كوكشەتاۋ قالاسىنىڭ ىرگەسىندەگى اقكول اۋىلىندا اقمولا جانە سولتۇستىك قازاقستان وبلىستارى اۋداندارىنان كەلگەن جۇزگە تارتا بوز كىلەم شەبەرلەرى ءوزارا سايىسقا ءتۇسىپ, كۇرەس ونەرىنىڭ كورىگىن قىزدىردى. بۇل دودالى جارىس – زەرەندى اۋداندىق جاسوسپىرىمدەر سپورت مەكتەبىنىڭ جارتى عاسىرلىق تويى مەن سپورتتىڭ وسى ءبىر تۇرىنەن رەسپۋبليكالىق جانە حالىقارالىق جارىستاردىڭ جۇلدەگەرى, جاس باپكەر, مارقۇم تالعات عازيزوۆتى ەسكە الۋعا ارنالدى.
تالعات ءوزىنىڭ قىسقا عۇمىرىندا سپورتتىڭ تالاي بەلەستەرىن باعىندىردى. العاشقى جاتتىقتىرۋشىسى مارات جارماعامبەتوۆتەن ءتالىم الىپ, قىزىلتۋدىڭ كۇرەس مەكتەبىنەن تۇلەپ ۇشقان تالعات عازيزوۆ الدىمەن امانگەلدى اۋىلىندا بوزكىلەم الىپپەسىن ۇيرەندى. كەيىن قاراعاندى قالاسىنداعى «دەنەشىنىقتىرۋ جانە سپورت» تەحنيكۋمىنا وقۋعا قابىلداندى. وسى جىلدارى تالانتتى جىگىت ىرگەلى جارىستارعا قاتىسىپ, ەل نامىسىن ابىرويمەن قورعاعان ەدى. سول اتالعان كۇرەس مەكتەبىن ءبىتىرىپ كەلگەسىن قىزىلتۋ اۋدانىنا قاراستى ءوندىرىس اۋىلىندا بالدىرعانداردى كۇرەسكە ۇيرەتتى. باپكەر بولىپ جۇرگەن كەزىندە ءبىر وتباسى مەن تۋىستارىنا پىشاق جۇمساعان قاراقشىدان ادامداردى قورعايمىن دەپ اراشا تۇسكەندە مەرت بولعان-دى. ونىڭ بار سانالى عۇمىرى سپورت پەن ادامدارعا جاناشىرلىق جاساۋعا ارنالدى. بۇل شارانىڭ نەگىزگى ارقاۋى دا – ەلىم دەپ وتكەن ەر ۇلانعا تاعزىم ەتۋ ەدى.
اقكول اۋىلىنداعى بۇل جارىستى ۇيىمداستىرۋعا باستاما كوتەرگەن دە ونىڭ العاشقى ۇستازى مارات جارماعامبەتوۆ پەن جەرلەسى, كۇرەستەن ازيانىڭ قولا جۇلدەگەرى, رەسپۋبليكانىڭ بىرنەشە دۇركىن چەمپيونى نۇربەك قارجانوۆ. ال تالعاتتىڭ دوسى الەم بىرىنشىلىگىنىڭ قاتىسۋشىسى, رەسپۋبليكا جانە حالىقارالىق جارىستاردىڭ چەمپيونى, بەلگىلى بالۋان باۋىرجان ماديمۇحامەدوۆ ونعا تارتا كوماندا قاتىسقان ءتۋرنيردىڭ باستى دەمەۋشىسى بولدى. كىشكەنتاي عانا اۋىلدىڭ شاعىن كىلەمىندە جۇزدەگەن بالا بەلدەسىپ, ءوزارا كۇش سىناسقاندارىن كورىپ, قۋاندىق. الىپتار دا اۋىلدان شىقپاۋشى ما ەدى. ەكى وبلىستىڭ شالعاي اۋىلدارىنان كەلگەن جاس بالۋانداردىڭ كوزىنەن وت بايقاعانداي بولدىق. شاڭ قاۋىپ, جەڭىلىستىڭ ءدامىن تاتقاندار دا جانارلارىنا جاس الىپ, نامىستان جىلاعانى كوپ ويعا جەتەلەدى. وسى ارادا اتاقتى قاجىمۇقان بابامىزدىڭ ومبىنىڭ تسيركىندە العاش كۇرەسكەن ءساتى ەسكە ءتۇستى. ۇلكەن كىلەمگە جول اشقان سول كۇرەسى تالاي ادامدى تاڭعالدىرىپ ەدى. بالكىم اقكولدىڭ دە اياداي عانا بوز كىلەمى تالاي دارىنداردى تاربيەلەمەسىنە كىم كەپىل.
