ەسەپ بويىنشا بۇگىندە الماتى وبلىسىندا 105 ەتنوس وكىلدەرى تۇرادى ەكەن. وبلىس ورتالىعىنداعى «دوستىق ءۇيى» شاڭىراعى استىندا تۇراقتى جۇمىس اتقاراتىن 26 ەتنومادەني ورتالىقتىڭ اۋداندار مەن شاعىن قالالاردا 45 قۇرىلىمدىق بولىمشەلەرى تاعى بار.
مۇنان بولەك, وبلىستىق قازاقستان حالقى اسسامبلەياسىنا قاراستى بىرنەشە ورتالىق ءتۇرلى باعىتتا تۇراقتى جۇمىس ىستەپ وتىر. ولاردىڭ اراسىنان ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندەگى عىلىمي-ساراپتامالىق توپ, قحا كافەدراسى, ەتنوسارالىق تاقىرىپ بويىنشا جەتەكشى جۋرناليستەر مەن ساراپشىلاردىڭ كلۋبى, «ۇلاعات» اقساقالدار كەڭەسى, «انالار كەڭەسى», «قوعامدىق كەلىسىم كەڭەسى» جانە «بىرلىك» جاستار قاۋىمداستىعى, جەتەكشى جۋرناليستەر كلۋبىن ءبولىپ ايتۋعا بولادى. سونداي-اق, «پاراسات» ءتىل جاناشىرلار كلۋبى, «ورنەك» بي ءانسامبلى, «پولونيا» ۆوكالدى توبى, «ۆايناح» شەشەن-ينگۋش ءان-بي ءانسامبلى دە ايماقتاعى ونەر مەن مادەنيەتتىڭ وركەندەۋىنە ءوز ۇلەسىن قوسىپ كەلەدى.
«دوستىق ءۇيى» اياسىندا تۇراقتى قىزمەت ەتىپ, ەل بىرلىگىن ساقتاۋدا ەلەۋلى ەڭبەك ءسىڭىرىپ كەلە جاتقان ۇيىمنىڭ ءبىرى «قوعامدىق كەلىسىم» كەڭەسى ەكەنى بەلگىلى. قازىر الماتى وبلىسى بويىنشا 627 قوعامدىق كەلىسىم كەڭەستەرى جۇمىس ىستەيدى. ولاردىڭ قاتارىن 1 وبلىستىق, 16 اۋداندا جانە 3 قالادا, 252 اۋىلدىق وكرۋگتە, 340 ەلدى مەكەندە, 15 ءىرى كاسىپورىندا قۇرىلعان كەڭەستەر تولىقتىرىپ تۇر. قوعامدىق كەڭەستەرگە بارلىعى 4 209 ادام مۇشە بولىپ وتىر. ەلمەن ەتەنە جۇمىس جاساۋدىڭ ۇلگىسى دە وسى قوعامدىق كەلىسىم ورتالىقتارىنا ءتان دەسە بولادى. ماسەلەن, بيىلعى جىلدىڭ ءبىرىنشى توقسانىندا عانا كەڭەستەر تاراپىنان 663 شارا ۇيىمداستىرىلىپتى. قوعامدىق كەڭەستەر الەۋمەتتىك ماسەلەلەردى شەشۋگە دە اتسالىسۋدا. جىل باسىنان بەرى كەڭەسكە 59 ادامنان ءوتىنىشى ءتۇسىپ, بىرقاتار قيىن تۇيىندەردىڭ شەشىلۋىنە قول جەتتى. ناتيجەسىندە, ءوتىنىش ارقالاپ كەلگەن ادامداردىڭ الەۋمەتتىك جاعدايىن وڭالتۋعا قوعامدىق كەلىسىم كەڭەستەرى ىقپال ەتكەنى قۋانتادى. ايتپاقشى, قازاقستان حالقى اسسامبلەياسى وبلىستىق حاتشىلىعى جانىنان انالار كەڭەسى قۇرىلعان. كەڭەس قۇرامىندا 876 مۇشە بار. نەگىزىنەن ۇلىن ۇياعا, قىزىن قياعا قوندىرعان, ومىرلىك تاجىريبەسى مول سىيلى انالاردىڭ باسىن قوساتىن كەڭەستە ۇرپاق تاربيەسى مەن ۇلت الدىنداعى ۇل-قىزدىڭ پارىزى ۇنەمى ساراپقا سالىنادى. ءداستۇر ساباقتاستىعىن ساقتاۋعا, مادەنيەت پەن قولونەرگە باۋلۋعا دا انالاردىڭ اقىل-كەڭەسى جاردەم بەرەرى انىق.
