قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ءبىتىرۋشى تۇلەكتەرى ءۇشىن بوس جۇمىس ورىندار جارمەڭكەسى ءوتتى. شاراعا 800-گە جۋىق ستۋدەنت پەن 100-گە جۋىق جۇمىس بەرۋشى قاتىستى, دەپ حابارلايدى وقۋ ورنىنىڭ ءباسپاسوز ورتالىعى.
جىل سايىن ۇيىمداستىرىلاتىن ءداستۇرلى جارمەڭكە جاستارعا بۇگىندە ءبىلىم بەرۋ وشاقتارىندا قاي سالا ماماندارىنا سۇرانىس كوپ نەمەسە تاپشى ەكەندىگىن جانە ەڭبەك ءوتىلىنسىز جۇمىسقا ورنالاسۋعا بولاتىندىعىن انىقتاۋعا سەپتەسەدى. سونداي-اق, «ديپلوممەن – جۇمىسقا» جوباسىن جۇزەگە اسىرۋعا مۇمكىندىك بەرەدى.
– ەلباسى نۇرسۇلتان نازارباەۆ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى ەل حالقىنا ارناعان جولداۋىندا: «الەمنىڭ ءامىرشىسى – ەڭبەك. تەك ەڭبەكپەن عانا جەمىس ونبەك, تەك ەڭبەك قانا بار قيىندىقتى جەڭبەك», دەي كەلە, بارلىق قازاقستاندىقتاردى مەملەكەت يگىلىگى جولىنداعى ەڭبەككە شاقىردى, بۇگىندە ەڭبەك شەشۋشى ۇلتتىق فاكتور ەكەنىن ۇعىندىردى, جالپىعا ورتاق ەڭبەك قوعامى يدەياسىن ۇسىندى. البەتتە, مەملەكەت باسشىسىنىڭ بۇل ستراتەگيالىق تاپسىرماسىن ورىنداۋدا ەل جاستارىنىڭ ءرولى زور. پرەزيدەنت ءوز ەڭبەكتەرىندە جاستار رەفورمالاردىڭ العى ساپىندا بولۋعا ءتيىس جانە ءححى عاسىردا قازاقستاندى قۇراتىن دا, دامىتاتىن دا ناق وسى وسكەلەڭ ۇرپاق ەكەنىن ەرەكشە اتاپ كورسەتتى. جولداۋدا جۇكتەلگەن الەۋمەتتىك جاڭعىرۋ جولىنداعى ناقتى مىندەتتەردى جۇزەگە اسىرۋدا بۇل جارمەڭكەنىڭ وزىندىك ماڭىزى بار ەكەندىگىن ەرەكشە اتاپ وتكىم كەلەدى. ءىس-شارا جاستار اراسىنداعى جۇمىسسىزدىق ماسەلەسىن شەشەتىن ماڭىزدى مەحانيزم بولىپ تابىلادى, – دەپ اتاپ ءوتتى شارا ۇيىمداستىرۋشىلارى.
جارمەڭكەگە الماتى وبلىسى مەن الماتى قالاسىنداعى مەكتەپكە دەيىنگى جانە ورتا ءبىلىم بەرۋ ۇيىمدارى قاتىسىپ, ءوز مەكەمەلەرىندەگى بوس جۇمىس ورىندارىن ۇسىندى. ستۋدەنتتەر بۇل مۇمكىندىكتى پايدالانىپ تۇيىندەمەلەرىن جولدادى. سونداي-اق, ولار ءوز جەتىستىكتەرى تىركەلگەن پورتفوليولارىنىڭ كورمەسىن وتكىزىپ, پرەزەنتاتسيا جاسادى.
– بوس جۇمىس ورىندار جارمەڭكەسىن ۇيىمداستىرۋ جاس ماماندارعا عانا ەمەس, جۇمىس بەرۋشىلەر ءۇشىن دە ماڭىزدى. جاستار وزدەرىن قىزىقتىراتىن بوس ورىندار تۋرالى مالىمەت الۋعا, ال بىزدەر ءۇشىن تۇلەكتەردىڭ ىسكەرلىك قاسيەتىن باعالاۋعا مۇمكىندىك تۋدىرادى. وسى تاقىلەتتەس شارالار ارقىلى تۇلەكتەرگە اقپارات بەرە الامىز. ورتا مەكتەپكە قىزمەتكە ورنالاسقان جاس مامانعا تاجىريبەسى مول ۇستازدار باعىت-باعدار بەرىپ, جۇمىسىنىڭ قىر-سىرىن تەرەڭ مەڭگەرۋىنە ارقاشان قولۇشىن كورسەتەدى. سوندىقتان جاستار جۇمىس ىستەۋگە دەگەن ىنتا-ىقىلاس تانىتسا, ءبىز ءوز تاراپىمىزدان ءاردايىم قولداۋ كورسەتۋگە دايىنبىز, – دەيدى جارمەڭكەگە قاتىسۋشى جۇمىس بەرۋشى.