«ەگەمەندى قازاقستاننىڭ» 1991 جىلعى 3-12 جەلتوقسان ارالىعىنداعى نومىرلەرىنەن توپتاما.
نۇرسۇلتان نازارباەۆ – قازاقستاننىڭ حالىق سايلاعان پرەزيدەنتى
بۇكىل حالىق ونى اق كيىزگە كوتەرىپ, اق ورداعا وتىرعىزدى
«ەگەمەن قازاقستاننىڭ» 1991 جىلعى 3 جەلتوقسانداعى ءنومىرى وسىنداي تاقىرىپپەن اشىلعان. بۇل ءنومىردە «بەلدى بۋدىق! تاۋەكەل دەدىك!» دەگەن تاقىرىپپەن نۇرسۇلتان ءابىش ۇلى نازارباەۆتىڭ ءوزىن قازاقستان حالقى پرەزيدەنت سايلاعاننان كەيىن وتكىزگەن العاشقى ءباسپاسوز كونفەرەنتسياسىنان رەپورتاج جانە «پرەزيدەنتتى وسىلاي سايلادىق» دەگەن تاقىرىپپەن قازاقستاننىڭ وبلىستارى مەن قالالارىندا سايلاۋدىڭ قالاي ءوتكەندىگى جونىندە گازەتتىڭ مەنشىكتى تىلشىلەرىنىڭ حابارلارى بەرىلگەن. پرەزيدەنتتىڭ العاشقى ءباسپاسوز كونفەرەنتسياسى الماتىداعى دوستىق ۇيىندە ۇيىمداستىرىلعان ەكەن. «وسى جەردە تالاي جىلى-ءجۇزدى كەزدەسۋ وتسە دە, بۇگىنگىنىڭ ءجونى بولەك. قازاق ءباسپاسوزى, قازاقستان جۋرناليستەرى, وداقتىق ءباسپاسوزدىڭ قازاقستاندا تىركەلگەن وكىلدەرى جانە شەتەل تىلشىلەرى بۇل جولى نۇرسۇلتان ءابىش ۇلىنا سۇراق بەرۋشى رەتىندە ەمەس, تىلەۋقور رەتىندە دە كەلدى دەسەك, وتىرىك ايتپاسپىز. ويتكەنى, ورتالىق سايلاۋ كوميسسياسىنىڭ توراعاسى قاپەر بوكەنوۆ: «داۋىس بەرۋگە رەسپۋبليكاداعى بارلىق سايلاۋشىلاردىڭ 88,24 پروتسەنتى قاتىستى, داۋىس بەرگەندەردىڭ 98,76 پروتسەنتى نۇرسۇلتان نازارباەۆتىڭ كانديداتۋراسىن جاقتادى» دەپ مالىمدەگەندە, قول سوقپاعان جۋرناليست جوق. ءوزىنىڭ اقىلدى ساياساتىمەن تەرەڭ ويلارىمەن جانە جەتى ولشەپ, ءبىر كەسىلگەن شەشىمدەرىمەن ۇلكەن بەدەلگە يە بولعان قازاقستان پرەزيدەنتى – جۋرناليستەردىڭ دە قۋانا جولىعاتىن ادامى. ۆيتسە-پرەزيدەنت بولىپ ە.م.اسانباەۆ سايلاندى, ونىڭ كانديداتۋراسىن مەملەكەت باسشىسىنىڭ ءوزى ۇسىنعان بولاتىن» دەپ باستالىپتى تاريحي ساتتەن سىر شەرتكەن بۇل رەپورتاج. حالىق سايلاعان پرەزيدەنت ءوز سوزىندە قازاق حالقىنا, قازاقستان حالقىنا, وزىنە تىلەكتەس بولعان بارلىق ادامدارعا, ەگەمەندى مەملەكەتتەردىڭ باقىلاۋشىلارىنا, جۋرناليستەر قاۋىمىنا راقمەت ايتىپتى. سايلاۋ قورىتىندىسى وزىنە جاۋاپكەرشىلىك جۇكتەيتىنىن, تۇرعىنداردىڭ 99 پروتسەنتتەن استامى داۋىس بەرگەن تەمىرتاۋ, لەنينسك سياقتى جايشىلىقتا كەز كەلگەن ادامعا داۋىس بەرە قويمايتىن كۇردەلى قالالاردىڭ سەنىمىن ريزالىقپەن اتاپ وتكەن. ءوزىنىڭ ەندى نارىق قاتىناستارىنا كوشۋگە, ەكونوميكاداعى جاعدايدى جوندەۋگە بەلسەنە كىرىسەتىنىن مالىمدەپتى. «ەگەمەندى قازاقستان» گازەتىنىڭ ءتىلشىسى: «حالقىڭىز ءسىزدى اق كيىزگە كوتەرىپ, اق ورداعا قايتادان وتىرعىزدى. سىزگە اق جول تىلەيمىز. ءبىرىنشى جارلىقتى نەدەن باستايسىز؟ ودان كەيىن ورتا ازيا مەن قازاقستان ايماعىنىڭ بىرلىگى ءۇشىن ءبىراز ارەكەت جاسادىڭىز. وسى ءتىرشىلىكتىڭ جالعاسى قالاي بولادى؟» دەپ سۇراق قويىپتى. بۇل سۇراققا پرەزيدەنت: «سايلاۋدىڭ سوڭىن كۇتپەي-اق بىرنەشە جارلىقتار ازىرلەگەنمىن. سولار جارىق كورەدى. ەڭ الدىمەن, بيۋدجەتتەن جالاقى الاتىن حالىقتىڭ جاعدايىن ويلايمىن. سولاردىڭ جالاقىسىن ارتتىرۋ جونىندە جارلىق بەرىلەدى. ويتكەنى, كاسىپورىندار ەركىن جالاقىعا كوشكەن جاعدايدا بيۋدجەتتىك مەكەمەلەردە قىزمەت ىستەيتىن قازاقستاندىقتار نارىق قىسپاعاندا قالىپ قويماۋى كەرەك. ورتا ازيا رەسپۋبليكالارىمەن كەزدەسۋلەر بولىپ جاتىر. سوڭعىسى تاشكەنتتە ءوتتى. ءتۇبى ءبىر حالىقتارمەن بايلانىس نىعايادى. سونداي-اق مۇسىلمان الەمىمەن بايلانىس جاقسارادى. مەنى اراب ەلدەرى ليگاسىنا شاقىرىپ وتىر» دەپ جاۋاپ بەرىپتى.