باتىس قازاقستان وبلىسىندا بانك فيليالدارى 2018 جىلدىڭ قاڭتار-اقپان ايلارىندا تۇرعىندارعا 34,3 ملرد. تەڭگە نەسيە بەرگەن. بۇل 2017 جىلدىڭ وسى كەزەڭىمەن سالىستىرعاندا 36,1%-عا كوپ. بۇل جونىندە وڭىرلىك كوممۋنيكاتسيالار قىزمەتى الاڭىندا وتكەن بريفينگتە قازاقستان رەسپۋبليكاسى ۇلتتىق بانكىنىڭ باتىس قازاقستان وبلىستىق فيليالى ديرەكتورى م.قۇلباراقوۆ حابارلادى.
وڭىردەگى قارجى احۋالى, ەكونوميكانىڭ ناقتى سەكتورىنىڭ مونيتورينگى تۋرالى بايانداعان قوزىباق قۇلباراقوۆ وبلىس اۋماعىندا ەكىنشى دەڭگەيدەگى بانكتەردىڭ 14 فيليالى بار ەكەنىن, فيليالدا ەسەپتىك تىركەۋدەن وتكەن 8 ميكروقارجىلىق ۇيىم جۇمىس ىستەيتىنىن ايتتى.
جوعارىدا اتالعان نەسيە قارجىنىڭ نەگىزگى بولىگى, ياعني 34,0 ملرد. تەڭگەسى وتاندىق ۆاليۋتامەن بەرىلگەن ەكەن. ال نەسيە الۋشى جەكە تۇلعالار مەن زاڭدى تۇلعالاردىڭ اراسالماعى ءبىر-بىرىنە قارايلاس. جەكە تۇلعالار – 16,9 ملرد. تەڭگە نەسيە السا, زاڭدى تۇلعالارعا - 17,4 ملرد. تەڭگە بەرىلگەن.
بۇدان بولەك, ەسەپتى مەرزىمدە شاعىن كاسىپكەرلىك سۋبەكتىلەرىنە 5,5 ملرد. تەڭگە نەسيە بەرىلگەن. «بۇل كورسەتكىش تە وتكەن جىلمەن سالىستىرعاندا 36,6%-عا كوبەيدى» دەيدى بانك فيليالى توراعاسى.
ساراپتاپ قاراساق, نەسيە الۋشىلاردىڭ كوبى قارجىنى تۇتىنۋ ماقساتىنا جانە ءۇي سالۋعا نەمەسە باسپانا ساتىپ الۋ ءۇشىن راسىمدەگەن. ماسەلەن, تۇرعىنۇيگە جۇمسالعان نەسيە قارجى بىلتىرعى كولەمىنەن 36,5%-عا ۇلعايىپ, جالپى نەسيەنىڭ 7 پايىزدايىن قۇراپتى. سالالار كەسىندىسىندە بەرىلگەن نەسيەنىڭ ەداۋىر ۇلەسى ساۋدا سالاسىنا (جالپى كولەمنەن 29,0%), ونەركاسىپكە (13,0%) تيەسىلى ەكەن.
«قارىز ك ۇلىپ كەلەدى, جىلاپ قايتادى» دەگەن ماقال بار عوي. قوزىباق قۇلباراقوۆتىڭ ايتۋىنشا, باتىس قازاقستان وبلىسىندا نەسيە قارىزىن قايتارۋعا ق ۇلىقسىزدار ازايار ەمەس. 2018 جىلدىڭ 1 ناۋرىزىنداعى مالىمەتكە سايكەس وبلىستا بەرەشەكتەر سوماسى 222,0 ملرد. تەڭگەنى قۇراپتى. بۇل كورسەتكىش تە 2017 جىلعى 1 ناۋرىزبەن سالىستىرعاندا 15,2%-عا كوبەيگەن. ونىڭ ىشىندە جەكە تۇلعالاردىڭ نەسيەسى بويىنشا بەرەشەك كولەمى 128,1 ملرد. بولسا, زاڭدى تۇلعالار بويىنشا بەرەشەك كولەمى 93,9 ملرد. تەڭگەنى قۇراعان.
ساراپشىلاردىڭ پىكىرىنشە, نەسيە بەرۋشى بانكتەرگە شاعىن كاسىپكەرلىك نىساندارى – 53,4 ملرد., تۇرعىن ءۇي سالامىن نەمەسە ساتىپ الامىن دەپ قارىز العان ادامدار – 39,4 ملرد., تۇتىنۋ ماقساتىنا بەرىلگەن نەسيە الۋشىلار – 74,8 ملرد. تەڭگە بەرەشەك بولىپ, قارىزىن ۋاقىتىلى قايتارا الماي وتىر ەكەن.
دەپوزيت نارىعىندا دا وزگەرىس كوپ. 2018 جىلدىڭ 1 ناۋرىزىنداعى دەرەكتەر بويىنشا, بانك فيليالدارىنداعى سالىمدار قالدىعى 210,2 ملرد. تەڭگەنى قۇراپ, 2017 جىلعى 1 ناۋرىزبەن سالىستىرعاندا 10,2%-عا وسكەن. جەكە تۇلعالاردىڭ دەپوزيتتەرى 17,5%-عا ۇلعايسا, زاڭدى تۇلعالاردىڭ دەپوزيتى كەرىسىنشە 25,2%-عا تومەندەپتى.
