ءارتۇرلى مازمۇنداعى كىتاپتاردىڭ ىشىنەن الەمنىڭ موينىنا اشەكەي بولىپ تاعىلعان ايەل تۋرالى جازىلعان قالىڭ تومدار تۇگىلى, پىشاقتىڭ قىرىنداي جۇقالتاڭ كىتاپتىڭ ءوزى كەز كەلگەن ساناتتاعى وقىرماننىڭ قىزىعۋشىلىعىن ەرىكسىز وياتاتىن ەرەكشەلىگى بار كورىنەدى. اسىرەسە ايەل تۋرالى وقۋ ايەلدىڭ وزىنە قىزىق. جاقىندا بەلگىلى جۋرناليست, «تۇركىستان» حالىقارالىق ساياسي اپتالىعىنىڭ قىزمەتكەرى تاڭسۇلۋ الدابەرگەنقىزىنىڭ «ايەلمەن الەم ادەمى» اتتى جاڭا كىتابىنىڭ تۇساۋكەسەر-تانىستىرىلىمىنا جينالعان قىز-كەلىنشەكتەردىڭ لەبىزى, ولاردىڭ قۋانىشى وسىنى اڭعارتتى.
مەملەكەتتىك سىيلىقتىڭ لاۋرەاتى, جازۋشى بەكسۇلتان نۇرجەكە ۇلىنىڭ كىتاپقا جازعان كىرىسپە سوزىنە كوز جۇگىرتىپ شىققاننان كەيىن مۇقاباسى ادەمى كىتاپ ارقىلى ايەل الەمى مەن بەلگىلى وتباسىلار ومىرىنە ساپارلاپ شىعاتىنىمىزدى ىشتەي سەزىنىپ تە ۇلگەرگەن ەدىك. راسىندا دا, قوعامداعى بەلگىلى ايەلدەر نەمەسە بەلگىلى تۇلعالاردىڭ سۇيىكتى جارى جايلى جازىلعان تاڭداۋلى ەسسە, ماقالا, سۇحباتتار ءبىر كۇننىڭ ەمەس, بىرنەشە جىلعى ەڭبەكتىڭ جەمىسى.
«تۇركىستان» گازەتىنە كوپ جىلدار باسشىلىق جاساعان الاشتىڭ ابىزى, قازاقستاننىڭ حالىق جازۋشىسى قالتاي مۇحامەتجانوۆتىڭ يدەياسىمەن دۇنيەگە كەلگەن «ايەل-الەم» قىز-كەلىنشەكتەر بەتىنەن باستاۋ العان ت.الدابەرگەنقىزىنىڭ شىعارماشىلىعىنداعى تىڭ توپتامالار ءوز تۇراقتى وقىرمانىن الدەقاشان قالىپتاستىرىپ العان. تالاي جىلداردان بەرى حانىمدار تاقىرىبىنا تالماي قالام تەربەپ كەلە جاتقان تاڭسۇلۋ الدابەرگەنقىزى وي-پايىمىن, سىر-سۇحباتىن قازاقى تانىممەن ءورىپ, تارقاتادى. ونسىز دا ءبولىپ-جارۋعا كەلمەيتىن ايەل مەن وتباسىنى ءبۇتىن ءبىر ۇعىمعا اينالدىرادى. كوڭىل كۇيدىڭ, ىشتە تىنشىپ اعىپ جاتاتىن ءارتۇرلى سەزىمدەردىڭ, وتباسىلىق جاراسىمنىڭ گەنەراتورى ايەل ەكەنىنە كاسىبى دە, تاعدىرى دا ءبىر-بىرىنە ۇقسامايتىن كەيىپكەرلەرىنىڭ اڭگىمەسى ءتىپتى كوز جەتكىزە تۇسەدى. مىسالى, 100 جاساعان اكتريسا حابيبا ەلەبەكوۆانىڭ اپكەسى داليلا تۋرالى اڭگىمەسى, عاسىرمەن قۇرداس تاعى ءبىر اكتريسا ايشا ابدۋللينانىڭ جۇرەكجاردى سىرى, سەركە قوجامقۇلوۆتىڭ قىزى رەناتامەن, حالىق جازۋشىسى, اقىن ءابۋ سارسەنباەۆتىڭ قىزى رايحانمەن وربىگەن سۇحباتتارى شىنايىلىعىمەن ءھام تەرەڭدىگىمەن تارتىمدى.
كىتاپتاعى اسا قىزىقتى تاراۋلاردىڭ ءبىرى «جارى جاقسىنىڭ – جانى جاقسى» دەپ اتالادى. مۇندا ۇلت جۋرناليستيكاسىنىڭ العى كوشىنەن كورىنگەن ۇستاز-جۋرناليست بالعابەك قىدىربەك ۇلىنىڭ زايىبى ساپۋرا اپاي, قازاق مۋزىكاسىنىڭ سايىپقىرانى نۇرعيسا تىلەنديەۆتىڭ جارى داريعا تىلەنديەۆا, ادەبيەت پەن مادەنيەتكە مول مۇرا سىيلاپ كەتكەن قادىر مىرزا ءالىنىڭ ايەلى سالتانات, تالانتتى اكتەر ءارى رەجيسسەر رايىمبەك سەيىتمەتوۆتىڭ جارى نەيلا مالدىباەۆا, جازۋشى باققوجا مۇقايدىڭ جارى نۇرجامال احمەتوۆا, بەلگىلى ساحنا مايتالماندارى ەسبولعان جايساڭباەۆ پەن ءانۋار مولدابەكوۆتىڭ جارلارى ءساليحا قوجاقوۆا مەن بايان يماشەۆا, بار عۇمىرىن تەاتر تانۋعا ارناعان بىرەگەي ونەر زەرتتەۋشىسى اشىربەك سىعايدىڭ شاڭىراعى مەن مۇراسىنا يە بولىپ وتىرعان كۇلاش اپاي ءسوز الىپ, ۇلت رۋحانياتىنا قىزمەت ەتكەن ايتۋلى تۇلعالاردىڭ وتباسىنداعى ەل بىلە بەرمەيتىن جار, اكە, باۋىر رەتىندەگى قاراپايىم مىندەتى تۋرالى قىزىقتى سىر شەرتەدى.
بۇدان بولەك اۆتور ونەردە, ادەبيەتتە, جالپى رۋحانيات سالاسىنا ەڭبەك ءسىڭىرىپ جۇرگەن تانىمال ايەلدەردىڭ ءبىرتالايىنىڭ تۇتاس گالەرەياسىن جاساپ شىققان. ايەل مەن وتباسىنا بايلانىستى تۇيىتكىلدى ماسەلەلەردىڭ ءبارىن دە قامتۋعا تىرىسقان «ونەرىم – ءومىرىم», «تاربيە دەگەن ءبىر ءتاڭىر», ء«ومىردىڭ ءوزى» تاراۋلارىنىڭ دا كوتەرىپ تۇرعان جۇگى مول. سايىپ كەلگەندە, ءوز ۋاقىتىنداعى تاڭداۋلى ايەل بولۋدىڭ سىرىن, وتباسىن ىشكى-سىرتقى قاتەردەن قورعاپ قالۋدىڭ قۇپياسىن تانۋعا تاڭسۇلۋ الدابەرگەنقىزىنىڭ وسى كىتابى تامشىداي بولسا دا ءوز ۇلەسىن قوسارى ءسوزسىز. ايگۇل احانبايقىزى, «ەگەمەن قازاقستان»
الماتى