كەشە قازاقستاننىڭ سوتسيال-دەموكراتيالىق «اۋىل» پارتياسىنىڭ كەزەكتەن تىس VIII سەزى ءوتتى. وعان پارتيانىڭ ايماقتىق وڭىرلەر توراعالارى, اۋىلشارۋاشىلىعى مەن ونەركاسىبىنىڭ, ەكونوميكانىڭ باسقا دا سالالارىنىڭ ەڭبەككەرلەرى, زيالى قاۋىم وكىلدەرى, بەلگىلى عالىمدار, عىلىمي-زەرتتەۋ ينستيتۋتتارىنىڭ ءجانە جوعارى وقۋ ورىندارىنىڭ باسشىلارى مەن ستۋدەنتتەرى قاتىستى.
جيىن كەزىندە ەكى ماسەلە قارالدى. ءبىرى – قازاقستاننىڭ سوتسيال-دەموكراتيالىق «اۋىل» پارتياسىنىڭ سايلاۋالدى تۇعىرناماسىن بەكىتۋ, ەكىنشىسى – 2012 جىلدىڭ 15 قاڭتارىندا وتەتىن پارلامەنت ماجىلىسىنە «اۋىل» پارتياسىنان كانديداتتار ءتىزىمىن ۇسىنۋ جانە بەكىتۋ.
پارتيا توراعاسى عاني قاليەۆ «اق قار, كوز مۇزعا قاراماستان, ءبىزدىڭ كەڭ بايتاق جەرىمىزدىڭ ءتورت بۇرىشىنان تۇگەل سەزگە جينالعاندارىڭىز ءۇشىن ريزاشىلىعىمىزدى بىلدىرەمىز», دەپ ءسوزىن باستاي كەلە, بۇل جيىننىڭ تاۋەلسىزدىكتىڭ 20 جىلدىعى قارساڭىندا ۇيىمداستىرىلىپ وتىرعانىنا, تاۋەلسىزدىكتىڭ ءمانى مەن مازمۇنىنىنا توقتالىپ ءوتتى. ءبىزدىڭ ەلىمىز ەگەمەن ەل رەتىندە ءوزىن ايگىلەدى, دالەلدەدى. ەلىمىزدىڭ ۇلكەن حالىقارالىق بەدەلى بار. بۇل – شىندىق. وسى ورايدا, سىزدەردى ەل تاۋەلسىزدىگىنىڭ 20 جىلدىعىمەن قۇتتىقتايمىن. ءبىزدىڭ پارتيانىڭ قاتارىندا 200 مىڭنان استام ازامات بار. ءبىز ەلىمىزدىڭ جەتىستىكتەرى مەن كەمشىلىكتەرىنىڭ جاي عانا كۋاگەرلەرى ەمەسپىز. ارينە, ءار نارسەگە سىني كوزقاراسپەن قاراعانىمىز دۇرىس. ءبىز – كوپەتنوستى جانە كوپكونفەسسيالى ەلمىز. الەۋمەتتىك تە, ەكونوميكالىق تا سالالاردا قيىندىقتار بار. سوندىقتان, نەگە قول جەتكىزدىك, بولاشاعىمىز قانداي بولماق دەگەن ساۋال ءبىزدى مازالايتىنى انىق, دەدى پارتيا جەتەكشىسى. عاني قاليەۆتىڭ ايتۋىنشا, 2000 جىلى نەگىزى قالانعان پارتيانىڭ پارلامەنتتە اۋقىمدى فراكتسياسى بولعان. ەندى, مىنە, جاڭا سايلاۋ وتپەكشى. دەمەك, ەلدىڭ ازاماتتارى, ساياسي پارتيا وكىلدەرى رەتىندە قازاقستاننىڭ بۇگىنى مەن بولاشاعى ءۇشىن الاڭداۋ – زاڭدىلىق. ءبىز وسى ماقسات جولىندا بىرىگىپ وتىرمىز, دەدى ع. قاليەۆ.