جالپى باتىس قازاقستان وبلىسىنداعى دەپوزيت سوماسىنىڭ 88,4%-ى (185,9 ملرد. تەڭگە) – جەكە تۇلعالارعا, 11,6%-ى (24,3 ملرد. تەڭگە) – زاڭدى تۇلعالارعا تيەسىلى.
باتىسقازاقستاندىقتار جىل وتكەن سايىن ارنايى تولەم كارتالارىن ءجيى پايدالانا باستاعانى بايقالادى. بيىلعى ناۋرىز ايىنىڭ باسىندا وبلىستا 623,4 مىڭ دانا تولەم كارتاسى تىركەلدى. بۇل بىلتىرعىدان 20 پايىزداي كوپ. ولارعا قىزمەت كورسەتۋ ءۇشىن وڭىردە 366 بانكومات, 4236 POS-تەرمينال, 51 بانكتىك كيوسك حالىققا قالتقىسىز ىستەپ تۇر.
ارينە, وڭىردەگى قارجى قوزعالىسى, دامۋ مەن قۇلدىراۋ ۇدەرىستەرى بانك جۇيەسىنىڭ كوز الدىندا ءوتىپ جاتادى. سوندىقتان ۇلتتىق بانكىنىڭ باتىس قازاقستان وبلىستىق فيليالى ديرەكتورى م.قۇلباراقوۆ ەكونوميكانىڭ ناقتى سەكتورىنىڭ مونيتورينگىنە كەڭىنەن توقتالدى. 2018 جىلعى العاشقى ەكى ايدا باتىس قازاقستان وبلىسىندا ەكونوميكانىڭ ناقتى سەكتورىنىڭ مونيتورينگىنە 157 كاسىپورىن قاتىسقان ەكەن. ونىڭ ىشىندە وڭدەۋ ونەركاسىبىنەن – 38, ساۋدا سالاسىنان – 32, قۇرىلىستان – 27, كولىك سالاسىنان – 17, اۋىل شارۋاشىلىعى سالاسىنان – 9 كاسىپورىن بار.
ايتا كەتەر جاڭالىق, 2018 جىلعى 27 ناۋرىزىندا ۇلتتىق بانك جاڭا تەحنولوگيالىق ءونىم – Invest Online جۇيەسىن ىسكە قوستى. ارنايى ازىرلەنگەن موبيلدىك قوسىمشانى پايدالانا وتىرىپ, قازاقستاندىقتار ەندى ونلاين رەجيمدە قر ۇلتتىق بانكى نوتتارىنا, ونىڭ ىشىندە ازداعان سوماعا قاراجات ينۆەستيتسيالاي الادى. جۇيە تاۋلىك بويى, كوميسسيالارسىز, سالىق تولەمەي, بارلىق وپەراتسيا اشىق جانە تەگىن جۇمىس ىستەيدى.
- Invest Online جۇيەسىنىڭ جۇمىسى نەگىزىندە ءۇش يننوۆاتسيالىق شەشىم قولدانىلعان. بىرىنشىدەن, العاش رەت مەملەكەتتىك دەڭگەيدە «بلوكچەين» تەحنولوگياسى قولدانىلدى. ياعني, ءاربىر ترانزاكتسيا بولىنگەن ءتىزىلىم تۇرىندەگى اجىرامايتىن بلوكتار تىزبەگىنە جازىلادى, بۇل اقپاراتتىڭ ساقتالۋىن جانە وزگەرمەۋىن قامتاماسىز ەتەدى. ەكىنشىدەن, قازاقستان ۇلتتىق بانكى العاش رەت باعالى قاعازدارمەن وپەراتسيالار بويىنشا ەسەپ ايىرىسۋ ءۇشىن قولدانىلاتىن ەلەكتروندىق اقشانى شىعاردى. ۇشىنشىدەن, بارلىق وپەراتسيالار ەلەكتروندىق قۇرىلعىلاردا ونلاين تۇرىندە قولجەتىمدى, - دەيدى قوزىباق قۇلباراقوۆ.
Invest Online ارنايى موبيلدىك قوسىمشاسىن جاقىن ارادا Play Market, App Store ارقىلى ۇيالى تەلەفونعا جۇكتەپ الۋعا بولادى. موبيلدىك قوسىمشانى جۇكتەگەن سوڭ جۇيەگە تىركەلىپ, قىسقا مەرزىمدى نوتتاردى ساتىپ الۋ ءراسىمىن باستاي الاسىز. بۇل جۇيەگە حقو ارقىلى ەتسق-تى پايدالانا وتىرىپ نەمەسە «بجزق» اق جەكە كابينەتى ارقىلى تىركەلۋگە دە بولادى ەكەن. سونداي-اق, ەگەر شوت بولسا, باعالى قاعازداردىڭ ورتالىق دەپوزيتاريىندە تىركەلەدى. بۇل جاعدايدا, شوتتىڭ ءنومىرىن ەنگىزگەن جەتكىلىكتى بولادى. Invest Online قوسىمشاسىنىڭ جۇمىسى تۋرالى مالىمەتتى تاۋلىك بويى جۇمىس جاسايتىن 8 800 080 86 68 تەلەفونى نەمەسە investonline@csd.kz پوچتاسىنان الۋعا بولادى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان