ەۋروپا ليگاسى: اقتىق سىنعا كىم لايىق؟

وتكەن اپتادا جارتىلاي فينالدىڭ العاشقى ماتچ­تارىن­دا تارتىستى ويىندار ءوتتى. «ارسەنال» ءوز الاڭىندا «ات­لە­تي­كومەن» تەڭ ءتۇسىپ, «مارسەل» «زالتس­بۋرگتى» جەڭدى. بۇل ەكى ويىن­نىڭ العاشقىسى تارتىمدى ءارى شىم-شىتىرىق وقيعاعا تولى بولدى. لوندونننىڭ «ارسە­نالى» كەزدەسۋ ءفاۆوريتى ەدى. يس­پانيالىقتاردىڭ ساپىندا قورعاۋشى شيمو ۆرسالكو «قىزىل قاعاز» الىپ, الاڭنان قۋىل­عان سوڭ, «ارسەنالدىڭ» شا­بۋىلى كۇشەيە ءتۇستى. الەك­ساندر لياكاززەت ەسەپ اشىپ, «زەڭبىرەكشىلەردى» العا شىعار­دى. الايدا 80-مينۋتتا انۋان گريزمان تارازى باسىن تەڭەس­تىرىپ كەتتى. بۇل ويىندا «ات­لەتي­كونىڭ» باس باپكەرى ديەگو سي­ميونە دە تورەشىدەن «قىزىل قا­عاز» الىپ, شاكىرتتەرىنە جاقىن جەردەن اقىل ايتا الماي قالدى. ەندى ول ءوز الاڭىنداعى ويىندا دا, تريبۋنا تورىنەن ورىن الادى.

ماۋسىم سوڭىندا باس باپ­كەرلىك قىزمەتىنەن كەتەتىن ار­سەن ۆەنگەر 24 جىل باسقارعان كو­مان­داسىمەن كەتەراياق جاساپ, ءبىر تروفەي جەڭىپ كەتكىسى كە­لەدى. بۇل ويىن ۆەنگەر ءۇشىن ەۋرو­كۋبوكتەگى 250-ءشى ويىن بولىپ­تى. سونىمەن بىرگە لون­دون­­دىقتارعا قازىر ەۋروپا ليگا­سىنىڭ كۋبوگى اۋاداي قاجەت. سە­­بەبى ولار ىشكى بىرىنشىلىكتە ۇز­دىك تورتتىكتەن شىعىپ قالىپ, چەم­پيوندار ليگاسىنا قاتىسۋ مار­تە­بەسىنەن ايىرىلدى. دەمەك, «ۆاندو مەتروپاليتانو» ستاديو­نىندا وتەتىن ويىندا ارسەن ۆەنگەر كومانداسى ەشتەڭەدەن تايىنبايدى.

بىراق «اتلەتيكو» ەۋروپا لي­گاسىنىڭ سوڭعى 3 ويىنىندا, ءوز ستاديونىندا مۇلدە گول جى­بەر­مەي, جەڭىسكە جەتىپ وتىردى. ال «ارسەنال» يسپان كلۋبتارى­نا قارسى وتكەن سىرتتاعى ويىنداردىڭ باسىم بولىگىندە جەڭىلىس تاپقان. ونىڭ ۇستىنە «ارسەنال» ەۋروپا ليگاسىنىڭ دەبيۋتانتى بولىپ سانالادى. جاۋاپتى ويىندا باسىمدىق الاڭ يەلەرىندە بولعانىمەن, «اتلەتيكوعا» قارسى 7 رەت ويناپ, 4 گول سوققان مەسۇت ءوزىل سەكىلدى فۋتبولشىلار تەكەتىرەس تاعدىرىن وزگەرتىپ جىبەرۋى مۇمكىن.

ال ەكىنشى جاۋاپتى ويىن اۋستريادا وتەدى. «زالتسبۋرگ» فرانتسيانىڭ ورتاڭقول ۇجىمى «مارسەلدى» قابىلدايدى. العاشقى ويىندا ديميتري پايە باستاعان سايىپقىراندار قارسىلاستىڭ ادىمىن اشتىرماي, 2:0 ەسەبىمەن باسىم ءتۇستى. ەندى ءوز الاڭىندا 10 ويىن بويى جەڭىلىپ كورمەگەن «زالتسبۋرگ» فرانتسۋزدارعا نە كۇش كورسەتەر ەكەن؟! جاي جەڭىپ قانا قويماي, اۋستريالىقتارعا 3 دوپ ايىرماسى كەرەك. وسى جىلعى ەۋروپا ليگاسىندا ولار 3 ويىندا 3 دوپ ايىرماسىمەن جەڭىسكە جەتكەن. سونىمەن قاتار قوس كوماندا توپتىق دەڭگەيدە ءبىر-بىرىنە قارسىلاس اتانعان. «زالتسبۋرگ» ءوز الاڭىندا 1:0 جەڭىپ, سىرتتاعى ويىندى تەڭ اياقتاعان.

بۇل كەزدەسۋدىڭ جەڭىمپازى 16 مامىر كۇنى ليون قالاسىندا وتەتىن فينالدا شارتتى تۇردە الاڭ يەسى بولىپ سانالادى.

ەرمۇحامەد ماۋلەن,

«ەگەمەن قازاقستان»