قازاقستان حالقى اسسامبلەياسى الماتى وبلىستىق فيليالى باسشىسىنىڭ ورىنباسارى, حاتشىلىق مەڭگەرۋشىسى عابيت تۇرسىنباي ۇلىنىڭ ايتۋىنشا, بەرەكەسى جاراسقان ۇلت پەن ۇلىستىڭ باسىن بىرىكتىرەتىن ناقتى ماقساتتار جەتكىلىكتى. مىسالعا, قايىرىمدىلىق جاساۋ قاعيداتتارىنا ءۇن قوسۋشىلار قاتارى جىل سايىن ارتىپ كەلەدى ەكەن. اسىرەسە, ەتنومادەني ورتالىقتاردىڭ باستاماسىمەن «قايىرىمدى ەل» جالپى رەسپۋبليكالىق اكتسياسى اياسىندا 527 قايىرىمدىلىق شارا ۇيىمداستىرىلىپ, 731 جاعدايى تومەن وتباسى مەن 272 جەكە تۇلعالارعا جانە كومەككە مۇقتاج 1430 كامەلەتتىك جاسقا تولماعان جاستارعا كومەك كورسەتىلدى. ناتيجەسىندە جالپى سانى 2433 ادامعا 24 689 000 تەڭگە كولەمىندە قايىرىمدىلىق جاسالدى. ءدال وسىنداي قايىرلى ءىس تۇراقتى وتكىزىلەتىن «دوستىق داستارقانى», «روجدەستۆو», «ماسلەنيتسا» شارالارى اياسىندا دا ۇيىمداستىرىلادى. دەمەك, اتامىز قازاقتىڭ «باي بولساڭ, ەلگە پايداڭ ءتيسىن» دەگەن ءۋالى ءسوزى جەتىسۋدى مەكەندەگەن از ۇلتتاردىڭ دا ۇرانىنا اينالىپ وتىر.
جاقىندا قازاقستان حالقى اسسامبلەياسى الماتى وبلىستىق فيليالى وسى جىلدىڭ ءبىرىنشى توقسانى بويىنشا ەتنوسارالىق تۇراقتىلىق پەن بىرلىكتى قامتاماسىز ەتۋ ماقساتىندا الەۋمەتتىك زەرتتەۋ جۇرگىزگەن بولاتىن. زەرتتەۋ بارىسىندا ساراپشىلاردىڭ قاتىسۋىمەن الەۋمەتتىك ساۋالنامالار تاراتىلدى. تۇرعىندار اراسىندا «Face to face» تاسىلىمەن جۇرگىزىلگەن زەرتتەۋگە مىڭنان استام رەسپوندەنت تارتىلعان. قازاق, ورىس تىلدەرىندە قويىلعان ساۋالدارعا بەرىلگەن بۇكپەسىز جاۋاپتىڭ قورىتىسىندا شىعارىلعاننان كەيىن, ايماقتاعى ۇلتارالىق قاتىناستىڭ قالىپتى دەڭگەيدە دامىپ وتىرعانىنا كەزەكتى مارتە كوز جەتتى.
- ەتنوسارالىق اراقاتىناس مونيتورينگى كورسەتكەندەي اۋدان جانە قالالارداعى كورسەتكىشتەر تۇراقتى جانە جاعىمسىز باعالاۋلار بولعان جوق. ساۋالناما جۇرگىزىلگەن تۇرعىنداردىڭ باسىم بولىگى مەملەكەتتىك قۇرىلىمدارعا سەنىمدەرىنىڭ جوعارى ەكەندىگىن جانە ەتنوسارالىق كەلىسىمدى ساقتاۋ بويىنشا مەملەكەتتىك ساياساتتى قولدايتىندىقتارىن, سونىمەن قاتار بارلىق مەملەكەتتىك باعدارلامالارعا قاتىستى قۇجاتتارمەن ۋاقىتىلى اقپاراتتاندىرىلىپ وتىراتىندىقتارىن كورسەتتى, - دەيدى قازاقستان حالقى اسسامبلەياسى الماتى وبلىستىق فيليالى باسشىسىنىڭ ورىنباسارى, حاتشىلىق مەڭگەرۋشىسى عابيت تۇرسىنباي ۇلى.
قالماحانبەت مۇقامەتقالي,
«ەگەمەن قازاقستان».
الماتى وبلىسى.