وبلىستا «تۋعان جەر» جوباسى بويىنشا شىمكەنت قالاسىندا قۇنى 300 ملن تەڭگە بولاتىن «قوس انا» بالاباقشاسى بوي كوتەرىپ, تولە بي اۋدانىندا 100 ملن تەڭگەگە كوشەلەردى, بايدىبەك اۋدانىندا 340 ملن تەڭگەگە «دومالاق انا» كەسەنەسىن اباتتاندىرۋ جۇمىستارى جۇرگىزىلىپ, كەسەنە جانىنان كوناقۇي سالىندى.
ال وتىرار اۋدانىندا قۇنى 80 ملن تەڭگە بولاتىن بالاباقشا, 50 ملن تەڭگەگە ەتنواۋىل, 56 ملن تەڭگەگە «ارداگەرلەر» ساياباعى سالىنسا, ورداباسى اۋدانىندا 45,3 ملن تەڭگەگە قايىرىمدىلىق كومەك كورسەتىلدى. بۇل يگى ىستەردىڭ بارلىعى كاسىپكەرلەر, دەمەۋشىلەر تاراپىنان جۇزەگە اسىرىلۋدا. ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ جاريالانعانىنا ءبىر جىل تولۋىنا وراي شىمكەنتتە وتكەن «ۇلت تاريحىنداعى ۇلى بەلەس» اتتى رەسپۋبليكالىق جيىندا وبلىس اكىمى ج.تۇيمەباەۆ جوعارىدا ايتىلعان جۇمىستار باعدارلاما شەڭبەرىندە ىسكە اسىرىلىپ جاتقان وڭىرلىك جوبالاردىڭ ءبىر پاراسى عانا ەكەنىن اتاپ ءوتتى. «ەلباسى ۇسىنىپ وتىرعان رۋحاني جاڭعىرۋدىڭ نەگىزگى سيپاتى وتكەن مەن بولاشاقتى ۇيلەستىرە جۇزەگە اسىرۋ بولعاندىقتان, ءبىز مۇنى ەكى ارنادا ىسكە اسىرۋىمىز قاجەت. ونىڭ ءبىرى – عالامدىق جەتىستىكتەردى وزىمىزگە اكەلۋ ارقىلى جاھاندىق دامۋدا ءوز ۇلەسىمىزدى الۋ. ەكىنشىسى – وتكەن تاريحىمىز بەن داستۇرىمىزدەگى اسىل قۇندىلىقتارىمىزدى قايتا جاڭعىرتىپ, ۇلتتىق بىرەگەيلىگىمىزدى ساقتاپ قالۋ. وسى ورايدا, ەلباسى اۋقىمى كەڭەيىپ, «تۋعان ەلگە» ۇلاساتىن «تۋعان جەر» باعدارلاماسىن قولعا الۋدى ۇسىنىپ, ونى جۇزەگە اسىرۋدىڭ ناقتىلى جولدارىنا دەيىن كورسەتىپ بەردى», دەدى وبلىس اكىمى. وڭىردە «تۋعان جەر» جوباسى بويىنشا 31 ملرد 467 ملن تەڭگەنى قۇرايتىن 577 نىسان بوي كوتەرگەن. ولاردىڭ قاتارىندا ءبىلىم, دەنساۋلىق, سپورت, مادەنيەت جانە الەۋمەتتىك عيماراتتار بار.
«رۋحاني جاڭعىرۋ» باعدارلاماسىن جۇزەگە اسىرۋ ماقساتىندا قۇرىلعان وڭىرلىك جوبالىق كەڭسە تاراپىنان 46 جوبا, 168 ءىس-شارا ازىرلەنىپ, جۇزەگە اسىرىلۋدا. ال باعدارلامانىڭ ءمان-ماڭىزىن ءتۇسىندىرۋ, ناسيحاتتاۋ شاراسىنا 1 ميلليوننان استام ادام قامتىلعان. ايرىقشا ماڭىزى بار تاريحي-مادەني ساۋلەتتىك جانە ارحەولوگيا ەسكەرتكىشتەرىنىڭ فوتوالبومى قازاق, ورىس, اعىلشىن تىلدەرىندە جاسالىنىپ, تاراتىلعان. وبلىس اكىمىنىڭ مالىمدەۋىنشە, تاريحي-مادەني مۇرالاردى ناسيحاتتاپ, جاستارعا پاتريوتتىق تاربيە بەرۋ ماقساتىندا تۇسىرىلگەن «كونە جەتىگەننىڭ سىرى» اتتى 10 سەريالى تەلەحيكايا, «كيەلى قازىعۇرت», «وتىراردى قورعاۋ», «كۇش اتاسى – قاجىمۇقان» اتتى انيماتسيالىق جانە « ۇلى جىبەك جولىنداعى ەسكەرت- كىشتەر» دەرەكتى فيلمدەرى كوپشىلىك نازارىنا ۇسىنىلدى. ال سايرام اۋدانىنداعى «حانقورعان» ارحەولوگيالىق قالاشىعىنا قازبا, رەستاۆراتسيا جانە كونسەرۆاتسيا جۇمىستارى جۇرگىزىلىپ, اشىق اسپان استىنداعى مۋزەي اشىلماق. سايرامنان شىققان 3 سايرامي, وتىراردان شىققان 30 ءال-فارابي, ياسسىدان شىققان 5 ءياساۋيدىڭ تۋىندىلارى قازاق تىلىنە اۋدارىلىپ, جاريالاناتىن بولادى. الدا اتقارىلاتىن ىستەردىڭ تاعى ءبىرى – «ورداباسى تاۋى» قورىق مۇراجايىنا ەل بىرلىگىن دارىپتەگەن قازاق حالقىنىڭ تولە, قازىبەك, ايتەكە بيلەرىنە مونۋمەنت ورناتىلادى. سونداي-اق بيىل «رۋحاني جاڭعىرۋ» باعدارلاماسى اياسىندا وڭتۇستىكتىڭ كونە قالالارى, تاريحي تۇلعالارى, تابيعاتى, كيەلى ورىندارى, ادەت-عۇرىپتارى تۋرالى 17 كىتاپ شىعارۋ, 10 فيلم جانە 4 انيماتسيالىق فيلم ءتۇسىرۋ جۇمىستارى باستالعان.
جالپى, ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا وڭتۇستىك قازاقستان وبلىسىندا ءبىر جىل ىشىندە 4370 ءىس-شارا ۇيىمداستىرىلدى. باعدارلامانى ىسكە اسىرۋ ءۇشىن ءىس-شارالار جوسپارى ازىرلەنىپ, وڭىرلىك كوميسسيا جانە ساراپشىلار كەڭەسى قۇرىلعان بولاتىن. ساراپشىلار كەڭەسىنىڭ قۇرامىندا زيالى قاۋىم, عالىمدار, ۇكىمەتتىك ەمەس ۇيىمدار وكىلدەرى, بارلىعى 20 ادام جۇمىس ىستەدى. وبلىس اكىمدىگىنىڭ مالىمەتىنشە, «رۋحاني جاڭعىرۋ» باعدارلاماسىن ىسكە اسىرۋ بويىنشا ءوڭىر رەسپۋبليكادا الدىڭعى قاتارعا شىققان.
عالىمجان ەلشىباي, «ەگەمەن قازاقستان»
شىمكەنت