ساتباەۆ قالاسىندا ۇلتىمىزدىڭ ىقىلىم زاماننان كەلە جاتقان اسپاپتارىندا وينايتىن ونەرپازدار اراسىندا ەردەن ساندىباي ۇلى اتىنداعى ءداستۇرلى ءىىى رەسپۋبليكالىق بايقاۋ ءوتتى. بۇعان دەيىن بايقاۋدا تەك قوبىزشىلار عانا باق سىناپ كەلسە, بۇل جولى سىبىزعىشىلار مەن سازسىرناي شەبەرلەرى, سونداي-اق جەتىگەن اسپابىندا ويناۋدى جەتىك مەڭگەرگەن ورەندەر ونەر جارىستىردى.
بايقاۋ شىمىلدىعى اعا سۇلتان ەردەننىڭ بالاسى بايمەندەدەن ايىرىلىپ قايعى جۇتقان باقىتسىز شاعىن باياندايتىن ساحنالىق قويىلىممەن اشىلدى. بۇدان كەيىن ساحنا تورىنە ساتباەۆ قالاسىنىڭ اكىمى اسقار ىدىرىسوۆ كوتەرىلىپ, بايقاۋعا قاتىسۋشىلار مەن كورەرمەنگە قۇتتىقتاۋ ءسوز ارنادى.
– بۇل اسپاپتار – ۇلتىمىزدىڭ تاريحي-ەتنوستىق مادەنيەتىنىڭ كونەرمەس كوزى, رۋحاني قازىناسى, باعا جەتپەس مۇلكى. جاھاندانۋ ارانىنا جۇتىلىپ كەتپەس ءۇشىن جان دۇنيەمىزدى جادىراتىپ, رۋحىمىزدى ءدۇر سىلكىندىرەتىن وسىنداي بايقاۋلاردى ۇيىمداستىرۋ – قاسيەتتى بورىشىمىز. ەلباسىنىڭ «رۋحاني جاڭعىرۋ» باعدارلاماسى تەرەڭگە تامىر جىبەرگەن قاسيەتتى ۇلتتىق كودىمىزدى سانامىزدا قايىرا جاڭعىرتۋعا ۇندەپ وتىر. تۇپكى ماقسات, باستى مەجە وسى, – دەپ تۇيىندەدى ءسوزىن قالا باسشىسى.
بايقاۋدىڭ سالتاناتتى اشىلۋ راسىمىندە كورەرمەن قاۋىم جەرگىلىكتى ونەر مەكتەبىنىڭ ۇلت-اسپاپتار توبى مەن قاراعاندىدان ارنايى كەلگەن «ارقا اجارى» فولكلورلىق ءانسامبلىنىڭ كونتسەرتتىك باعدارلاماسىن تاماشالادى. بۇعان قوسا وڭىرگە بەلگىلى جەزتاڭداي ءانشى قۇرماش ىبىشەۆتىڭ اندەرىنە قۇلاق قۇرىشىن قاندىردى.
بايقاۋعا قاتىسۋشى ۇمىتكەرلەردىڭ اسپاپتا ورىنداۋ شەبەرلىكتەرىن قازاقستاننىڭ ەڭبەك سىڭىرگەن قايراتكەرى ەرمۇرات ۇسەنوۆ باستاعان قازىلار القاسى تارازىلادى.
بايقاۋدىڭ ەكىنشى كۇنى وتكەن ىرىكتەۋ كەزەڭىندە ەلىمىزدىڭ ءار ايماعىنان كەلگەن ونەرپازدار ءوزارا سىنعا ءتۇستى. قازىلار القاسى العاشقى كەزەڭدە باق سىناعان 34 قاتىسۋشىنىڭ اراسىنان ەكىنشى كەزەڭگە 14 ونەرپازدى ىرىكتەپ شىعاردى.
بايقاۋدىڭ ءۇشىنشى كۇنىندە قازىلار مەن كورەرمەننىڭ كوڭىلىنەن شىعىپ, وزا شاپقان ونەرپازداردىڭ ەسىمدەرى انىقتالدى. تارتىستى وتكەن ونەر سايىسىنىڭ ءى ورىنعا تاعايىندالعان ارقايسىسى 200 مىڭ تەڭگە بولاتىن ەكى جۇلدەسى الماتىلىق ماريام ۇسەن مەن سولتۇستىك قازاقستان وبلىسىنىڭ وكىلى ايدوس اقىلبەكوۆكە بۇيىردى.
ال باس جۇلدەگە استانا قالاسىنان كەلگەن ونەرپاز فاريزا قوسشىعۇلوۆا لايىقتى دەپ تانىلدى. سانانى جاڭعىرتقان ونەر سايىسىنىڭ جەڭىمپازى ارنايى ديپلوممەن جانە 400 مىڭ تەڭگەنىڭ سەرتيفيكاتىمەن ماراپاتتالدى.
قايرات ءابىلدا,
«ەگەمەن قازاقستان»
قاراعاندى وبلىسى,
ساتباەۆ قالاسى
سۋرەتتى تۇسىرگەن مەرۋەرت ناۋرىزباەۆا