مەملەكەت باسشىسى نۇرسۇلتان نازارباەۆ قازاقستان رەسپۋبليكاسىنىڭ باس پروكۋرورى اسحات داۋىلباەۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
باس پروكۋرور پرەزيدەنتتى ەلدەگى زاڭدىلىق پەن قۇقىق ءتارتىبىنىڭ جاي-كۇيى, تەرروريزم مەن ەكسترەميزم, سىبايلاس جەمقورلىق جانە بيۋدجەت قاراجاتتارىن ۇرلاۋ فاكتىلەرى بويىنشا وزەكتى قىلمىستىق ىستەردىڭ تەرگەلۋ بارىسى تۋرالى حاباردار ەتتى.
ا.داۋىلباەۆ سونداي-اق وبەكتيۆتى قۇقىقتىق ستاتيستيكانى قامتاماسىز ەتۋ, ازاماتتاردىڭ الەۋمەتتىك قۇقىقتارىن جانە مەملەكەتتىڭ سىرتقى ەكونوميكالىق سالاداعى مۇددەلەرىن قورعاۋ بويىنشا جۇرگىزىلىپ وتىرعان جۇمىستار تۋرالى باياندادى.
باس پروكۋرور ەلدەگى كريمينوگەندىك جاعداي تۇراقتى قالىپتا ەكەنىن, اۋىر جانە اسا اۋىر قىلمىستار قاتارى تومەندەگەنى بايقالىپ وتىرعانىن اتاپ ءوتتى.
كەزدەسۋدىڭ قورىتىندىسى بويىنشا مەملەكەت باسشىسى زاڭدىلىق پەن قۇقىق ءتارتىبىن قامتاماسىز ەتۋ جونىندەگى جۇمىستاردى جالعاستىرۋدى, سونداي-اق ازاماتتاردىڭ, شاعىن جانە ورتا بيزنەس وكىلدەرىنىڭ قۇقىقتارىن, مەملەكەت پەن قوعام مۇددەلەرىن قورعاۋدى كۇشەيتۋدى تاپسىردى.