سەنات دەپۋتاتتارى استاناداعى «استانا-ەنەرگيا» كاسىپورنىنىڭ ەكىنشى جىلۋ ەلەكتر ورتالىعىنىڭ جۇمىسىمەن تانىستى.
ءىس-شاراعا سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا جانە كوميتەتتىڭ بىرقاتار وكىلدەرى قاتىستى. سەناتورلار كاسىپورىن نىساندارىن ارالاپ, باسقارۋ تيىمدىلىگى, ەكولوگيا سەكىلدى كەلەلى ماسەلەلەرگە توقتالدى.
«بالامالى ەنەرگەتيكا – بولاشاق كەپىلى. ءبىز وعان ۇمتىلۋىمىز قاجەت. بۇل دەنساۋلىعىمىز ءۇشىن قاجەت. ايتسە دە, ماسەلە حالىقتىڭ تازا اۋا ءۇشىن قانشالىقتى تولەۋگە دايىن ەكەنىنە بايلانىستى», دەدى د.نازارباەۆا.
كوميتەت توراعاسى د.نازارباەۆا وتىن كولەمىن ۇنەمدەۋگە مۇمكىندىك بەرەتىن يننوۆاتسيالىق تەحنولوگيالاردى ەنگىزۋ جونىندە سۇرادى. سەناتوردىڭ پايىمداۋىنشا, ۇنەمشىل بولماۋى سەبەبىنەن ارتىق جىلۋ دالاعا كەتىپ جاتىر. سونداي-اق كاسىپورىن جۇمىسشىلارىن تۇرعىن ۇيمەن قامتاماسىز ەتۋ سەكىلدى بىرقاتار وزەكتى ماسەلەلەرگە نازار اۋداردى.
دەپۋتاتتار ساۋالىنا وراي استانا اكىمىنىڭ ورىنباسارى قوسمان ايتمۇحامەتوۆ: «اۋا رايىنىڭ بولجامى بويىنشا -35 گرادۋس بولسا, جەو-عا 120 گرادۋس بەرىلەدى. الايدا تاڭەرتەڭ تەمپەراتۋرانىڭ كۇتىلگەن دەڭگەيدەن جوعارى ەكەنىن كورەمىز. سوندىقتان سۋ اعىندارىن رەتتەپ, جىلۋ ترانزيتتەرى تەمپەراتۋرانى باقىلاپ وتىراتىن اۆتوماتتى باسقارۋ باعدارلاماسى ازىرلەنۋدە», دەدى.
سونىمەن قاتار د.نازارباەۆا كاسىپورىننىڭ قالا كەلبەتىنە كەرى اسەر تيگىزىپ وتىرعانىن دا اتاپ ءوتتى. ق.ايتمۇحامەتوۆتىڭ سوزىنە قاراعاندا, بيىل اۋا زياندى شىعارىلىم كولەمى ازايادى. ناتيجەسىندە ەكولوگيا 30-40 پايىزعا تازارا تۇسپەك.
بۇدان كەيىن سەناتورلار كاسىپورىن جۇمىسشىلارىمەن كەزدەسىپ, ولاردىڭ سۇراقتارىنا جاۋاپ بەردى. د.نازارباەۆا «پرەزيدەنتتىڭ بەس الەۋمەتتىك باستاماسىندا» ايتىلعان باسىمدىقتارعا توقتالىپ, مامانداردى كاسىبي بىلىكتىلىگىن ارتتىرۋعا شاقىردى.
جالپى, «استانا-ەنەرگيا» 2004 جىلى قۇرىلعان بولاتىن. ونىڭ قۇرامىنا جەو-1 جانە جەو-2 كىرەدى. قازىرگى تاڭدا جەو-2-ءنىڭ 13 قازاندىعى 5 تۋربيناسى بار. ونىڭ ەلەكتر قۋاتى – 480 مۆت , ال جىلۋ قۋاتى – 1918 گكال.
اباي اسانكەلدى ۇلى,
«ەگەمەن قازاقستان»