سەمەيدە توتەنشە جاعداي جاريالانىپ, تاسقىن سۋ سالدارىنان بولعان شىعىندى انىقتايتىن ارنايى كوميسسيا جۇمىسىن باستادى. بۇگىن تاعى دا جارىلىس جۇمىستارى جۇرەدى دەپ جوسپارلانۋدا.
كەشە جارىلعىش زاتتىڭ بارلىعى قولدانىلدى. ءتۇنى بويى وسكەمەن قالاسىنان قوسىمشا جارىلعىشتار اكەلىنبەك. وسىنىڭ بارلىعى دا مۇزدى ويىپ, سۋدى ەركىن ءارى دۇرىس باعىتتا جىبەرۋ ءۇشىن جاسالىپ جاتقان شارالار. باس كەزىندە قالانىڭ ءبىر شەتىندەگى تۇيەمويناق ارالىنىڭ ۇيلەرى سۋدا قالسا, ودان كەيىن ميرنىي, شىعىس كەنتتەرىنىڭ كوشەلەرىنە دە سۋ جايىلىپ كەتتى. سۋدىڭ دەڭگەيىن تومەندەتۋدىڭ بارلىق شاراسىن جاساۋدى ماقسات قىپ العان قالا باسشىلىعى مۇزدى جارۋدى ءالى دە دۇرىستاپ قاراستىرماق.
- مۇزدى جاردىق, ءسويتىپ ەرتىستى ەرتەرەك جۇرگىزۋدى جوبالادىق, - دەدى قالا اكىمى ەرماك ءسالىموۆ, - بىراق, وكىنىشكە قاراي, مۇزدىڭ ۇلكەن كەسەگى تەرى زاۋىتى اۋماعىندا تۇراقتاپ قالعان. مىنە, وسى سەبەپتەن قالانىڭ زاتون اۋماعى دا سۋدا قالىپ وتىر. ءسويتىپ, بۇل اعىس بويىنداعى بوبروۆكا مەكەنىنە دە جەتتى. زاتوندا سونىمەن 75 ءۇي سۋ استىندا قالىپ وتىر. بوبروۆكادا 150 ساياجاي وسى حالگە ءتۇستى. 235 ادام بۇل جەردەن كوشىرىلدى. بىراق, ادامدار جاعدايدىڭ اۋىر ەكەنىن ۇعا الماي, ۇيلەرىن تاستاپ كەتكىسى جوق. دەسەك تە, سۋدىڭ استىندا قالماس ءۇشىن ءبىز اۆتوبۋستاردى دايىنداپ قويدىق. جەرگىلىكتى قوناق ۇيلەردە ورىندار دايىن تۇر.
سەمەي قالاسىنىڭ اكىمى ەرماك ءسالىموۆ تىكۇشاق ارقىلى ەرتىستىڭ قالىڭ مۇز قۇرساۋلانعان تۇستارىن شولىپ وتكەن. ءبىر ەمەس, ەكى رەت بيىكتىكتەن شولا قاراعان كەزدە ەرتىستىڭ اعىسى ەركىن كەتۋ ءۇشىن قالانىڭ سىرت ەمەس, ىشكى تۇسىندا مۇزدى جارۋ قاجەتتىگى انىقتالىپتى. بۇل تەرى زاۋىتىنىڭ جانىنداعى «پارۋس» دۇكەنىنىڭ تۇسى. سونىمەن بۇل تۇستاعى مۇز وتە قالىڭ بولعاندىقتان, از قۋاتى بار جارىلعىش زات بۇل مۇزدى ويا الماس ەدى, دەيدى قالا باسشىسى, سوندىقتان دا, قۋاتى كۇشتى جارىلعىشتى ىسكە قوسقان. قالىڭدىعى 120 سم مۇز جارىلعان كەزدە قاسىنداعى كوپپاتەرلى ۇيلەرگە زاقىم تيگەن.
- جەرگىلىكتى تۇرعىندار ەرتىس ماڭىنا تولىپ الىپ, قالاي جارىلاتىندىعىن تاماشالاماق بولدى,-دەدى ەرماك ءسالىموۆ,-بىراق, تج قىزمەتكەرلەرى مەن پوليتسيا ولاردى تاراتۋعا تىرىستى. ويتكەنى مۇزدىڭ ويىلعان بولىگىنىڭ استىندا قالۋى مۇمكىن ەدى. ادامدار امان-ەسەن, بىراق, ۇيلەرىنىڭ تەرەزەلەرى سىنىپ كەتتى. قازىر كەلگەن شىعىندى انىقتاۋ ءۇشىن كوميسسيا جۇمىس ىستەپ جاتىر. بارلىق شىعىندار وتەلەدى.
راۋشان نۇعمانبەكوۆا,
سۋرەتتەر اۆتوردىكى.
سەمەي