ماڭعىستاۋ وبلىسى مۇنايلى اۋدانى, داۋلەت اۋىلىندا قازاق كۇرەسىنەن 2004-2005 جىلدارى تۋعان جاسوسپىرىمدەر اراسىندا اقيىق اقىن تولەگەن ايبەرگەنوۆتى ەسكە الۋعا ارنالعان رەسپۋبليكالىق اشىق تۋرنير ءوتتى.
تۇڭعىش رەت ۇيىمداستىرىلىپ وتىرعان تۋرنيرگە وڭتۇستىك قازاقستان وبلىسى, اتىراۋ, اقتوبە, قىزىلوردا, ماڭعىستاۋ ءوڭىرى جانە استانا قالاسىنان 6 كوماندا قاتىسىپ, بارلىعى 9 سالماق دارەجەسى بويىنشا 220 سپورتشى چەمپيوندىق اتاققا تالاستى.
اشىق تۋرنير «بايتاق مەكەنىم» قوعامدىق قورى جانە مۇنايلى اۋدانى «داۋلەت اۋىلى بالالار جانە جاسوسپىرىمدەر سپورت مەكتەبى» مەملەكەتتىك مەكەمەسىنىڭ ۇيىمداستىرۋىمەن ءوتتى.
ءتۋرنيردى ۇيىمداستىرۋشىنىڭ ءبىرى, قازاق كۇرەسىنەن باپكەر قايرات يمانعازيەۆتىڭ ايتۋىنشا, جارىستىڭ ماقساتى - اقيىق اقىن تولەگەن ايبەرگەنوۆتى ەسكە الۋ, جاسوسپىرىمدەر اراسىندا قازاق كۇرەسىن دامىتۋ, سالاۋاتتى ءومىر سالتىن ناسيحاتتاۋ, سپورتشىلاردىڭ شەبەرلىگىن ارتتىرىپ, ۇزدىكتەردى انىقتاۋ بولىپ تابىلادى.
- تۋرنيرگە قاتىسۋشىلار جاقسى دايىندىقپەن كەلگەن. ولاردىڭ اراسىندا بولاشاعىنان زور ءۇمىت كۇتتىرەتىندەر كوپ. اسىرەسە سىر ءوڭىرىنىڭ سپورتشىلارى كورسەتكەن ونەرگە ءتانتى بولدىق. تورەشىلەر ءادىل باعالارىن بەردى دەپ ويلايمىن. سپورتشىلار نەمەسە باپكەرلەر اراسىندا ءوزارا تۇسىنىسپەۋشىلىكتەر تۋىنداعان جوق. الدا ءتۇرلى جارىستار كۇتىپ تۇر, كوپ ۇزاماي سولارعا دايىندىقتى باستايمىز. جالپى ءبىزدىڭ وبلىستا قازاق كۇرەسى بۇرىننان جاقسى دامىعان, بولاشاقتا ازيا جانە الەم بىرىنشىلىكتەرىندە توپ جاراتىندار اۋىلدان شىعادى دەپ سەنەمىن جانە بولاشاق چەمپيونداردى دايىنداۋدا جۇمىستانا بەرەمىز», - دەدى ول.
تۋرنيردە بارلىعى 36 مەدال ساراپقا سالىندى, ونىڭ 9 التىن, 9 كۇمىس جانە 18 قولا. سونداي-اق, جەڭىس تۇعىرىنان كورىنگەن ءاربىر سپورتشىعا جەكە كۋبوكتان تابىستالدى. جەڭىمپازدار مەن جۇلدەگەرلەر ديپلوم, مەدال, كۋبوكپەن ماراپاتتالدى. ايتا كەتۋ كەرەك, جارىسقا قاتىسۋشىلار تاراپىنان رەسپۋبليكا كولەمىندە تۇڭعىش رەت ماڭعىستاۋدان باستاۋ العان قازاق كۇرەسىنەن اقيىق اقىن تولەگەن ايبەرگەنوۆتى ەسكە الۋ ءتۋرنيرىن جىلدا وتكىزىپ تۇرۋ ۇسىنىلدى. ءوز كەزەگىندە «بايتاق مەكەنىم» قوعامدىق قورى بۇل باستامانى بارىنشا قولدايتىنىن جەتكىزدى.
گۇلايىم شىنتەمىرقىزى, «ەگەمەن قازاقستان»