ونوماستيكا ماسەلەسىندەگى وڭ ءۇردىس

دەسەك تە تاسباقا ىلبىڭمەن بولسا دا كوشەلەردىڭ اتىن اۋىستىرۋ, ەلدى مەكەندەردىڭ بۇرىنعى, تاريحي اتاۋلارىن قايتارۋ جۇمىستارى جۇرگىزىلىپ جاتقانىن دا جوققا شىعارۋعا بولماس. جاقىندا وسكەمەندە وتكەن وبلىستىق قوعامدىق كەڭەستىڭ كەزەكتى وتىرىسىندا وبلىستىق تىلدەردى دامىتۋ جونىندەگى باسقارما باسشىسىنىڭ مىندەتىن اتقارۋشى روزا تولەمىسوۆا جۇرت كوڭىلىن قۋانتقان جاعىمدى جاڭالىقتى جەتكىزدى. ونىڭ ايتۋىنشا, جۋىقتا وسكەمەندەگى 21 كوشەگە قازاقشا اتاۋلار بەرىلەدى. ماسەلەن, شاھارداعى مەلزاۆود تۇرعىن ءۇيى ماڭىنداعى №1 كوشە – اقتوعان, مەنوۆنوە اۋىلىنا اينالما اۆتوكولىك جولى ماڭىنداعى №1 كوشە – كەرۋەن, №2 كوشە – شۇعىلا, №3 كوشە – سايالى, №4 كوشە – اقنيەت, №5 كوشە – ىنتىماق, №6 كوشە – كوكجيەك, ۆىسوكوۆولتنايا 57 كوشەسى ماڭىنداعى №1 كوشە – ورماندى, №2 كوشە – شيەلى, №3 كوشە – شۋاقتى, №4 كوشە – كەرەمەت, №5 كوشە – راۋان, №6 كوشە – اقبۇلاق, ا.كۇلەنوۆ اتىنداعى 16 تۇرعىن اۋدانداعى №1 كوشە – جوتالى, باستاۋ كوشەسى ماڭىنداعى №1 كوشە – قاينار, 19 جانە 20 تۇرعىن اۋداندار اراسىنداعى №1 داڭعىل – بەيبىتشىلىك داڭعىلى, 23 تۇرعىن اۋدانداعى №1 كوشە – بوستاندىق, احمەر اۋىلىنداعى №1 كوشە – جاڭاجول, №2 كوشە – كۇنباتىس, №3 كوشە ورنەك دەگەن اتاۋلارعا يە بولماق. ال وبلىس ورتالىعىنىڭ 19 تۇر­عىن اۋدانىنداعى كارل ماركس داڭ­عى­لى قازىبەك بي داڭعىلى بولىپ قاي­تا اتالماق. «وسكەمەن قالاسىنىڭ اكىم­دى­گىنە داڭعىلعا قازىبەك ءبيدىڭ ەسىمىن بەرۋ تۋرالى ۇسىنىس وبلىستىق سوتتىڭ توراعاسىنان, قالالىق ارداگەرلەر جانە اقساقالدار كەڭەستەرىنەن تۇسكەن بولاتىن. داڭعىلدىڭ بويىندا ورنالاسقان 41 كوپ قاباتتى تۇرعىن ۇيدە بەس مىڭعا جۋىق حالىق تۇرادى. اتالعان اۋماقتا تۇراتىن تۇرعىندار دا بۇل ۇسىنىسقا قولداۋ ءبىلدىردى. قالالىق ءماسليحات دەپۋتاتتارى تاراپىنان دا ءبىراۋىزدان قولداۋ تاپتى», – دەيدى ر.تولەمىسوۆا.

سونىمەن قاتار قوعامدىق كەڭەس وتىرىسىندا بورودۋليحا اۋدانىنىڭ ەكى, ۇلان اۋدانىنىڭ ءبىر اۋىلىنىڭ اتاۋلارى اۋىستىرىلاتىنى جايىندا دا ايتىلدى. بورودۋليحاداعى پرولەتاركا اۋىلىنا اقشي, ۆوزنەسەنوۆكا اۋىلىنا قىزىلتاي, ال ۇلان اۋدانىنداعى ەل اۋزىندا «17 شاقىرىم» اتالىپ كەلگەن اۋىلعا سارىوزەك سىندى تاريحي اتاۋلارى قايتا بەرىلمەك.

ەرتەرەكتە بەلاعاش اتالعان بورو­دۋ­ليحا اۋدانى جايىندا ءسوز قوزعال­عان سوڭ اتاۋى اۋىستىرىلاتىن ەكى اۋىلدىڭ بۇ­گىنگى جاعدايى قانداي دەگەن ويمەن اۋ­دان اكىمىنىڭ سايتىنا كوز جۇگىرتكەن ەدىك. بايقاعانىمىز, بورودۋليحا اۋدانىندا 18 اۋىلدىق وكرۋگ بار بولسا, سونىڭ 13-ءنىڭ اتاۋى ورىسشا ەكەن. ستەپنوي اۋىلدىق وكرۋگىنە قارايتىن ۆوز­نەسەنوۆكا اۋىلىندا بۇگىندە 43 ادام قالىپتى. ال ءجاڭاشۇلبى اۋىلدىق وكرۋگىنە قارايتىن پرولەتاركا اۋىلىندا 161 ادام تۇراتىن كورىنەدى. ويلاپ قارا­ڭىز, سوندا اۋىلدىڭ تاريحي اتاۋى بو­لارى بولىپ, بوياۋى ءسىڭىپ, ەلدى مەكەن قۇرۋدىڭ از-اق الدىندا قالعاندا بە­رى­لمەك. بۇدان پايدا قانشا؟ «جىلدان- جىل­عا حالىق سانى ازايىپ, قۇرىپ بارا جات­قان اۋىلدارعا اتاۋ بەرگەننەن گورى, جو­عارىدا اتالعان 13 اۋىلدىق وكرۋگتىڭ اتىن نەگە وزگەرتپەسكە؟» دەپ ويلايسىڭ. اۋدانداعى ادامدار بۇل تۋرالى نە ويلايدى ەكەن؟!

ازامات قاسىم, «ەگەمەن قازاقستان»

شىعىس قازاقستان وبلىسى