حالىقارالىق «تۇركىسوي» ۇيىمىنىڭ ۇيىمداستىرۋىمەن تۇركى الەمى بويىنشا «ماعجان جۇماباەۆ جىلى» انادولى ەلىندە سالتاناتتى جاعدايدا اتاپ وتىلگەنى ءمالىم.
ايتۋلى مادەني شاراعا قىزىلجار وڭىرىنەن ارنايى دەلەگاتسيا قاتىسقان بولاتىن. اقيىق اقىننىڭ 125 جىلدىعى قارساڭىندا تۇرىك اعايىندار ولەڭدەرىن جەكە جيناق ەتىپ شىعارسا, جۋىردا «كاردەش كالەملەر» كوركەم ادەبي جۋرنالىنىڭ ءبىر سانى ءومىرى مەن شىعارماشىلىعىنا ارنالىپتى.
«قازاقستان مەن تۇركيا–ەجەلدەن باۋىرلاس, تاعدىرلاس ەلدەر. ەكى تاراپتىڭ ىنتىماقتاستىعى رۋحاني سالادا دا بىتە قايناسىپ كەلەدى. قازاقتىڭ كورنەكتى جازۋشىلارى مەن اقىندارىن, زيالى قاۋىم وكىلدەرىن تۇرىك جۇرتىنا تانىستىرۋ, مۇرالارىن ناسيحاتتاۋ بەرىك داستۇرگە اينالعان», دەپ جازادى كىرىسپە سوزىندە ەۋرازيا جازۋشىلار قاۋىمداستىعىنىڭ توراعاسى, «بەنگۋ» باسپاسىنىڭ ديرەكتورى ياكۋپ وماروعلى.
جۋرنالدا ەل ىقىلاسىنا ەرەكشە بولەنگەن اقىننىڭ ءار جىلدارى جازعان ولەڭدەرى, پۋبليتسيستيكالىق جازبالارى, وزگەشە وي-تولعامدارى مەن العاش ۇسىنىلعان قولجازبالارى توپتاستىرىلعان. حالىقارالىق «تۇركىسوي» ۇيىمىنىڭ باس حاتشىسى دۇيسەن قاسەيىنوۆتىڭ, قازاقستاننىڭ تۇركياداعى ەلشىسى ابزال ساپاربەكوۆتىڭ, گازي ۋنيۆەرسيتەتىنىڭ رەكتورى يبراحيم ۋسلاننىڭ, عالىمدار ايگۇل ىسىماقوۆانىڭ, زارقىن تايشىبايدىڭ, تاعى باسقالارىنىڭ جۇرەكجاردى باياندامالارى ەنگەن. حالقى ءۇشىن باسىن بايگەگە تىككەن الاش قايراتكەرى جىرلارىنىڭ ءتۇبى ءبىر تۋىستاس ەلدە ءوز وقىرماندارىن تابۋى, كەڭ اۋقىمدا تانىستىرىلۋى ءسۇيىنىشتى جايت, ۇلت رۋحانياتىنا قوسىلعان تەڭدەسسىز ۇلەس.ءبىر جاعىنان, ۇلگى-ونەگە الاتىن ءتالىم.
بۇدان بۇرىن «كاردەش كالەمگەر» جۋرنالى ءسۇيىنباي, جامبىل, قاسىم امانجولوۆ, شەرحان مۇرتازا, ولجاس سۇلەيمەنوۆ, بەردىبەك سوقپاقباەۆ سەكىلدى قازاقتىڭ تالانتتى تۇلعالارىنا بىرنەشە سانىن ارناعان بولاتىن. ءسۇيىنباي, اباي, جامبىل, تاتتىمبەت قازانعاپ ۇلى, دينا نۇرپەيىسوۆا, ماعجاندى ۇلىقتاپ, كوشەلەرگە ەسىمدەرىنىڭ بەرىلۋى, ەسكەرتكىشتەر ورناتىلۋى, ساياباقتار اشىلۋى كوڭىلگە ەرەكشە جىلىلىق ۇيالاتادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى