29 ساۋىردە جاپونيا ۇكىمەتى 2018 جىلدىڭ كوكتەمىندە وردەنمەن ماراپاتتالاتىن شەتەل ازاماتتارىنىڭ ءتىزىمىن جاريالادى. وردەن يەگەرلەرىنىڭ ىشىندە پارلامەنت ءماجىلىسىنىڭ دەپۋتاتى, جاپونيا پارلامەنتىنىڭ قازاقستانمەن دوستىق ليگاسىنىڭ مۇشەسى نۇرلان ورىنباسار ۇلى دۋلاتبەكوۆ بار. بۇل تۋرالى قازاقستانداعى جاپون ەلشىلىگى حابارلادى.
ەكى حالىقتىڭ اراسىنداعى دوستىق پەن ءوزارا تۇسىنىستىكتى نىعايتۋعا قوسقان جەكە ۇلەسى ءۇشىن «كۇنشىعىس ەلى, گۇلورنەكتى التىن شۋاق» وردەنى بەرىلىپ وتىر. اتالعان وردەن جاپون يمپەراتورىنىڭ بۇيرىعىمەن جاپونيامەن دوستىق قارىم-قاتىناستاردا كورنەكتى ۇلەس قوسقان شەتەل ازاماتتارىنا بەرىلەدى.
نۇرلان ورىنباسار ۇلى قاراعاندى قالاسىندا دۇنيەگە كەلگەن. زاڭ عىلىمىنىڭ دوكتورى, پروفەسسور, قر ۇعا كوررەسپوندەنت-مۇشەسى. 150-دەن استام عىلىمي جۇمىستاردىڭ اۆتورى. عىلىمي-پەداگوگيكالىق تاجىريبەلەردى انگليادا, بەلگيادا, تۇركيادا, يسپانيادا, مالايزيادا جانە جاپونيادا وتكىزگەن. «دوستىق» (II دارەجەلى) وردەنىنىڭ كاۆالەرى.