تولقىدىم. «قالاي شىعار؟» ەكەن دەپ كوپ ۋايىمدادىم. ايەل ادامنىڭ تارتقان اۋىرتپاشىلىعى مەن كۇيەۋىنەن كورگەن قورلىعىن بەينەلەۋ, ونى ونە بويىڭنان وتكىزۋ, سەزىنۋ وڭاي بولعان جوق. باعاسىن كورەرمەن بەرە جاتار», - دەيدى قولى شولاق بولسا دا جۇرەگى كەڭ, ساليقالى, زەردەلى كەلىنشەك – عازيزانىڭ ءرولىن ويناعان تەاتردىڭ اكتريساسى الميرا ايتجانوۆا.
درامانىڭ رەجيسسەرى, تەاتردىڭ كوركەمدىك جەتەكشىسى ساحان اكەلەەۆتىڭ ايتۋىنشا, قويىلىم ەلىمىزدەگى تەاترلاردىڭ ىشىندە تۇڭعىش رەت وسكەمەندە ساحنالانىپ وتىر. «ەڭ اۋەلى اقىت ء ۇلىمجى ۇلىن 10 جىل بويى زەرتتەپ, ەكى تومدىق جيناعىن شىعارعان گۇلنار وماروۆاعا ەرەكشە العىسىمدى بىلدىرگىم كەلەدى. قارىنداسىمىز مادەنيەت مينيسترلىگى مەن وبلىس اكىمدەرىنە ارنايى حات جازعان ەكەن. ەلىمىزدەگى ەشبىر تەاتر نازار اۋدارماعان حات وبلىستىق مادەنيەت باسقارماسى ارقىلى ءبىزدىڭ تەاترعا كەلگەندە بىردەن نازار اۋدارىپ, ەلەڭ ەتتىك. «شولاق قول كەلىنشەك» پەساسى موڭعوليانىڭ مەملەكەتتىك سىيلىعىنىڭ يەگەرى, سول ەلدەگى زيالى ازاماتتاردىڭ ءبىرى شىناي راحمەت ۇلىنىڭ ساحنالىق جوباسىمەن 90 جىلدارى قويىلعان ەكەن. بىراق ۇزاق جۇرمەپتى. ول كىسى پەسانىڭ سوڭىنا: «وسىنى تىرىلتكەن ادامعا اللانىڭ نۇرى جاۋسىن» دەپ جازىپتى. مەن مۇنى امانات دەپ قابىلدادىم» دەگەن ول 8 ماۋسىمدا الماتىدا اقىت ء ۇلىمجى ۇلىنىڭ 150 جىلدىعىنا وراي ۇلكەن كونفەرەنتسيا وتەتىنىن, سول كۇنى وسى قويىلىم جۇرتشىلىق نازارىنا ۇسىنىلاتىنىن جەتكىزدى. تۋىندى رەجيسسەرى «تۇركسويدىڭ» باس حاتشىسى دۇيسەن قاسەيىنوۆكە قويىلىمدى تۇركى مەملەكەتتەرىنە كورسەتۋ جونىندە دە ۇسىنىس ايتىلعانىن تىلگە تيەك ەتتى.
ازامات قاسىم,
«ەگەمەن قازاقستان»
وسكەمەن