ء بىز جارىس بارىسىندا وسى اقكولدە بالالاردى بەلدەسۋ ونەرىنە باۋلىپ جۇرگەن نۇربەك قارجانوۆتى سوزگە تارتقانىمىزدا, ول: «وسىدان ءبىراز جىل بۇرىن بۇل وڭىردە كۇرەستىڭ نە ەكەنىن بىلمەيتىن ەدى. العاش كۇرەس ۇيىرمەسى اشىلعالى اۋىل بالالارىنىڭ ىقىلاسى ارتىپ, باقتارى دا جاندى. قازىر اۋدان مەن وبلىستى بىلاي قويىپ, رەسپۋبليكادا وسى اۋىلدىڭ بالۋاندارىن تانيدى دا مويىندايدى. مىسالى, نۇرتىلەۋ كوكەنوۆ پەن باقتيار ابۋوۆتەر ەل بىرىنشىلىگىنە ۇزبەي قاتىسىپ كەلەدى. اۋىل بالالارى اراسىنداعى جارىستا بيىك ناتيجە كورسەتتى. ال ارۋلان مۇحامەتالي جانە ەرسىن ابىلقاسىموۆتار رەسپۋبليكالىق تۋرنيرلەردە بىرنەشە رەت جەڭىمپاز بولدى. جاقىندا بۇل ەكەۋى رەسەيدىڭ ساحا رەسپۋبليكاسىندا وليمپيادا چەمپيونى پاۆەل پەنيگين جۇلدەسى ءۇشىن وتكەن تۋرنيرگە قاتىسىپ قايتتى», دەپ وي ءبولىستى. دەمەك, شاعىن عانا اقكول اۋىلىندا وسىنداي القالى ءتۋرنيردىڭ ءوتىپ جاتقانى تەگىن ەمەس ەكەن. سەبەبى بۇل اۋىل بالالارىنىڭ شىڭدالۋ وشاعىنا اينالادى. وسىنداي جارىستارعا قاتىسىپ, شىڭدالماعان جاس بالۋان ىرگەلى سايىستاردا توپ جارا الماسى انىق.
ماعان قىزىلتۋدىڭ سوناۋ احمەتجان قازىمبەتوۆتەن باستاۋ العان قارىمدى كۇرەس ونەرى زەرەندى وڭىرىنە اۋعان با دەگەن وي كەلدى. شىنىندا دا, زەرەندى ۇلىلاردىڭ كيەلى مەكەنى. «ات اۋناعان جەردە تۇك قالادى» دەمەكشى, بۇل ولكەدەن قارىمى مىقتى بالۋاندار شىعاتىنىنا سەنىم مول. بۇگىنگى جارىس سول بيىكتىڭ العاشقى باسپالداعى ىسپەتتەس. جالپى, ون سالماق دارەجەسىندە وتكەن جارىستا ءار وڭىردەن كەلگەن بالۋاندار قانجىعالارىنا جۇلدە سالدى دەسەك, قاتەلەسپەيمىز. سوندىقتان ولاردى ءبولىپ-جارىپ, جەر-جەرگە ءبولۋدىڭ قاجەتى بولماسى انىق. ولاي بولسا, اسلان قويانباەۆ, ارۋلان مۇحامەتالي, ەرسىن ابىلقاسىموۆ, نۇرتىلەۋ كوكەنوۆ جانە تاعى باسقا توپ جارعان بالۋاندارعا الداعى جارىستاردا مول ولجا سالىپ, وليمپيادا بيىگىن باعىندىرسىن دەگەن تىلەگىمىزدى جولدايمىز. جۇلدە العان بىردە-ءبىر سپورتشى ماراپاتسىز قالعان جوق. ولارعا ارنايى ديپلوم مەن اقشالاي سىيلىقتار تابىس ەتىلدى.
باقىت سماعۇل, قازاقستان جۋرناليستەر وداعىنىڭ مۇشەسى
اقمولا وبلىسى