وڭتۇستىك ديقاندارىنىڭ كوڭىلى نەگە كۇپتى؟

اقپاننىڭ باسىندا ەگىلىپ, بۇگىندە ءونىم بەرىپ جاتقان قىرىققابات ماقتاارالدا 892,5 گەكتار جەرگە ەگىلگەن, بۇل بىلتىرعى جىلمەن سالىستىرعاندا 112,8 گەكتارعا ارتىق. ال جىلىنا قىرىققاباتتان ءۇش رەت ءونىم الاتىن سارىاعاشتىق ديقاندار 1,5 مىڭ گەكتار جەرگە ەرتە كوكتەمگى قىرىققابات, جاز جانە كۇز ايلارىندا وسى كوكونىستەردىڭ بىرنەشە سور­تىن 5500 گەكتارعا اتالعان كوكونىستەر ەگەدى.

العاشقى ونىمدەرىن وزدەرى ءۇشىن ءتيىمدى باعامەن تۇتىنۋشىعا جونەلتكەن ديقاندار بۇگىندە قىرىققاباتتىڭ ارزانداپ بارا جاتقانىنا الاڭداۋلى. ال باعانىڭ تومەندەۋىنە كورشى ەلدىڭ, ياعني وزبەكستاننىڭ ونىمدەرى اسەر ەتىپ وتىر ەكەن. كوكونىستىڭ ارزانداۋى قاراپايىم حالىققا جاقسى, ارينە. ماقتاارال اۋدانىنداعى «ىنتىماق» شارۋا قوجالىعى 4 گەكتار جەرگە قىرىققابات ەككەن. ءونىمنىڭ 2-3 پايىزىن عانا جيناعان. قالعان ءونىمنىڭ ءپىسىپ-جەتىلۋىنە ەكى اپتاداي ۋاقىت بار. «قىرىققاباتتىڭ از عانا بولىگىن كيلوسىن 90 تەڭگەدەن وتكىزدىك. اپتا وتپەي جاتىپ-اق بۇل باعا تومەندەدى. سەبەبى وزبەكستاننىڭ ونىمدەرى ارزان ساۋدالانۋدا. «اتامەكەن» اۋىلدىق وكرۋگىندە 370 گەكتارعا قىرىققابات ەگىلگەن. ەگەر باعا وسىلاي تومەندەي بەرسە, وندا ديقانداردىڭ جۇمساعان شىعىنى وتەلمەيدى. ياعني شارۋاعا ءتيىمسىز, ەڭبەگى اقتالمايدى. وتكەن جىلى قىرىققابات باعاسى سوڭىندا 30 تەڭگەگە دەيىن تۇسكەن بولاتىن. ءونىمنىڭ بۇل تۇرىنە سۋبسيديا بەرىلمەيدى. ديقاندارعا قيىن بولۋدا, سوندىقتان مەملەكەتتىك قولداۋ كورسەتىلسە دۇرىس بولار ەدى», دەيدى «ىنتىماق» شارۋا قوجالىعىنىڭ توراعاسى ق.ءمۇتاشوۆ.

