بۇگىن الماتىداعى «الماتى» قوناق ۇيىندە قازاقستان رەسپۋبليكاسىندا بالالارداعى سيرەك اۋرۋلاردى دياگنوستيكالاۋ مەن ەمدەۋدىڭ جاڭا ستاندارتتارىن ەنگىزۋگە ارنالعان جول كارتاسى اياسىندا «بالالارداعى مۋكوۆيستسيدوزدى دياگنوستيكالاۋ مەن ەمدەۋدىڭ وزەكتى ماسەلەلەرى» اتتى تاقىرىپتا عىلىمي-تاجىريبەلىك كونفەرەنتسيا باستالدى.
«مۋكوۆيستسيدوزبەن اۋىراتىن مۇگەدەك بالالار» قب قازاقستاندىق مۋكوۆيستسيدوز قاۋىمداستىعى, ۇلىبريتانيانىڭ «Cystic Fibrosis Worldwide» (CFW) دۇنيەجۇزىلىك مۋكوۆيستسيدوزحالىقارالىق ۇيىمى, قر دەنساۋلىق ساقتاۋ مينيسترلىگى مەن پەدياتريا جانە بالالار حيرۋرگياسى عىلىمي ورتالىعىنىڭ ۇيىمداستىرۋىمەن وتەتىن 2 كۇندىك كونفەرەنتسياعا پەدياتريالىق قىزمەتتىڭ جۇزدەن استام دارىگەرلەرى: پۋلمونولوگتار, ديەتولوگتار, گاستروەنتەرولوگتار, سونىمەن قاتار, قازاقستان رەسپۋبليكاسىنىڭ بارلىق ايماقتارىنان سيرەك (ورفاندىق) اۋرۋلار بويىنشا وڭىرلىك ۇيلەستىرۋشىلەر مەن مەديتسينالىق جوو ستۋدەنتتەرى قاتىسادى. شارانى وتكىزۋدەگى باستى ماقسات – قر دارىگەرلەرىنىڭ بىلىكتىلىگىن ارتتىرۋ جانە مەديتسينالىق قوعامداستىقتى مۋكوۆيستسيدوز ماسەلەلەرىنە نازار اۋدارتۋ.
2016 جىلعى 21 ماۋسىمدا CFW دۇنيەجۇزىلىك مۋكوۆيستسيدوز ۇيىمىنىڭ ديرەكتورلارى كەڭەسىندە قازاقستاندىق مۋكوۆيستسيدوز قاۋىمداستىعىن CFW مۇشەلىگىنە قابىلداۋ تۋرالى, سونداي-اق قازاقستاندى قولداۋ تۋرالى وڭ شەشىم قابىلدانعان بولاتىن. ەكى ەل اراسىنداعى كەلىسىم اياسىندا شەتەلدىك ۇيىم قازاقستاندىق دارىگەرلەردى مۋكوۆيستسيدوزدى ەمدەۋدىڭ الەمدىك ستاندارتتارىنا وقىتۋ ءۇشىن مۋكوۆيستسيدوزدى ەمدەۋشى ەڭ ۇزدىك ماماندارىن ەلىمىزگە كەلۋى مەن دارىستەر ۇيىمداستىرۋدى ءوز مىندەتىنە العان ەدى.
اتالمىش كەلىسىم-شارت اياسىندا قازاقستانعا ۇلىبريتانيانىڭ الدىڭعى قاتارلى گرەيت ورموند-ستريت جانە برومپتون كورولدىق اۋرۋحانالارىنىڭ گەندىك اۋرۋلاردى ەمدەۋ بويىنشا ەڭ مىقتى دەگەن دارىگەرلەرى, اتاپ ايتقاندا Dr. Ian Balfour-Lynn Cystic Fybrosus Paediatrician (پەدياتر), Dr. Susan Linden Woods CF Dietitian (ديەتولوگ), Ms Sunayana Ammaui Thorpebeeston CF Physiotherapist (فيزەوتەراپەۆت), Dr. Suzanne Kenny CF Nurse (مەيىربيكە) جانە دۇنيەجۇزىلىك مۋكوۆيستسيدوز ۇيىمىنىڭ پرەزيدەنتى تەرري ستيۋارت مىرزانىڭ ءوزى كەلەدى. بۇل سەمينار اتالمىش ۇيىمنىڭ ورتاق ماسەلەنى شەشۋدەگى العاشقى قادامى بولىپ تابىلادى.
ەكى كۇن بويى (24-25 ءساۋىر) وتەتىن شارا بارىسىندا شەتەلدىك ماماندار قازاقتاندىق دارىگەرلەرگە وقىتۋ سەمينارىن وتكىزىپ, گەندىك اۋرۋلاردى ەمدەۋدىڭ الەمدىك تاجىريبەلەرىمەن ءبولىسىپ, مۋكوۆيستسيدوزدى دياگنوستيكالاۋ مەن ەمدەۋدىڭ زاماناۋي تىسىلدەرىن ۇسىنادى. سونىمەن قاتار, مۋكوۆيستسيدوزعا شالدىققان بالالاردى دۇرىس كۇتۋ مەن تاماقتانۋ بويىنشا كەڭەستەر بەرەدى.
26 ءساۋىر كۇنى شەتەلدىك قوناقتار قر دسم پەدياتريا جانە بالالار حيرۋرگياسى عىلىمي ورتالىعىنىڭ تىنىس-تىرشىلىگىمەن تانىسىپ, سيرەك اۋرۋلارعا شالدىققان بالالاردىڭ اتا-انالارىمەن كەزدەسەدى. كەزدەسۋ اياسىندا №2 قالالىق بالالار ەمحاناسى, قر دەنساۋلىق ساقتاۋ مينيسترلىگى وكىلدەرى جانە كلينيكا دارىگەرلەرىنىڭ قاتىسۋىمەن دوڭگەلەك ۇستەل وتىرىسى وتەدى (پبحعو, ءماجىلىس زالى). وندا بالالارداعى مۋكوۆيستسيدوزدى دياگنوستيكالاۋ مەن ەمدەۋ, اۋرۋدى دياگنوستيكالاۋدىڭ مەديتسينالىق-گەنەتيكالىق ماسەلەلەرى, ەمدەۋ جانە دارىلىك زاتتارمەن قامتاماسىز ەتۋ, كينەزيتەراپيا جانە ناۋقاستى وڭالتۋ ماسەلەلەرى تالقىلانىپ, وقىتۋ ءدارىسى بويىنشا قورىتىندى شىعارىلادى. سونداي-اق, قازاقستاندا مۋكوۆيستسيدوز ورتالىعىن سالۋ جايىن تالقىلاۋ جوسپارلانعان.
كونفەرەنتسيا ەمدەۋدىڭ پاتوگەنەتيكالىق ءادىسى ءومىر بويىنا الماستىرىلاتىن ەم بولىپ تابىلاتىن بالالارداعى مۋكوۆيستسيدوز ماسەلەلەرىنە ارنالادى. گەندىك اۋرۋعا شالدىققان ناۋقاستاردى ەمدەۋ ەرەكشە قىمبات جانە الەمنىڭ بارلىق دامىعان ەلدەرىندە ارنايى مەملەكەتتىك باعدارلامالارمەن قامتاماسىز ەتىلەدى.
ايناش ەسالي, «ەگەمەن قازاقستان»