بۇل كۇنى پارتيا وكىلدەرى الەۋمەتتىك-ەكونوميكالىق باعدارعا وزدەرىنىڭ سايلاۋالدى تۇعىرناماسىن جاريا ەتتى. وندا «اۋىل» پارتياسىنىڭ ماقسات-مىندەتتەرى كورىنىس تاپسا, پارتيا جەتەكشىسىنىڭ اۋىل ماسەلەسىنە قاتىستى ايتقان وي-پايىمىمەن پارتيا ءمۇشەسى, جازۋشى دۋلات يسابەكوۆتىڭ پىكىرى ۇندەس شىقتى. ءبىز بيلىكتىڭ ءسوزىن كوپ سويلەپ كەتتىك. اۋزىمىزدان بيلىك تۇسپەيتىن بولدى. حالىق اششىعا قۇمار, تاتتىدەن جەرىنىپ ءبىتتى. بالا ەمەس ول. مەن بيلىكتىڭ جاعاسىنان الايىق دەپ ۇگىتتەپ تۇرعان جوقپىن. بىراق حالىقتىڭ تۇرمىسىن اشىعىراق ايتۋىمىز كەرەك, دەدى جازۋشى.
سونداي-اق, ول وزىنە باسقا پارتياعا مۇشە بولۋعا ۇسىنىس ءتۇسىپ جاتقانىن, الايدا ول «اۋىل» پارتياسىندا قالاتىنىن جەتكىزدى. اۋىلدىڭ وتە قيىن كەزىندە باسىمىز قوسىلعان. ءابدىجامىل نۇرپەيىسوۆ, مارقۇمدار زەينوللا قابدولوۆ, زەينوللا سەرىكقاليەۆ, كوپتەگەن عالىمدار وسى پارتيانىڭ توڭىرەگىنە توپتاستى. اۋىل دەگەن تاس قاراڭعى, كەبەك جەپ, لاي سۋ ءىشىپ وتىرعان كەزىندە جانىمىز شىرقىراپ, اراشاشى بولدىق. اۋىلدان شىققانداردىڭ بارلىعى «اۋىلعا» مۇشە بولۋى كەرەك. ماسەلە, پارتيانىڭ جەڭىسكە جەتىپ, ەرتەڭ پارلامەنتتە وتىرۋىندا عانا ەمەس. ءوز باسىم «اۋىلدىڭ» بەدەلى ءۇشىن كۇرەسەمىن. قولىمنان كەلگەنشە. ال ەندىگى پارلامەنت ماجىلىسىنە مۇشە بولاتىن ادامداردىڭ ىشىندە قۇرىعاندا ۇلتتىڭ مۇددەسىن قورعايتىن 10 ادام كەرەك. «اۋىل» پارتياسى سايلاۋدا ءوتۋ ءۇشىن عانا قۇرىلماعان بولاتىن. ماعان ۇناعانى دا سول ەدى. سايلاۋ وتكەننەن كەيىن كەلەسى جىلى قۇرىلدى. ەگەر دە ەلگە, اۋىلعا دەگەن بەلگىلى ءبىر باعدارلامالار جۇزەگە اسىپ جاتسا, بۇل, ءسوز جوق, «اۋىل» پارتياسىنىڭ جەتىستىگى, دەدى د.يسابەكوۆ.
سەزد كەزىندە جازۋشىدان باسقا, پارتيانىڭ جەرگىلىكتى ءوڭىرلەردەگى وكىلدەرى دە ءسوز الىپ, پارتيانىڭ ماقسات-مۇددەلەرى جايىندا تاراتىپ ايتىپ بەردى. بۇل ماقسات-مۇددەلەر «جەر – ونى وڭدەيتىن شارۋا ادامدارىنا بەرىلۋى ءتيىس», «ۇرپاقتار ساباقتاستىعى – قازاقستان دامۋى», «مەملەكەتتىك ءتىل – مەملەكەت تۇعىرى», «حالىق دەنساۋلىعى – قازاقستاننىڭ باستى قۇندىلىعى», «قازاقستان ازاماتتارى الاڭسىز ءومىر ءسۇرۋى ءتيىس» دەگەن ۇستانىمدارعا سايدى.
سەزد سوڭىندا پارتيا مۇشەلەرى سايلاۋالدى تۇعىرنامانى جانە پارتيا اتىنان سايلاۋعا ءتۇسەتىن كانديداتتاردىڭ ءتىزىمىن بەكىتتى. 15 قاڭتاردا وتەتىن سايلاۋعا قازاقستاننىڭ سوتسيال-دەموكراتيالىق «اۋىل» پارتياسىنان 23 ادام قاتىسادى.
ءلايلا ەدىلقىزى.
استانا.