حالقىنىڭ سانى جاعىنان دا, ەكونوميكاسى جاعىنان دا ورتالىق ازياداعى ۇلكەن مەملەكەت وزبەكستانمەن بايلانىس قازاقستان ءۇشىن وتە ءتيىمدى. بۇگىنگى تاڭدا ەكى ەل اراسىنداعى قارىم-قاتىناس جاڭا بەلەسكە كوتەرىلىپ, ساۋدا-ساتتىق ەكى ەسەگە ءوستى. ساۋدا-ەكونوميكالىق, مادەني-گۋمانيتارلىق جانە باسقا دا سالالارداعى ەكىجاقتى ىنتىماقتاستىق قارقىندى دامىپ كەلەدى. ءوز كەزەگىندە وزبەكستاندىق تاۋار وندىرۋشىلەرمەن ەكونوميكالىق باسەكەلەستىك تە جوعارىلادى. مۇنى الدىمەن جوعارىدا ايتىپ وتكەنىمىزدەي, وڭتۇستىك قازاقستان وبلىسىنىڭ كاسىپكەرلەرى انىق سەزىنىپ وتىر. كورشى ەل تاۋارلارى ءبىرىنشى كەلەتىن ايماق ديقاندارى ءۇشىن بۇل كۇردەلى ماسەلەگە اينالۋدا. ال اۋىل شارۋاشىلىعى سالاسى ماماندارىنىڭ پىكىرىنشە, كورشى ەل ءونىمىنىڭ كوپتەپ ساۋدالانۋىنا بەرىلگەن مۇمكىندىك وڭتۇستىك ديقاندارىن شيراتا تۇسەدى. ياعني كوكتەم مەن جاز ايلارىندا كەتپەن-كۇرەك ۇستاعانداردىڭ ەرتە تۇرىپ, كەش جاتۋىنا تۋرا كەلەدى. سونداي-اق جەردى ءتيىمدى پايدالانۋ, ءونىمدى وڭدەۋ, ساقتاۋ, تاسىمالداۋ ماسەلەلەرىنە نازار اۋدارۋدى قاجەت ەتەدى.

يمپورتتا وڭتۇستىكتىڭ ۇلەسى 50,3 پايىز

وتكەن جىلدىڭ قورىتىندىسى بويىنشا وڭتۇستىك قازاقستان وبلىسىمەن وزبەكستاننىڭ تاۋار اينالىمى الدىڭعى جىلمەن سالىستىرعاندا 11,7%-عا ارتىپ, 622,6 ملن اقش دوللارىنا جەتكەن. قازاقستان مەن وزبەكستان اراسىنداعى تاۋار اينالىمىندا وقو-نىڭ ۇلەسى – 31,3%. ال قازاقستاننىڭ وزبەكستانعا ەكسپورتىنداعى وقو ۇلەسى – 20,2%. نەگىزىنەن مۇناي ونىمدەرى, مەتالل بۇيىمدار, تسەمەنت, ۇن, بيداي, كارتوپ, وسىمدىك مايى, ترانسفورماتور ەكسپورتتالادى. الايدا وتكەن جىلى ۇن (7,2%-عا) مەن بيداي (13%-عا) ەكسپورتى تومەندەگەن. وسى ارادا ايتا كەتەلىك, وزبەكستان ۇن ءوندىرىسىن سوڭعى 4-5 جىلدا قارقىندى دامىتقان. سونىڭ ارقاسىندا ولار نەگىزگى تۇتىنۋشى ەلدەر نارىعىن جاۋلاي باستادى. ودان كەيىن الا شاپاندى اعايىندار وزدەرىندە جاپپاي ديىرمەن كەشەندەرىن سالىپ الدى, ولارعا ۇكىمەتتەن قولداۋ كورسەتىلۋدە. مىسالى, سالىق سالىمىن ءبىر توننا ۇنعا 30 دوللارعا ازايتقان. وسىنداي سەبەپتەرگە دە بايلانىستى وڭتۇستىكتەگى ۇن ەكسپورتى تومەندەسە كەرەك. تەك وڭتۇستىك ەمەس, بۇل وزگەرىس استىقتى ءوڭىردىڭ كاسىپكەرلەرىنە دە اسەرىن تيگىزۋدە. ەلىمىزدە 250-دەن استام ۇن وندىرەتىن كاسىپورىن بار ەكەن. كاسىپكەرلەر ۇن وندىرۋشىلەرگە قولداۋ كورسەتۋدىڭ تەتىكتەرىن قاراستىرۋ قاجەتتىگىن ايتۋدا.

