«قازاق ەلى» كوپسەريالى تاريحي-درامالىق كينوتۋىندىنىڭ العاشقى 10 سەرياسى وتكەن جىلدىڭ باسىندا كورەرمەن قاۋىمعا ۇسىنىلعان بولاتىن. ەندى سەريالدىڭ ءىى ماۋسىمى «التىن تاق» دەگەن اتاۋمەن تۇسىرىلمەك.
وڭتۇستىك قازاقستان وبلىسىنىڭ اكىمى ج.تۇيمەباەۆ ءتۇسىرىلىم توبىمەن كەزدەسۋىندە تاريحي سەريالدىڭ ۇرپاق تاربيەسىندەگى ماڭىزدىلىعى مەن وڭتۇستىك ءوڭىرىنىڭ تاريحي مانىنە توقتالدى. باسقوسۋعا تۋىندىنىڭ قويۋشى-رەجيسسەرى رۇستەم ابدىراشەۆ, باس پروديۋسەر ارمان اسەنوۆ باستاعان شىعارماشىلىق توپ قاتىستى. ءفيلمنىڭ قويۋشى-رەجيسسەرى رۇستەم جاراسقان ۇلى كەزدەسۋ بارىسىندا تاريحي شىعارمانىڭ وڭىردەگى تۇسىرىلىمىنە قولداۋ كورسەتۋ قاجەتتىگىن جەتكىزدى. بۇل ورايدا وبلىس اكىمى كيىز ۇيلەر, ات, كونە دەكوراتسيالار, مەديتسينالىق جانە قاۋىپسىزدىك سىندى كومەكتىڭ بارلىعى جاسالىناتىنىن جەتكىزدى. ءتيىستى سالا, مەكەمە باسشىلارىنا تاپسىرما بەردى.
«دەگەنمەن كينودان وسى ءوڭىردىڭ تالانتتى ارتىستەرىن دە كورگىمىز كەلەدى. مۇندا كاسىبي دەڭگەيدەگى ونەر ادامدارى جەتكىلىكتى. اتالعان فيلمگە جەرگىلىكتى ارتىستەردى قاتىستىرۋدى ۇسىنامىن», - دەدى ج.تۇيمەباەۆ.
تۋىندىنىڭ وڭتۇستىكتەگى ءتۇسىرىلىمى 25 ساۋىردەن 4 شىلدەگە دەيىن جالعاسادى. تۇلكىباس, تولە بي اۋداندارى مەن ارىس, اقسۋ وزەندەرىنىڭ بويىندا جانە تۇركىستان قالاسىنداعى «ازىرەت سۇلتان» مەملەكەتتىك تاريحي-مادەني قورىق-مۇراجايىندا «كەرەي حاننىڭ اۋىلى», «حان ورداسى» سىندى دەكوراتسيالار جاسالىنباق.
ايتا كەتەلىك, "قازاق ەلى" كوركەم سەرياسىنىڭ جوباسى ەلباسى ن.نازارباەۆتىڭ باستاماسىمەن قازاق حاندىعىنىڭ 550 جىلدىعىنا وراي قولعا الىنعان بولاتىن. فيلمدە قازاق حاندىعىنىڭ قازىعىن قاققان كەرەي مەن جانىبەك تۇسىنداعى XV عاسىرداعى كوشپەندى قازاق مادەنيەتى سيپاتتالادى. العاشقىدا رۇستەم ابدىراشەۆ ءفيلمنىڭ 20 سەرياسىن بىردەن تۇسىرگىسى كەلدى. الايدا قارجى جەتپەۋىنە بايلانىستى 10 سەرياسى كەيىنگە قالدىرىلعان-دى. دەگەنمەن سول كەزدە قالعان ون سەريانىڭ ءبىرازى ءتۇسىرىلىپ ۇلگەرىلگەنى دە ايتىلعان بولاتىن.
ەركىن دوسىمباي,
وڭتۇستىك قازاقستان وبلىسى