قر ۇكىمەتىنىڭ قاۋلىسىمەن ماۋبەرلينوۆا نۇرگۇل وسەربايقىزى اقپارات جانە كوممۋنيكاتسيالار ۆيتسە-ءمينيسترى قىزمەتىنە تاعايىندالدى. بۇرىن ۆيتسە-مينيستر لاۋازىمىندا الان اجىباەۆ بولعان ەدى, ول بەرگەن وتىنىشىنە سايكەس بۇل لاۋازىمىنان بوساتىلدى, دەپ حابارلايدى primeminister.kz.
نۇرگۇل ماۋبەرلينوۆا 1973 جىلى قاراعاندى وبلىسىندا تۋعان. بوكەتوۆ اتىنداعى قاراعاندى مەملەكەتتىك ۋنيۆەرسيتەتىن جانە قازتۇتىنۋ وداعىنىڭ قاراعاندى ەكونوميكالىق ۋنيۆەرسيتەتىن بىتىرگەن.
ەڭبەك جولىن 1992 جىلى باستاعان. ءتۇرلى جىلدارى مەملەكەتتىك ورگاندار قۇرىلىمى مەن كوممەرتسيالىق سەكتوردا قىزمەت ەتكەن.
2006–2008 جىلدارى — قر مادەنيەت جانە اقپارات مينيسترلىگىنىڭ اقپارات جانە مۇراعات كوميتەتىنىڭ باس مامانى, باس ساراپشى.
2008–2012 جىلدارى — قر پرەمەر-ءمينيسترى كەڭسەسىنىڭ اقپاراتتىق-ساراپتامالىق ورتالىعىنىڭ باس كەڭەسشىسى.
2012–2016 جىلدارى قر پرەزيدەنتى جانىنداعى «ورتالىق كوممۋنيكاتسيالار قىزمەتى» رمم ديرەكتورىنىڭ ورىنباسارى, قر پارلامەنتى ءماجىلىسىنىڭ كەڭەسشىسى لاۋازىمىندا بولدى.
2016 جىلدىڭ شىلدە ايىنان قازىرگى كەزگە دەيىن قر اقپارات جانە كوممۋنيكاتسيالار مينيسترلىگىنىڭ اقپارات كوميتەتىنىڭ توراعاسى بولىپ جۇمىس ىستەدى.