وزبەكستاننان كەلەتىن تاۋارلار ۇلەسى دە الدىڭعى جىلمەن سالىستىرعاندا 9,5 پايىزعا, 369,8 ملن اقش دوللارىنا كوبەيگەن. وزبەكستاننىڭ قازاقستانعا يمپورتىندا وقو-نىڭ ۇلەسى 50,3 پايىز. نەگىزىنەن كورشى ەلدەن اۋىلشارۋاشىلىق ونىمدەرى اكەلىنەدى. اسىرەسە كوكونىس, جەمىس-جيدەك, شىرىن, تىڭايتقىش, توقىما زاتتارى مەن اۆتوكولىك كوبىرەك جەتكىزىلەدى. ساراپشىلار وزبەكستاندا ساۋدا كەدەرگىلەرىن قىسقارتۋ باعىتىندا قىرۋار شارا اتقارىلعانىن ايتۋدا. سونداي-اق اكتسيز سالىعىنىڭ ستاۆكالارى 15 تاۋارعا, ونىڭ ىشىندە ۇنعا 11-دەن 0%-عا دەيىن, وسىمدىك مايى 20-دان 5%-عا دەيىن, ەت ونىمدەرىنە 30-دان 0%-عا دەيىن تومەندەتىلگەن. ەكسپورتتى ىنتالاندىرۋ جانە وزبەك تاۋارلارىنىڭ سىرتقى ساۋداداعى باسەكەلەستىگىن قامتاماسىز ەتۋ ءۇشىن وزبەكستان ۇكىمەتى ەكسپورتتىق كەدەن باجىن جويدى.

بۇدان بولەك, ءوز ءونىمىن ەكسپورتتاۋشى كاسىپورىندارعا شەتەلدەردە ساۋدا ۇيلەرىن اشۋعا جانە ءونىمىن جارنامالاۋعا, سىرتقى ساۋدانى ماركەتينگتىك زەرتتەۋ ءۇشىن وكىلدىكتەرىن اشۋعا رۇقسات ەتىلگەن. مىسالى, شىمكەنتتە 10-نان استام وزبەكستاندىق ساۋدا ءۇيى تىركەلگەن. كوممۋنالدىق قىزمەتتەر دە كورشى ەلدە ارزان. وقو كاسىپكەرلەر پا­لا­تاسىنىڭ دەرەكتەرىنە قارا­عان­دا, زاڭدى تۇلعالار ءۇشىن سۋدىڭ با­عاسى شىمكەنتتە تەكشە مەترىنە 31,6 تەڭگە بولسا, تاش­كەنتتە – 18,05 تەڭگە. ال ەلەكتر قۋاتىنىڭ كۆت/ساعاتى شىمكەنتتە 24,8 تەڭ­گە تۇرسا, تاشكەنتتە – 8,07 تەڭ­گە, تابيعي گازدىڭ تەكشە مەترى وڭ­تۇس­تىكتە – 31,6 تەڭگە, ال كورشى ەل استا­ناسىندا – 7,68 تەڭگە. وڭ­تۇس­تىك­تىكتەگى كاسىپكەرلەر با­عا­داعى بۇل ايىرماشىلىق ءونىم­نىڭ وزىن­دىك قۇ­­نىنا اسەر ەتىپ جاتقانىن ايتىپ, وڭىر­لىك كاسىپكەرلەر كەڭەسىندە ما­سەلە دە كوتەرگەن بولاتىن.

