الاتاۋ بوكتەرىندەگى اسەم شاھاردا ورنالاسقان بالۋان شولاق اتىنداعى سپورت سارايىندا «الماتى بارىسى» ءتۋرنيرى ءوتتى. وسى جارىس بارىسىندا ءار اۋداننىڭ ۇزدىكتەرى ءوزارا كۇش سىناسىپ, جازدا جالاۋى جەلبىرەيتىن جىلدىڭ باستى دوداسىنا قاتىسۋعا مۇمكىندىك بەرەتىن قوس جولدامانى ساراپقا سالدى.
ۇلتتىق ونەرىمىزدى ۇلىقتايتىن شارانى تاماشالاۋ ءۇشىن ءار جىلدارى حالىقارالىق ارەنادا ەل سپورتىنىڭ ابىرويىن اسقاقتاتىپ, مەملەكەتىمىزدىڭ ماقتانىشىنا اينالعان ازاماتتار كوپتەپ كەلدى. ال بوز كىلەمدەگى باسەكەلەرگە كەلەتىن بولساق, اقتىق سىندا كۇش سىناسۋ قۇرمەتىنە بولەنگەن قوس بالۋاننىڭ وزگەلەردەن شوقتىعى بيىك تۇرعانى بىردەن اڭعارىلدى. بارلىق قارسىلاستارىن قاپى قالدىرعان رۋسلان ابدىرازاقوۆ پەن داۋرەن نۇرالينوۆ باس جۇلدە ءۇشىن تالاستى.
جانكۇيەرلەر دە, ماماندار دا بۇل باسەكەنىڭ ءفاۆوريتى رەتىندە مەدەۋ اۋدانى وكىلىنىڭ ەسىمىن اتادى. ارينە وعان تاڭدانۋعا بولماس. سەبەبى ابدىرازاقوۆ قازاق كۇرەسىنەن وتكەن تالاي ءدۇبىرلى دودالاردا دارا شىققان. «الەم بارىسى», «ەۋرازيا بارىسى» تۋرنيرلەرىندە اسقان شەبەرلىك تانىتىپ, كوپشىلىكتىڭ قوشەمەتىنە بولەندى. «قازاقستان بارىسى» باسەكەسىندە جۇلدەگەرلەر قاتارىنان كورىندى. الەم چەمپيونى دەگەن اتاعى تاعى بار. ونىڭ ۇستىنە, بىلتىرعى وسى جارىستىڭ فينالىندا رۋسلان داۋرەندى ۇتقان بولاتىن. بىراق بۇل جولى ءبارى باسقاشا بولدى. تۇركىسىب اۋدانىنىڭ اتىنان شىققان داۋرەن نۇرالينوۆ ايتۋلى جارىسقا كەرەمەت دايارلىقپەن كەلگەن ەكەن. شەشۋشى تۇستا وزىنەن بويى دا ۇزىن, سالماعى دا باقانداي 10 كيلوعا اۋىر ساقا سپورتشىنى سان سوقتىرىپ كەتتى (ابدىرازاقوۆتىڭ سالماعى – 132 كيلو, ءنۇرالينوۆتىڭ سالماعى – 122 كيلو – رەد.).
وسىلايشا, داۋرەن نۇرالينوۆ «الماتى بارىسى» اتانىپ, باس جۇلدەگە تىگىلگەن «لادا پريورا» كولىگىن تىزگىندەدى. كۇمىس جۇلدەگەر رۋسلان ابدىرازاقوۆقا 300 مىڭ تەڭگە بۇيىردى. ال قولا مەدالدى يەلەنگەن الاتاۋ اۋدانىنىڭ وكىلى ەلدار ناسيەۆ 100 مىڭ تەڭگەنى قالتاعا باستى.
عالىم سۇلەيمەن,
«ەگەمەن قازاقستان»
الماتى