اقپارات الماسۋ ارناسى

كەشە ەل تاۋەلسىزدىگىنىڭ 20 جىلدىعىنا وراي تمد-عا قا­تى­سۋشى مەملەكەتتەردىڭ قۇ­قىق قورعاۋ ورگاندارى ور­تا­لىق اقپارات قىزمەتى باسشى­لارىنىڭ كەڭەسى ءوتتى. وعان بەلارۋس, قىرعىزستان, مولدوۆا, رەسەي, تاجىكستان, وزبەكستان جانە ۋكراينا مەملەكەتتەرى قۇقىق قورعاۋ ورگاندارىنىڭ وكىلدەرى قاتىستى. بۇل كۇندە تمد ەلدەرى قۇقىق قورعاۋ ورگان­دا­رى­نىڭ ءوزارا اقپارات الماسۋى وتە ماڭىزدى كەلىسىم بولىپ تابىلادى. ويتكەنى قازىرگى حا­لىقارالىق تىعىز ىنتىماق­تاس­تىق جاعدايى قۇقىق قورعاۋ ورگاندارىنا دا جۇيەلى باي­لانىستا جۇمىس ىستەپ, اسىرەسە قاجەتتى اقپارات الماسۋدا قا­رىم-قاتىناستاردىڭ زاڭ­دى­لى­عىن رەتتەۋدىڭ ماڭىزى زور ەكەندىگىن كورسەتىپ وتىر. وسى ورايدا جوعارىدا اتالعان مەملەكەتتەر وكىلدەرى باس قوسقان كەڭەستە «حالىقارالىق اق­پارات بانكىن قالىپتاستىرۋدى ۇيىمداستىرۋ جونىندەگى كەزەكتى شارالار مەن اقپاراتتى ەلەكتروندى تۇردە الماسۋ» تاقىرىبى تالقىلاندى. مۇن­داعى نەگىزگى ماقسات ءوزارا اق­پارات الماسۋدا ونىڭ پارمەندى تەتىگىن جەتىلدىرۋ ءۇشىن شۇعىل مالىمەتتەر جەدەلدىگىن قام­تا­ماسىز ەتە الاتىن تەحنو­لو­گيالاردى پايدالانا وتىرىپ, تمد ەلدەرىنىڭ وسى زامانعى تولىققاندى اقپاراتتىق-قۇ­قىق­تىق كەڭىستىگىن جاساۋ بولىپ تابىلادى. بۇل تۋرالى كەڭەسكە قا­تىسۋشىلار الدىندا قازاق­ستان رەسپۋبليكاسىنىڭ باس پروكۋرورى اسحات داۋىلباەۆ, ىشكى ىستەر ءمينيسترى قال­مۇ­حانبەت قاسىموۆ, رەسەي فە­دە­راتسياسى ىشكى ىستەر مينيستر­لى­گىنىڭ باس اقپاراتتىق-تالداۋ ورتالىعىنىڭ باسشىسى پاۆەل ۆاجەۆ ءسوز سويلەدى. ولار مۇن­داي وڭدى قادامنىڭ دۇرىس­تىعىن جانە ورتاق قولجەتىمدى اقپاراتتىق-قۇقىقتىق كەڭىس­تىكتى قۇرۋ ءار مەملەكەتتىڭ تالاپ مۇددەسىنەن تابىلاتىندى­عىن ورتاعا سالدى. قاتىسۋ­شى­لار نازارىنا قىلمىسپەن كۇ­رەستى اقپاراتتىق قامتاماسىز ەتۋ جۇيەسىنىڭ قازاقستاندىق تاجىريبەسى, قر باس پرو­كۋ­را­تۋراسى قۇقىقتىق ستاتيستيكا جانە ارنايى ەسەپكە الۋ ءجو­نىندەگى كوميتەتىنىڭ قۇقىق قور­عاۋ ورگاندارى جۇمىسى­نىڭ ناتيجەلىلىگىن كوتەرۋگە بەل­سەندى ىقپال ەتۋگە باعىت­تالعان يننوۆاتسيالىق جوبا­لا­رىنىڭ ەنگىزىلۋ بارىسى ۇسىنىلدى. الەكساندر تاسبولاتوۆ.