باسەكەلەستىك ءباسى جوعارى بەس اي

وزبەكستانمەن قارىم-قاتى­ناس­تىڭ جاقسارىپ, بارىس-كەلىستىڭ كوبەيگەنى, شەكارا بەكەتتەرىنىڭ اشىل­عانىنا قاراپايىم حالىق قۋانىپ وتىر. الايدا ديقاندار الاڭ­داۋلى, ۇساق شارۋا قوجالىق­تا­رى باسەكەلەستىككە توتەپ بەرە الاتى­نىنا سەنىمسىز. بۇل ورايدا اۋىل شا­رۋاشىلىعى سالاسىنىڭ مامان­دارى وزبەكستان بىزدەگى باعاعا ما­مىردان قازانعا دەيىن ىقپال ەتەتىنىن, ال بۇل ايلاردا جىلى­جايلار جۇمىسى سايابىرلايتىنىن اي­تادى. ياعني جىلىجايلاردىڭ كو­بىنىڭ توپىراعى جاڭارتىلادى, قىس­قا دايىندالادى. «وزبەكستاندا جى­لىجاي كولەمى 1,5 مىڭ گەكتار بولادى. وڭتۇستىك ءوڭىر دە وسى كولەمگە جاقىندادى. وبلىس بويىنشا جىلىجاي كولەمى 1325 گەكتار بولسا, ونىڭ باسىم بولىگى – 633 گەكتارى سارىاعاش اۋدانىندا. كورشىلەرىمىزدەگى جىلىجايلاردىڭ باسىم بولىگى اسكوك, گۇل, ليمون, كوشەت وسىرۋمەن اينالىسسا, 30 پايىزدايى قيار مەن قىزاناق ەگەدى.

ال بىزدەگى 1325 گەكتار جىلى­جاي­دىڭ كوپ بولسا 100 گەكتارىن­دا عانا كوشەت, گۇل وسىرىلەدى, ياع­ني نەگىزگى ەگەتىنىمىز قيار مەن قى­زا­ناق. وزبەكستان جىلىجايدا گاز قول­دانبايدى, سەبەبى «كوگىلدىر وتىن­مەن» حالىقتى قامتاماسىز ەتۋ كەرەك. ال كومىر قىمبات. سون­دىق­تان وزبەك ديقاندارى قىزاناق پەن قياردى مامىر ايىنان باس­تاپ 5 اي اشىق توپىراقتا وسىرەدى. اشىق توپىراقتا وسكەن ءونىم ارزان بولادى. وسى 5 ايدا وزبەكستان ونىم­دەرى بىزدەگى باعاعا اسەر ەتۋى اب­دەن مۇمكىن. ال باسقا 7 ايدا ىق­پال ەتە المايدى. ەرتەڭ ولار اشىق توپىراقتاعى ءونىمىن تومەن با­عامەن اكەلەدى, ونىمەن تۇرماي ۆا­ليۋتا باعامى ارقىلى دا ۇتادى. ال قىس ايلارىندا جىلىجايلارى جۇمىس ىستەيتىن بولسا, ونىمدەرى وزدەرىنەن دە ارتىلمايدى. وڭتۇستىكتە جىلىجايلاردىڭ جۇمىسى, ونىمدەرىن تاسىمالداۋ, وتكىزۋ ماسەلەسى ءبىر جۇيەگە قويىلعان. ءار جىلىجايدىڭ ءوز الارمانى بار, الدىن الا تاپسىرىس بەرۋشىلەر دە از ەمەس. تۇسەتىن تابىسى دا قوماقتى. مىسالى, فەرمەرلىك جىلىجايدا 1 گەكتار قيار ەگۋگە كەتەتىن شىعىن 2016 جىلعى ەسەپ بويىنشا 28,0 ملن تەڭگە. ءبىر گەكتاردان 150 توننا ءونىم العاندا, وزىندىك قۇنى 186 تەڭگە بولادى. كاسىپكەر كوتەرمە باعامەن 220 تەڭگەدەن بەرگەننىڭ وزىندە 36 ملن تەڭگە تابىس تۇسەدى. وعان 2 اينالىم بەرىلەتىن 3 ملن تەڭگە سۋبسيديانى قوسىڭىز, سوندا جىلىجاي يەسىنىڭ تازا تابىسى 8 ملن تەڭگەگە جەتەدى. جىلىجاي ءوزىن 5 جىلدا اقتايدى دەپ ەسەپتەلگەن, بىراق 2,5-3 جىلدا اقتايدى.

