ەلباسى قابىلدادى

كەشە مەملەكەت باسشىسى نۇرسۇلتان نازارباەۆ قازاقستان رەسپۋبليكاسى ۇلتتىق بانكىنىڭ توراعاسى گريگوري مارچەنكو­نى قابىلدادى, دەپ حابارلادى قازاقستان رەسپۋبليكاسى پرە­زيدەنتىنىڭ ءباسپاسوز قىزمەتى. گ.مارچەنكو مەملەكەت باسشىسىن ەلىمىزدىڭ قارجى سالاسىنىڭ اعىمداعى جاعدايى, اتاپ ايتقاندا, ۆاليۋتا رىنوگىنداعى جاعداي تۋرالى حاباردار ەتتى. – ۆاليۋتا رىنوگىنداعى جاعداي وتە قالىپتى. اعىمداعى جىلدىڭ قاراشا ايىندا ءبىز بيرجادان 100 ملن. اقش دوللارىن ساتىپ الدىق. سوندىقتان بۇگىنگى كۇنى ۇلتتىق قوردىڭ اكتيۆى 43,5 ملرد. اقش دوللارىن, ۇلتتىق بانكتىڭ التىن-ۆاليۋتا قورى 32,5 ملرد. اقش دوللارىن قۇرايدى. ەلىمىزدىڭ جيىنتىق التىن-ۆاليۋتا اكتيۆى 76 ملرد. اقش دوللارىنا جەتىپ وتىر. 2012 جىلدىڭ 1 قاڭتارىنان باستاپ قازاقستاندا وندىرىلەتىن بارلىق التىن ۇلتتىق بانك ارقىلى ساتىپ الىنادى. تولەم بالانسى بويىنشا جاعداي وتە جاقسى. ءۇشىنشى توقسانعا ارنالعان تولەم بالانسىنىڭ سالدوسى جاعىمدى بولىپ تابىلادى. مەن سونداي-اق مەملەكەت باسشىسىنا بانك سالاسىنداعى جاعداي تۋرالى باياندادىم. اعىمداعى جىلدىڭ مامىر ايىنان بەرى وڭ ءۇردىس بايقالۋدا. نەسيەلەۋ كولەمى ارتا باستادى. اعىمداعى جىلدىڭ 10 ايىندا نەسيەلەۋ 11 پايىزعا ارتتى. بۇل – وتە وڭ جاعىمدى كەزەڭ, – دەدى ۇلتتىق بانك توراعاسى.

*  *  *

مەملەكەت باسشىسى نۇرسۇلتان نازارباەۆ قازاقستان جازۋشىلار وداعىنىڭ توراعاسى, كورنەكتى قوعام قايراتكەرى, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى نۇرلان ءورازاليندى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. كەزدەسۋ بارىسىندا قوعامدىق دامۋدىڭ, قازىرگى زامانعى ادەبي ۇدەرىستەردىڭ وزەكتى ماسەلەلەرى جانە قازاقستاندى جاڭعىرتۋداعى زيالى قاۋىمنىڭ ءرولى تالقىلاندى. ن.ورازالين قازاقستان جازۋشىلار وداعىنىڭ قىزمەتى تۋرالى ايتىپ بەردى. اڭگىمەلەسۋ بارىسىندا مەملەكەت باسشىسى مادەنيەت, ۇلتتىق ادەبيەت پەن ونەردى دامىتۋ ماسەلەلەرىنە ەرەكشە نازار اۋداردى. – پرەزيدەنت ءاربىر جازۋشىنى جانە ميلليونداعان قازاقستاندىق وقىرماندار اۋديتورياسىن ءبىزدىڭ باستى يگىلىگىمىز – تاۋەلسىز قازاقستاندى قاستەرلەپ ساقتاۋعا شاقىردى. ۇلتتىق ادەبيەت ءبىزدىڭ قوعامنىڭ بيىك رۋحاني ادامگەرشىلىك قۇندىلىقتارىن كوركەم سوزبەن جەتكىزە ءبىلىپ, وسى قوعامدىق مىندەتتى ىسكە اسىرا وتىرىپ, دامۋى كەرەك, – دەدى ن.ورازالين.