بۇگىندە ەلىمىزدە ءوندىرىس جانە اۋىل شارۋاشىلىعى سيپاتىنداعى جارمەڭكەلەر ءجيى وتكىزىلىپ ءجۇر. بوس جۇمىس ورىندارى جارمەڭكەسى دەگەن ۇعىم دا ورنىعا باستادى. اقتوبەدە سولاردىڭ بىردە-بىرىنە ۇقسامايتىن «سەرپىن» جارمەڭكەسى وتكىزىلدى. ونى وزگە جارمەڭكەلەردەن دارالاپ تۇرعانى – وعان سوتتالعانداردىڭ قولىنان شىقان 500-دەن استام قولونەر بۇيىمدارى قويىلعانىندا.
كوزدىڭ جاۋىن الىپ, كورگەن جاندى تاڭعالدىراتىن دۇنيەلەر اقتوبە قالاسىنداعى قىلمىستىق اتقارۋ جۇيەسى مەكەمەسىندە ازىرلەنگەن. قايسىسىن قالاپ, ساتىپ العىڭىز كەلەدى – پاتشا كوڭىلىڭىز ءبىلسىن. شەبەر قولدىڭ ىزدەرى ايقىن كورىنىپ تۇرعان شەدەۆرلەر اعاش پەن مەتالدان, وزگە دە قۇرىلىس ماتەريالدارىنان جاسالعان. سونداي-اق تىگىن ونىمدەرىنىڭ جۇزدەگەن تۇرىنەن جوبالانعان, قاي-قايسىسى دا ءساندى ءارى ساپالى دەۋگە بولادى. «سەرپىن» جارمەڭكەسىنە كەلگەندەر ءۇي مەن تۇرمىسقا قاجەتتى كيىم-كەشەكتەردى, ەسىكتەر مەن بەسىكتەردى, كادەسىيلار مەن قوبديشالاردى, قازاقشا ازىرلەنگەن ەت سالاتىن استاۋلاردى, ناردى مەن شاحمات تاقتالارىن اتتاي قالاپ ساتىپ الىپ جاتتى.
شەبەردىڭ قولى ورتاق دەمەي مە دانا حالقىمىز. «ەڭبەك» رمك-گە قاراستى «ەڭبەك-اقتوبە» فيليالىندا جۇمىس جاساپ جۇرگەندەردىڭ ەڭبەگى قالا تۇرعىندارىنىڭ ءبىر كادەسىنە جاراپ جاتسا, بۇعان تەك قول سوعۋ كەرەك شىعار.
ەكىنشى ءبىر وي, بۇل كورىنىستىڭ ءوزى ەڭبەكپەن تۇزەۋ مەكەمەسىنىڭ جازاسىن وتەپ جۇرگەندەردى ەڭبەككە تارتا ءبىلۋىنىڭ وڭ مىسالى بولىپ تابىلادى.
رەسپۋبليكا وڭىرلەرىندەگى «ەڭبەك-اقتوبە» سيپاتىنداعى قۇرىلىمدار ۇكىمەتكە قوماقتى سالىق كولەمىن تولەپ وتىرعانىن ايتا كەتكەن ءجون. ءتىپتى بۇل كاسىپورىندا جۇمىس ىستەيتىندەر سوتتالدى دەمەسەڭىز, كادىمگى ەركىندىكتەگى ەر-ازاماتتار سەكىلدى جالاقى الاتىنىنىڭ ءوزى نەگە تۇرادى. بۇعان وڭىردەگى ەڭبەكپەن تۇزەۋ مەكەمەلەرىنىڭ جانىندا ەكى كوللەدج بار ەكەنىن قوسا ايتقان ورىندى. مۇندا 150-دەن استام سوتتالۋشى جۇمىسشى ماماندىعى بويىنشا ءبىلىم الىپ ءجۇر ەكەن.
ەندەشە وسىناۋ جاعىمدى جايتتاردىڭ ءوزى اياعىن شالىس باسقان جانداردىڭ قالىپتى ومىرگە قايتا ورالۋىنىڭ وڭ بەلگىسى بولا الادى دەمەكپىز.
تەمىر قۇسايىن, «ەگەمەن قازاقستان»
اقتوبە