ال گەكتارىنان 450 توننا ءونىم الىپ, 51,2 ملن تەڭگە تابىس تۇسىرەتىن وندىرىستىك جىلىجاي ءوزىن ەكى جىلدا اقتايدى. قىزاناق پەن قياردىڭ تۇتىنۋشى ءۇشىن قىمبات بولۋىنىڭ ءبىر سەبەبى – ورتاداعى ساتۋشىلار ۇستەمە باعانى كوپ قويادى. جالپى, ءونىمىن وتكىزە الماي قالعان كاسىپكەردى تابا المايسىز. ال سۋبسيديانىڭ بەرىلۋى دە كاسىپكەرگە ۇلكەن قولداۋ, دەگەنمەن ەكىنشى جاعىنان جالقاۋلىققا جەتەلەيدى. ءبىر گەكتار جىلىجايدان ءبىزدىڭ كاسىپكەر, مىسالى, 100 توننا ءونىم السا, كورشىلەرىمىز 180 توننا الۋى مۇمكىن. ول ەندى وزبەك ديقاندارىنىڭ كاسىبى, ونەرى. جىلىجايعا كوممۋنالدىق قىزمەتتەر باعاسىنىڭ ىقپالى جوق», دەيدى وبلىستىق اۋىل شارۋا­شى­لىعى باسقارماسى اۋىل­شا­رۋا­شى­لىق ونىمدەرىن وڭدەۋ, يننو­ۆا­تسيا­لىق جەتىستىكتەردى قولداۋ جا­نە ماقتا سالاسىن دامىتۋ ءبولىمىنىڭ باس مامانى تايجان مىرزازيا.

كورشى ەلدىڭ سۋرحانداريا, قاشقاداريا وبلىستارىندا جىلىنا ءبىر اي عانا جىلىجايدا وتىن جاعىلادى ەكەن. سارىاعاش اۋدانى اۋىل شارۋاشىلىعى ءبولى­مىنىڭ مالىمەتىنشە, وڭتۇستىكتە جىلىجايعا كەمىندە 4 ايعا تابيعي گاز نەمەسە قاتتى وتىن ساتىپ الىنادى. وعان جۇمسالاتىن قارجى – 7 200 000 تەڭگە (تابيعي گاز) نەمەسە 8 640 000 تەڭگە (كومىر). سارى­اعاش اۋدانىندا كوكونىس داقى­لىن كوپ وندىرەتىن قابلانبەك اۋىل­دىق وكرۋگىندە جىلىجايدىڭ 1 گەك­تارىنان ورتاشا ەسەپپەن 120 توننا ءونىم الىنادى. ورتا ەسەپپەن تونناسىن 220 000 تەڭگەدەن ساتقاندا 6,2 ملن تەڭگە تازا تابىس تۇسەدى ەكەن. وزبەكستان شەكاراسىنان كوكونىس داقىلدارىن وتكىزۋ جەڭىلدەتىلگەنگە دەيىن «جاباي اتا» شارۋا قوجالىعى وتكەن جىلى كو­كونىستى 100-300 تەڭگەگە وتكىزگەن. مامانداردىڭ ايتۋىنشا, كورشى ەل كوكونىسىنىڭ وڭتۇستىك نارىعىندا كوبەيۋى جىلىجايلار تىرشىلىگىنە كەرى اسەر ەتە المايدى.

