قازاقتىلدى باسىلىم ماماندارىنىڭ ءبىلىمىن ارتتىرىپ, سالالىق جۋرناليستيكاعا بەيىمدەۋ جانە وزەكتى تاقىرىپتار توڭىرەگىندە تالقىلاۋ الاڭىن كەڭەيتۋ ماقساتىندا «ەگەمەن قازاقستان» گازەتىنىڭ جانىنان قۇرىلعان «ەگەمەن اكادەمياسى» بۇگىن جۇمىسىن باستادى.
«باسپاسوزگە كىرىسپە» تاقىرىبىندا وتكەن جوبانىڭ العاشقى ساباعىنا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ 40-قا جۋىق ستۋدەنتى كەلىپ قاتىستى. الەۋمەتتىك جەلى قولدانۋشىلارى دا ساباقتى ونلاين تىڭداۋعا مۇمكىندىك الدى.
ءدارىستى جۇرگىزگەن باس باسىلىم باسشىسى, «ەگەمەن اكادەمياسى» جوباسىنىڭ اۆتورى دارحان قىدىرالى بۇل جوبانىڭ باسقا مەديا ترەنينگتەردەن ايىرماشىلىعى – عاسىرعا جۋىق قالىپتاسقان مەكتەبى بار, ۇلاعاتتى ۇستاحانا سانالاتىن «ەگەمەن قازاقستاننىڭ» تاجىريبەسىمەن ءبولىسۋ, ءدارىستى ۇزاق ۋاقىت ۇزبەي جۇرگىزۋ جانە جاستاردى جازۋعا ماشىقتاندىرۋ ارقىلى باسپاحاناداعى وندىرىسكە ارالاستىرۋ ەكەنىن ايتتى. الەمدىك ءباسپاسوزدىڭ تاريحىنا شولۋ جاساعان دارىسكەر ونىڭ بالاما مەديامەن بايلانىسى جانە بولاشاعى جايلى ءسوز ەتتى. سونداي-اق قازىرگى مەديا ترەندتەرگە, جارنامانىڭ ءرولى مەن جۋرناليستىك ەتيكا تاقىرىبىنا دا توقتالدى.
«ەگەمەن اكادەمياسىنىڭ» اشىلۋىندا ءسوز العان جوبا ۇيلەستىرۋشىسى دارحان ومىربەك شارانىڭ ماقساتتارى مەن مىندەتتەرىن اتاپ ءوتتى. «گازەت ءومىرى ۇلكەن كونۆەيەر ەكەنى بەلگىلى. گازەت ءومىرىنىڭ ەرەكشەلىگىنە بايلانىستى شىعارماشىلىق ۇجىمنىڭ بوس ۋاقىتتارى جوق. ولار جيىندارعا بارا بەرمەيدى, مىنبەرلەردەن سويلەمەيدى, قوعامدىق دارىستەرگە قاتىسپايدى. بىراق ولاردىