ۇلان اۋداندىق ءماسليحاتى دەپۋتاتتارىنىڭ كەلىسىمىمەن ايماق باسشىسى دانيال احمەتوۆتىڭ وكىمىمەن ۇلان اۋدانى اكىمى قىزمەتىنە نۇرىمبەت امان ۇلى ساقتاعانوۆ تاعايىندالدى. ول بۇعان دەيىن وبلىس اكىمىنىڭ ءبىرىنشى ورىنباسارى قىزمەتىن اتقارعان-دى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
جاڭا باسشىنى اۋدان اكتيۆىنە وبلىس اكىمى دانيال احمەتوۆ تانىستىردى. نۇرىمبەت امان ۇلى 1970 جىلى 6 تامىزدا وڭتۇستىك قازاقستان وبلىسىندا دۇنيەگە كەلگەن. 1992 جىلى قىزىلوردا پەداگوگيكالىق ينستيتۋتىن تامامداعان. سونداي-اق, قىزىلوردا اگرارلىق-تەحنيكالىق كوللەدجىندە, مەسا قاشىقتىقتان ءبىلىم بەرۋ ينستيتۋتىندا, مەسا قىزىلوردا ەكونوميكا, ستاتيستيكا جانە اقپارات ينستيتۋتىندا ءبىلىم الدى.
ەڭبەك جولىن ينستيتۋت بىتىرگەننەن كەيىن 1992 جىلى قىزىلوردا قالاسىنداعى №172 ورتا مەكتەبىندە مۇعالىمدىكتەن باستاعان. قر قارۋلى كۇشتەرى قاتارىندا اسكەري بورىشىن وتكەرگەن سوڭ قىزىلوردادا №9 ورتا مەكتەپتە جۇمىسىن جالعاستىردى. 1995 جىلدان باستاپ قىزىلوردا وبلىسى بويىنشا كەدەن باسقارماسىنىڭ ءبولىم باستىعىنىڭ ورىنباسارى بولىپ جۇمىس ىستەدى.
كەيىن بەس جىل قر مەملەكەتتىك كىرىس مينيسترلىگى كەدەن كوميتەتىندە باس ينسپەكتور, توراعانىڭ كومەكشىسى, ءبولىم باستىعى قىزمەتىن اتقاردى. 2006 جىلدان باستاپ قر پارلامەنتىندەگى ۇكىمەت وكىلدىگىنىڭ باس ينسپەكتورى, قر ەكونوميكا جانە بيۋدجەتتىك جوسپارلاۋ مينيسترلىگىندە ءبولىم باستىعى, ءمينيستردىڭ كەڭەسشىسى بولدى. 2007 جىلدىڭ كىركۇيەك ايىندا قر ەڭبەك جانە حالىقتى الەۋمەتتىك قورعاۋ مينيسترلىگىنىڭ كوشى-قون كوميتەتى توراعاسىنىڭ ورىنباسارى قىزمەتىناتقاردى. 2012 جىلى شىعىس قازاقستان وبلىسى اكىمىنىڭ ورىنباسارى, ال 2015 جىلدىڭ 31 شىلدەسىندە شىعىس قازاقستان وبلىسى اكىمىنىڭ ءبىرىنشى ورىنباسارى لاۋازىمىنا تاعايىندالدى.
ازامات قاسىم,
«ەگەمەن قازاقستان»
وسكەمەن