الايدا كاسىپكەرلەردىڭ پىكىرى باس­قا. سوڭعى جىلدارى وزبەك دي­قان­دارى اكەلەتىن كوكونىس ۇلەسى كوبەي­گەندىكتەن تابىستارى 50 پا­ي­ىزعا ازايعان. بۇل ورايدا ولار ۇكى­مەتتەن سۋبسيديانىڭ ساق­تا­لۋىن نەمەسە كورشى ەلدەن كەلە­تىن تاۋارعا شەكتەۋ قويىلۋىن سۇ­راپ وتىر. جىلىجايلاردىڭ جا­يى وسىلاي. باسەكەلەستىك باقشا ونىم­دەرىن ءوسىرىپ, وتباسىن اسىراپ وتىرعان ديقاندار ءۇشىن قيىن بول­عالى تۇر. ويتكەنى كورشى ەلدىڭ ءونى­مى ەرتە پىسەدى جانە باعاسى تو­مەن. وبلىس بويىنشا باقشا ونىم­دەرىنىڭ كولەمى 57,6 مىڭ گەكتار. دەگەنمەن, باۋ-باقشاسى, تاسىمالدايتىن كولىگى, ساقتايتىن قويماسى بار, الما, ءجۇزىم وسىرۋمەن اينالىساتىن ءىرى «Dala-fruit.kz», «امانگەلدى» سەكىلدى س­ەرىكتەستىكتەر باسەكەلەستىككە قا­بى­لەتتى. ءسوزىمىزدىڭ باسىندا ايت­قا­­نىمىزداي, سۋبسيدياعا سەنىم ارت­قان ۇساق شارۋا قوجالىقتار جۇ­مسالعان شىعىندى وتەي المايمىز دەپ قاۋىپتەنىپ وتىر. نە ىستەمەك كەرەك؟

اگروايماق – باسەكەگە قابىلەتتىلىكتى ارتتىرادى

«اتامەكەن» ۇلتتىق كاسىپكەرلەر پالاتاسى وقو بويىنشا حالقى تىعىز ورنالاسقان, تۋ كورسەتكىشى ەڭ جوعارى, تۇرعىندارى كاسىپ­كەر­لىككە بەلسەندى سارىاعاش اۋدا­نىندا زەرتتەۋ جۇمىستارىن جۇر­گىزىپتى. اۋدانداعى 327 مىڭنان اس­تام تۇرعىننىڭ 158 مىڭى (48%) – ەكو­نوميكالىق بەلسەندى. سارى­اعاش­تا جۇمىس ىستەپ تۇرعان 20 300 بيزنەس سۋبەكتىسى بار, 78 800 ادام ءوزىن ءوزى جۇمىسپەن قامتىعان. 45 347 مىڭ جەكە شارۋاشىلىقتىڭ جارتىسى ناتيجەلى جۇمىسپەن قام­تىلعان. دەگەنمەن, اۋداندا جۇ­مىس ورنىمەن قامتۋ وزەكتى ما­سە­لە بولىپ وتىر. ءار ءۇيدى ارا­لاپ, اۋ­دان تۇرعىندارى مەن كاسىپ­كەر­لە­رىنە جۇرگىزىلگەن ساۋالناما رەس­مي ستاتيستيكا مەن سكريني­نگ ناتيجەسى اراسىندا بەس ەسە اۋىت­قۋ بارىن كورسەتكەن. وسى رەت­تە جۇمىسسىزداردىڭ 89%-ى جاسى­رىن تابىس تابادى, ەكى مىڭنان اس­تام كاسىپكەر رەسمي تىركەلمەگەن.

«اتامەكەن» ۇكپ باسقارما تور­اعاسىنىڭ ورىنباسارى ەلدار جۇماعازيەۆتىڭ مالىمدەۋىنشە, سارى­اعاشتا كوكونىس پەن جەمىس ءوسى­ر­ۋ­دىڭ الەۋەتى زور. اۋدان بۇ­كىل قازاقستاندى جەمىس جانە كو­كونىسپەن قامتاماسىز ەتە الادى. بىراق تالداۋ ناتيجەسىندە اۋ­دان­دا 30 مىڭ گەكتار جەردە بي­داي وسىرىلەتىنى انىقتالعان. ونىم­دىلىگى گەكتارىنا 1 توننادان اسپايدى. ياعني جەر تيىمدىلىگى 1 گەك­تار ءۇشىن 150 اقش دوللارىنان اسپاي وتىر. ال ينتەنسيۆتىلىگى جو­عا­رى باقتارداعى تيىمدىلىك 20 مىڭ اقش دوللارىن قۇرايدى. ياعني سارىاعاشتا بيداي وسىرۋدەن گورى باسىمدىقتى قارقىندى باقتار شارۋاشىلىعىنا بەرۋ كەرەك.

«اۋداندا باسەكەلەستىكتى ارتتىرىپ, جەرگىلىكتى ءونىم ءوندىرىسىن ءوسىرۋ ءۇشىن زاماناۋي جىلىجاي كەشەنى جانە قارقىندى باقتار, تازالاۋ, وڭدەۋ, ۋاقىتشا ساقتاۋ ايماقتارى, سەرتيفيكاتتاۋ, قاپتاۋ جانە برەندتەۋ بولىمدەرى بار بىرنەشە اگرارلىق-يندۋستريالىق ايماق (اگروايماق) قۇرۋ قاجەت. اگروايماق ءار قاتىسۋشى ءۇشىن جەكەلەگەن جەر ۋچاسكەلەرىنەن تۇرۋى كەرەك (2, 4, 8 گا بويىنشا). بۇل ۋچاسكەلەردە سۋ ۇنەمدەيتىن تەحنولوگيالار جانە قارقىندى يننوۆاتسيالىق ادىس­تەر قولدانىلادى. ال ينفرا­قۇ­رىلىمدى تارتۋ – جەرگىلىكتى ات­قار­ۋشى ورگانداردىڭ مىندەتى. «اتا­مە­كەن» بۇل تىزبەككە تەح­نو­لو­گيا­­لار, ۇيىمداستىرۋ جۇمىس­تا­رىن قامتيتىن زاكىرلىك ينۆەستوردى قوسۋدى مىندەتىنە الادى. ءبىز اگروايماقتارعا قاتىسۋشىلاردى تۇ­راق­تى نەگىزدە وقىتۋ مەن بىلىك­تىلىكتى ارتتىرۋ, تەحنولوگيالار بويىنشا كەڭەس بەرۋ, زاڭگەرلىك سۇيەمەلدەۋ قىزمەتىمەن قامتاماسىز ەتەمىز», دەيدى ە.جۇماعازيەۆ. كاسىپكەرلىك پالاتا ماماندارىنىڭ ەسەبىنشە, اۋداندا 1 500 گەكتار جەردە, ونىڭ ىشىندە 500 گەكتار – جىلىجاي, 1000 گەكتار – باقتار اگروايماقتارىن قۇرۋ كوكونىس ءوندىرىسىن 1,5-2 ەسە, جە­مىس ءوندىرىسىن 2 ەسە ارتتىرۋعا, كو­كونىس پەن جەمىس ەكسپورتىن 9 مىڭ­نان 50 مىڭ تونناعا دەيىن وسى­رۋ­گە مۇمكىندىك بەرەدى ەكەن.

كورشى ەلدەن كەلەتىن كوكونىس اعى­نى ءبىزدىڭ ديقانداردى اۋىل­شا­رۋا­شىلىق ءونىمىن ءوندىرۋدىڭ ءتي­ىمدى جولدارىن قاراستىرۋعا, ەڭ­بەك ونىمدىلىگىن جوعارىلاتۋعا ىنتا­لاندىرىپ وتىر. ايتپەسە ەكى ەلدىڭ ەكونوميكاسى باسەكەلەس ەمەس, ءبىرىن-ءبىرى تولىقتىراتىن سەرىكتەس. ولاي دەيتىنىمىز, ەكونوميكالىق بايل­انىستى ودان ءارى نىعايتۋ ماق­ساتىندا جاسالعان جول كارتاسى نەگىزىندە باۋىرلاس ەلدەر كەلەشەكتە تاۋار اينالىمىن 5 ملرد اقش دوللارىنا جەتكىزبەك.

عالىمجان ەلشىباي,

«ەگەمەن قازاقستان»

وڭتۇستىك قازاقستان وبلىسى