الجيردە اسكەري ۇشاق اپاتقا ۇشىرادى. مەملەكەتتىڭ قورعانىس مينيسترلىگىنىڭ حابارلاۋىنشا, ۇشاقتا 257 ادام بولعان. ولاردىڭ ەشقايسىسى ءتىرى قالماعان. ولاردىڭ 247-ءسى اسكەريلەر مەن ولاردىڭ وتباسى مۇشەلەرى بولسا, قالعان ون ادام ەكيپاج مۇشەلەرى. قايتىس بولعاندار تۋرالى اقپارات ناقتىلانىپ جاتىر.
وقيعا بۋفاريك اۋەجايىنا جاقىن ماڭداعى بليدا اۋىلىندا بولعان. يل-76 اسكەري ۇشاعى بۋفاريكتەگى اسكەري بازانىڭ اەرودرومىنان ۇشقان سوڭ الجير قالاسىنىڭ وڭتۇستىگىنەن 50 كم جەردە قۇلاعان. اپات جەرگىلىكتى ۋاقىت بويىنشا تاڭعى 8-دە بولعان. ۇشاق قۇلاعان سوڭ بىردەن ءورت شىققان. ۇشاقتىڭ قۇلاۋ سەبەبى ءالى بەلگىسىز. Algérie24 اگەنتتىگىنىڭ حابارلاۋىنشا, ۇشاق مەملەكەتتىڭ سولتۇستىگىندەگى بليدا قالاسىنان وڭتۇستىك-باتىسقا بەت العان. جولاۋشىلاردىڭ كوپشىلىگى اسكەري قىزمەتكەرلەر ەكەنى حابارلانىپ جاتىر.
قىرعىزستان پرەزيدەنتى تۇركياعا رەسمي ساپارمەن باردى
9-10 ءساۋىر كۇندەرى قىرعىزستان پرەزيدەنتى سوورونباي جەەنبەكوۆ رەسمي ساپارمەن تۇركياعا بارىپ, رەجەپ تايپ ەردوعانمەن كەزدەستى. پرەزيدەنتتەر كەڭەيتىلگەن جانە شاعىن قۇرامدا ەكى ەل اراسىنداعى ىنتىماقتاستىق پەن ونى نىعايتۋ باعىتتارى تۋرالى تالقىلادى.
مەملەكەت باسشىلارىنىڭ ايتۋىنشا, تۇركيا مەن قىرعىزستان اراسىنداعى ساۋدا اينالىمى جىلىنا 1 ملرد دوللاردى قۇرايدى. سونىمەن قاتار 1992 جىلدان بەرى قىرعىزستاننىڭ 3500 ستۋدەنتى تۇركيادان ءبىلىم ستيپەندياسىن العان. رەجەپ تايپ ەردوعاننىڭ ايتۋىنشا, «ماناس» قىرعىز-تۇرىك ۋنيۆەرسيتەتى ءبىلىم سالاسىنداعى ورتاق ءساتتى جوبا.
كەزدەسۋ بارىسىندا قىرعىزستان پرەزيدەنتى تۇركىتىلدى مەملەكەتتەر كەڭەسىنىڭ كومەگىمەن كوپتەگەن جوبالاردىڭ ءساتتى ىسكە اسىرىلعانىن اتاپ ءوتتى. ونىڭ ىشىندە كوشپەندىلەردىڭ بۇكىلالەمدىك ويىندارى, استاناداعى حالىقارالىق تۇركى اكادەمياسى, باكۋدەگى تۇركى مادەنيەتى مەن حالقىنىڭ قورى سەكىلدى جوبالار بار.
ددسۇ حيميالىق شابۋىل بولعان جەردى كورسەتۋدى تالاپ ەتتى
دۇنيەجۇزىلىك دەنساۋلىق ساقتاۋ ۇيىمى سيرياداعى دۋما قالاسىنا ەش كەدەرگىسىز كىرۋگە رۇقسات بەرۋدى تالاپ ەتتى. سيريا بيلىگى حيميالىق قارۋدىڭ قولدانىلۋىن جوققا شىعارعانىمەن, ۇيىم بارلىق جاعدايعا وزدەرى كوز جەتكىزگىسى كەلەتىنىن مالىمدەدى.
«شابۋىل تۋرالى تاراپ جاتقان اقپارات پەن دۋماداعى ادام شوشىرلىق سۋرەتتەر كۇننەن-كۇنگە ارتۋدا. سوندىقتان دۇنيەجۇزىلىك دەنساۋلىق ساقتاۋ ۇيىمى وسى وڭىرگە ەركىن كىرىپ, زارداپ شەگۋشىلەرگە كومەك كورسەتكەندى ءجون كورەدى. قوعامدىق دەنساۋلىق ساقتاۋ شارالارىن باعالاۋ ءۇشىن ەش كەدەرگىسىز تەز ارادا قالاعا كىرگىزۋدى تالاپ ەتەدى», دەلىنگەن ۇيىم حابارلاماسىندا.
سيرياداعى وپپوزيتسيا وكىلدەرى, قۇتقارۋشىلار مەن مەديتسينا قىزمەتكەرلەرىنىڭ ايتۋىنشا, شىعىس گۋتاداعى دۋماعا ۇكىمەت كۇشىنىڭ شابۋىلى بارىسىندا ۋلاعىش حيميالىق زاتتارعا تولتىرىلعان بومبالار قولدانىلعان. سيريا-امەريكالىق مەديتسينا قىزمەتكەرلەرىنىڭ ايتۋىنشا, مەديتسينا ورتالىقتارىنا حيميالىق زاتتاردىڭ اسەرىن كورسەتەتىن بەلگىلەرمەن 500-دەن استام ادام تۇسكەن. ازىرگە قايتىس بولعاندار سانى ناقتى اتالمادى.
تسۋكەربەرگ كەشىرىم سۇرادى
Facebook الەۋمەتتىك جەلىسىنىڭ باسشىسى مارك تسۋكەربەرگ العاش رەت اقش سەناتىنىڭ زاڭ كوميتەتى مەن ساۋدا كوميتەتتەرىنىڭ بىرلەسكەن وتىرىسىنا قاتىستى. وندا تسۋكەربەرگ سەناتورلارعا الەۋمەتتىك جەلىدەگى جەكە مالىمەتتەردىڭ قاۋىپسىزدىگى, ونىڭ ىشىندە Cambridge Analytica فيرماسىنا قاتىستى داۋ-داماي تۋرالى سۇراقتارعا جاۋاپ بەردى. ال دۇيسەنبى كۇنى ول كونگرەس وكىلدەرىنىڭ پالاتاسىندا بايانداما جاساپ, كەشىرىم سۇرادى. «كومپانيا جەكە مالىمەتتەردىڭ ساقتالۋى مەن تۇتىنۋشىلاردى قورعاۋعا قاتىستى جەتكىلىكتى شارا قولدانباعان. بىزگە جۇكتەلگەن بار جاۋاپكەرشىلىكتى بىلمەپپىز. بۇل مەنىڭ قاتەلىگىم جانە مەن بۇعان وكىنەمىن. مەن فەيسبۋكتى قۇردىم, ونى باسقارامىن جانە وسىندا بولىپ جاتقان وقيعانىڭ بارىنە جاۋاپتىمىن», دەدى مارك تسۋكەربەرگ.
شولۋدى دايىنداعان گۇلنۇر قۋانىشبەكقىزى,
«ەگەمەن قازاقستان»