وبلىس ورتالىعىندا وتكەن ءماشھۇر ءجۇسىپتىڭ 160 جىلدىعىنا ارنالعان «كۇي تارتىس» بايقاۋى وبلىستىق ءبىلىم بەرۋ باسقارماسىنىڭ باستاماسىمەن وسىمەن 7-ءشى رەت وتكىزىلىپ وتىر.
بايقاۋعا 10-15 جاس ارالىعىنداعى 30-عا جۋىق وقۋشى قاتىستى. كۇيشى-دومبىراشىلاردىڭ ونەرىن وبلىس ورتالىعىنداعى مۋزىكالىق كوللەدجدىڭ حالىق اسپاپتار ءبولىمىنىڭ مەڭگەرۋشىسى رىسكۇل اساۋبايقىزى, يسا بايزاقوۆ اتىنداعى فيلارمونيانىڭ ءانشىسى باۋىرجان احمەتوۆ, دارىندى بالالارعا ارنالعان مۋزىكالىق مەكتەپ-ينتەرناتى قوبىز بەن جەتىگەن سىنىبىنىڭ مۇعالىمى ماقپال ساعىمبايقىزى باعالاپ, تورەلىك جاسادى.
الدىمەن كۇي تارتىس ەرەجەسى بويىنشا قازىلار القاسى كۇيشىلەردى جەكە-جەكە تىڭداپ الدى. رىسكۇل اساۋبايقىزىنىڭ ايتۋىنشا, جاس دومبىراشىلاردىڭ كۇي تارتىستاعى ونەرى: ورىنداۋ شەبەرلىگى, ارتىستىك قابىلەتى, ەكى قولدىڭ قويىلۋ تەحنيكاسى ورىنداۋشىنىڭ كيىمى مەن ساحنا بەينەسىنە قاراپ باعالانىپتى. كەلەسى كەزەكتە كۇيشىلەر اراسىندا كۇي تارتىس باستالدى. كۇيشىلەر قۇرمانعازىنىڭ «بالبىراۋىن», «اداي», داۋلەتكەرەيدىڭ «تۇرىكمەن», ر.جەلدىباەۆتىڭ «ەركە سىلقىم», دينانىڭ «تويباستار», حالىق كۇيى «كەلىنشەك» سياقتى توكپە كۇيلەردى, كەلەسى كەزەڭدە اتاقتى سۇگىر, تاتتىمبەت اتالارىنىڭ, تولەگەن مومبەكوۆ, قارشىعا احمەدياروۆ, سەكەن تۇرىسبەكوۆتىڭ شىعارمالارىنان شەرتپە كۇيلەردى ورىنداپ بەردى. ءسويتىپ كۇي تارتىس بايقاۋىنىڭ باس جۇلدەسى وبلىس ورتالىعىنداعى قۇرمانعازى اتىنداعى №1 بالالار مۋزىكا مەكتەبىنىڭ وقۋشىسى ايشات باقىتوۆاعا بەرىلدى.
«بۇل جەڭىسىمدى ۇستازىم قۋانىش مەيرام ۇلىنا ارنايمىن. كۇي تارتىستا تولەگەن مومبەكوۆتىڭ «سالتانات» كۇيىن ورىندادىم», دەيدى ايشات. ال 1-ورىندى ەكىباستۇزداعى بالالار مۋزىكا مەكتەبىنىڭ وقۋشىسى ارمان سەرىكوۆ, 2-ورىندى قارشىعا احمەدياروۆتىڭ وبلىس ورتالىعىنداعى №2 مەكتەبىنىڭ وقۋشىسى ايدوس اۋباكىروۆ پەن №35 مەكتەپتىڭ وقۋشىسى داريعا ساحيەۆا يەلەنسە, 3-ورىندى ەرتىس اۋدانى بالالار ونەر مەكتەبىنىڭ وقۋشىسى ايمان ءىلياشوۆا مەن وقۋشىلار سارايىنىڭ «جاس ەكپىن» دومبىرا ءانسامبلىنىڭ مۇشەسى اسەمگۇل توقباەۆا الدى.
وقۋشىلار سارايىندا ەكى كۇن بويى كۇي تارتىستىڭ قىزىعىن كورۋگە جينالعان كورەرمەن تولى زال كۇمبىرلەگەن دومبىرا ءۇنىن تىڭداپ, رۋحاني ءبىر دەمالعانداي. ساحنادا وبلىستىڭ اۋىل, قالالارىنان جينالعان مەكتەپ وقۋشىلارى كۇيشىلىك, كۇي تارتۋ ونەرلەرىمەن تاڭعالدىردى.
فاريدا بىقاي, «ەگەمەن قازاقستان»
پاۆلودار