حوككەيدەن قازاقستان ۇلتتىق قۇراماسى الەم بىرىنشىلىگىنىڭ جوعارى ديۆيزيونىنا ورالۋ ءۇشىن تاعى ءبىر باتىل قادام جاسادى. ۆەنگريا استاناسى بۋداپەشت قالاسىندا ءوتىپ جاتقان الەم چەمپيوناتىنىڭ ەكىنشى ماتچىندا وتانداستارىمىز ۇلىبريتانيا قۇراماسىمەن كەزدەسىپ, 6:1 ەسەبىمەن ويسىراتا جەڭدى.
ەكى قۇراما اراسىنداعى تەكەتىرەستىڭ ءبىرىنشى كەزەڭى 1:1 ەسەبىمەن تەڭ اياقتالدى. ماتچتىڭ ءۇشىنشى مينۋتىندا ۇلىبريتانيا قۇراماسىنىڭ ويىنشىسى ليۋك فەررار ەسەپتى اشىپ, كومانداسىن العا شىعارسا, 15-مينۋتتا قازاقستاندىق حوككەيشى دميتري گرەنتس تارازى باسىن تەڭەستىردى.
ويىننىڭ ەكىنشى كەزەڭىن قازاقستان قۇراماسى ناتيجەلى باستاپ, باسىمدىقتى ءوز قولدارىنا الدى. ماتچتىڭ 33-مينۋتىندا انتون ساگادەەۆ شايبانى الىستان باعىتتاپ, قاقپانى ءدال كوزدەگەن بولاتىن. الايدا ۇلىبريتانيا قۇراماسىنىڭ باپكەرى سوعىلعان شايباعا ءوزىنىڭ نارازى ەكەنىن, ەرەجەگە ساي سوعىلماعانىن ايتىپ, تورەشىلەردەن سول ءساتتى ۆيدەودان قايتالاۋىن كورۋدى تالاپ ەتتى. ناتيجەسىندە, تورەشىلەر شايبا سوعىلعان كەزدى قايتا قاراپ, ساگادەەۆتىڭ شايباسىن ەسەپكە الدى. ارادا ەكى مينۋت وتكەن سوڭ رومان ستارچەنكو ەسەپتى 3:1-گە جەتكىزدى.
ءۇشىنشى كەزەڭدە قازاقستان قۇراماسى بريتانيالىقتاردىڭ قاقپاسىنا جاۋاپسىز ءۇش شايبا سوقتى. 42-مينۋتتا رومان ستارچەنكو دۋبل جاساسا, 46-مينۋتتا نيكيتا ميحايليس مەرگەندىگىمەن كوزگە ءتۇستى. ال التىنشى شايبانى قۇرامامىزدىڭ جاس ويىنشىسى ءاليحان اسەتوۆ سوقتى. قورىتىندى ەسەپ – 6:1.
ەكى ويىندا دا جەڭىسكە جەتكەن قازاقستان قۇراماسى التى ۇپاي جيناپ, ءى ديۆيزيونىنىڭ «ا» توبىندا ءبىرىنشى ورىندا كەلەدى. ەكى ماتچتا ءۇش ۇپاي جيناعان يتاليا, پولشا, ۆەنگريا جانە ۇلىبريتانيا قۇرامالارى ەكىنشى مەن بەسىنشى ورىنداردى ءوزارا ءبولىسىپ تۇر. ال مۇلدە ۇپايى جوق سلوۆەنيا حوككەيشىلەرى سوڭعى التىنشى ورىندا.
ايتا كەتەيىك, چەمپيونات قورىتىندىسى بويىنشا ءبىرىنشى جانە ەكىنشى ورىنعا قول جەتكىزگەن قۇرامالار «ا» توبىنىڭ جوعارى ديۆيزيونىنا, ياعني توپ ديۆيزيوندا ويناۋعا مۇمكىندىك الادى.
ۇلىبريتانياعا قارسى ويناعان قازاقستان قۇراماسىنىڭ ويىنشىلار ءتىزىمى: كارلسسون – سەميونوۆ-داللمەن, ستارچەنكو-كۋچين-رىمارەۆ; لاكيزا-مەتالنيكوۆ, ميحايليس-گرەنتس-ەۆدوكيموۆ; پولوحوۆ-ورەحوۆ, اكولزين-ساگادەەۆ-ماركەلوۆ; ىبىرايبەكوۆ-پەتۋحوۆ, اسەتوۆ-گۋركوۆ-ۆولكوۆ.
بەت قاتتالىپ جاتقاندا: كەشە كەشكىسىن قازاقستان قۇراماسى يتاليالىق حوككەيشىلەرمەن كەزدەسىپ, 0:3 ەسەبىمەن ۇتىلىپ قالدى. ويىن تۋرالى تولىعىراق ەرتەڭگى نومىردە جاريالانادى.
ءالي بيتورە,
«ەگەمەن قازاقستان»