الماتى قالاسىندا «كوشىپ-قونۋشىلار اراسىنداعى تۋبەركۋلەزدى جانە كوپتەگەن دارىلەرگە كونبەيتىن تۋبەركۋلەزدى (كدك تب) جانە تب/ايتۆ-نى ترانسشەكارالىق باقىلاۋ مەن ەمدەۋگە ارنالعان ءىس-شارا» باعدارلاماسىنا قورىتىندى جاساۋ بويىنشا دوڭگەلەك ۇستەل وتكىزىلدى.
دۇيسەنبى كۇنى «Project HOPE – The People-to-People Health Foundation, Inc.» (Project HOPE) حالىقارالىق ۇكىمەتتىك ەمەس گۋمانيتارلىق ۇيىمنىڭ قولداۋىمەن ءۇش جىلدىڭ ىشىندە 44 000 استام ەڭبەك ەتۋشى كوشىپ-قونۋشى قازاقستاندا تۋبەركۋلەزگە زەرتتەلىپ, قارالعانى جايلى مالىمەت تاراتتى.
ءىس-شارا ۋاقىتىندا «قازاقستان رەسپۋبليكاسىنداعى تۋبەركۋلەز كۇرەستىڭ 2014-2020 جىلدارعا ارنالعان كەشەندى جوسپارى» باعدارلاماسىنىڭ ناتيجەلەرى ۇسىنىلدى.
جوعارىداعى كورسەتكىشتەردەن بولەك, ۇكىمەتتىك قۇرىلىمدارمەن, حالىقارالىق ۇيىمدارمەن, ۇكىمەتتىك ەمەس ۇيىمدارمەن جانە مەديتسينالىق مەكەمەلەرمەن ءتيىمدى ىنتىماقتاستىق تاجىريبەسى ورتاعا سالىندى. باعدارلاماعا تارتىلعان دارىگەرلەر مەن سەرىكتەستىك ۇەۇ وكىلدەرى ەلىمىزدە ەڭبەك ەتىپ جۇرگەن كوشىپ-قونۋشىلارمەن جۇمىستىڭ ەرەكشەلىكتەرى تۋرالى باياندادى.
«باعدارلامانىڭ نەگىزگى ماقساتى – تۋبەركۋلەز دياگنوستيكاسى مەن ەمدەۋگە قولجەتىمدىلىكتى شەكتەيتىن كەدەرگىلەردى جويۋ. ەڭبەك ەتۋشى كوشىپ-قونۋشىلار ءۇشىن قولجەتىمدىلىكتى قامتاماسىز ەتۋ, تۋبەركۋلەزدى ترانسشەكارالىق باقىلاۋ مەن ەمدەۋ بويىنشا ءتيىمدى تەتىكتەر قۇرۋ. اتاپ ايتقاندا, كوشىپ-قونۋشىلار ءۇشىن تۋبەركۋلەزگە تەكسەرىلۋدىڭ قولجەتىمدىلىكتى قامتاماسىز ەتۋ ەسەبىنەن 1600-دەن استام وكپە اۋرىنا شالدىققان ناۋقاستار انىقتالدى. ەكىنشى ناتيجە دە ماڭىزدى – بۇل جوبا بارلىق سەرىكتەستەرىنىڭ اراسىندا قالىپتاسقان كونسترۋكتيۆتى ىنتىماقتاستىق پەن اتالمىش ماسەلەنى اناعۇرلىم ءتيىمدى شەشۋگە مۇمكىندىك بەرەدى», – دەدى جاھاندىق قور باعدارلاماسىنىڭ مەنەدجەرى, قازاقستانداعى Project HOPE وكىلى باحتيار بابامۋرادوۆ.
باعدارلاما بارىسىندا 60-تان استام ەمحانا مەن 10 تۋبەركۋلەزگە قارسى ديسپانسەرلەردە كوشىپ-قونۋشىلارعا قايىرىمدى مەديتسينالىق ۇيىمدار جەلىسى قالىپتاستىرىلدى.
سونداي-اق 44 مىڭنان استام ميگرانت ءۇشىن تۋبەركۋلەزگە تەكسەرىلۋگە قولجەتىمدىلىك قامتاماسىز ەتىلدى جانە 1600-دەن استام وكپە اۋرى ايقىندالدى.
باعدارلامانى ەنگىزۋ تاجىريبەسى نەگىزىندە «قر كوشىپ-قونۋشىلارىنىڭ اراسىندا تۋبەركۋلەزدى باقىلاۋ بويىنشا نۇسقاۋلىق» ازىرلەنىپ, رەسمي تۇردە بەكىتىلدى.
Project HOPE ۇيىمداستىرعان ءىس-شاراعا قر دەنساۋلىق ساقتاۋ مينيسترلىگى, قر دەنساۋلىق ساقتاۋ مينيسترلىگى ۇلتتىق فتيزيوپۋلمونولوگيا عىلىمي ورتالىعى, ءىىم كوشى-قون قىزمەتى, جاھاندىق قور, حالىقارالىق كوشى-قون ۇيىمى, USAID, STOP TB سەرىكتەستىگىنىڭ جانە باسقا دا حالىقارالىق ۇيىمداردىڭ, سونداي-اق سەرىكتەس ۇەۇ مەن مەديتسينالىق مەكەمەلەردىڭ وكىلدەرى قاتىستى.
ايناش ەسالي, «ەگەمەن قازاقستان»