استانا قالاسىندا «بالا شابىتى» حالىقارالىق جوباسى اياسىندا وتكەن «بولاشاق جۇلدىزدار» بايقاۋىندا وبلىس نامىسىن «الۋا» بي ءانسامبلى ابىرويمەن قورعاپ, ءۇش جۇلدەگە يە بولدى.
حورەگراف انارا سابدينوۆانىڭ ايتۋىنشا بايقاۋعا ءانسامبلدىڭ 22 ءبيشىسى قاتىسىپ, «زاماناۋي بي» اتالىمىندا ءبىرىنشى, ەكىنشى ورىنداردى جەڭىپ العان. ال حالىق بي نوميناتسياسى بويىنشا باس جۇلدەنى يەلەنگەن.
ءسابيت مۇقانوۆ اتىنداعى قازاق سازدى-دراما تەاترىنىڭ جانىنان قۇرىلعان «الۋا» حالىق بي انسامبلىنە بيىل 8 جىل تولىپ وتىر. وسى جىلدار ىشىندە تالاي بيىك بەلەستەردى باعىندىرىپ, حاس شەبەرلەرگە ءتان ونەر كورسەتىپ كەلەدى.
«انسامبل سوچي, ماسكەۋ, قازاقستان قالالارىندا وتكەن بايقاۋلاردا توپ جاردى. بالعىن بيشىلەرىمىزدىڭ قادامى قاناتتاندىرادى. ولار بارلىق سىننان سۇرىنبەي ءوتىپ ءجۇر. كاسىبي شەبەرلىگىمىز بەن دايىندىعىمىزدى تالاي بەدەلدى قازىلار القاسى جوعارى باعالادى», دەيدى ءانسامبلدىڭ كوركەمدىك جەتەكشىسى جاننا تەمىرباەۆا.
كاسىبي بىلىكتىلىكتەرىن دالەلدەگەن جاس ونەرپازدار حالىقارالىق دەلفي ويىندارىنا جولداما الدى.
ءومىر ەسقالي, «ەگەمەن قازاقستان»