ەۋروپالىق ۋنيۆەرسيتەتتەر اسسوتسياتسياسىنىڭ (ەۋا) تاعايىنداۋ جونىندەگى كوميتەتى ءال-فارابي اتىنداعى قازۇۋ رەكتورىن اتالمىش ىرگەلى حالىقارالىق ۇيىمنىڭ پرەزيدەنتى لاۋازىمىنا ۇسىندى.
اسسوتسياتسيانىڭ شتاب-پاتەرى بريۋسسەل قالاسىندا ورنالاسقان جانە ول ەۋروپاداعى 800 جەتەكشى ۋنيۆەرسيتەتتەردى بىرىكتىرەدى. ونىڭ قىزمەتى ەۋروپالىق ۋنيۆەرسيتەتتەرگە زاماناۋي قاجەتتىلىكتەرگە جانە جوعارى حالىقارالىق ستاندارتتارعا ساي ءتيىمدى دامۋعا كومەكتەسۋگە باعىتتالعان. ەۋا پرەزيدەنتى عىلىم مەن ءبىلىم سالالارىنىڭ كورنەكتى قايراتكەرلەرى اراسىنان ءۇش جىلدا ءبىر رەت سايلانادى.
كاسىپقوي, پروگرەسسيۆتى كوشباسشى, كورنەكتى عالىم جانە كوپتەگەن عىلىمي-ءبىلىم بەرۋ جوبالارىنىڭ باستاماشىسى رەتىندە عالىم مۇتانوۆ حالىقارالىق اكادەميالىق قوعامداستىقتا كەڭىنەن تانىمال. ەۋروپا كەڭىستىگىندە عىلىم جانە ءبىلىم سالاسىنداعى حالىقارالىق ىنتىماقتاستىقتى نىعايتىپ, دامىتقانى ءۇشىن قازۇۋ رەكتورى پولشا رەسپۋبليكاسى قىزمەت وردەنىنىڭ كاۆالەر كرەستى, فرانتسيانىڭ پالما بۇتاعى اكادەميالىق وردەنى, ء«بىلىم جانە عىلىم سالاسىنداعى كورنەكتى ەڭبەگى ءۇشىن» اتتى اتاۋلى التىن مەدالىمەن جانە باسقا دا ماراپاتتارعا يە بولعان.
ونىڭ كانديداتۋراسىن بىرقاتار تانىمال ۋنيۆەرسيتەتتەر قولدادى. مىسالى, رەسەي حالىقتار دوستىعى ۋنيۆەرسيتەتىنىڭ رەكتورى ۆلاديمير فيليپپوۆ, ەۋروپالىق ۋنيۆەرسيتەتتەر قاۋىمداستىعىنىڭ باس حاتشىسىنا جولداعان قولداۋ حاتىندا اكادەميك عالىم مۇتانوۆ اسسوتسياتسيانىڭ پرەزيدەنتى لاۋازىمىنا تاعايىندالعان جاعدايدا, ەۋا-نى ءپوزيتيۆتى كەلەشەك كۇتىپ تۇرعانىنا شىنايى سەنىم ءبىلدىردى.
قازاقستان وكىلىنىڭ جوعارى لاۋازىمعا ۇسىنىلۋى مەملەكەتتىڭ جوعارى ءبىلىم جۇيەسىندەگى جەتىستىكتەرىنىڭ الەمدىك دەڭگەيدە تانىلۋىنىڭ جارقىن كورىنىسى.
ارمان وكتيابر, «ەگەمەن قازاقستان»
الماتى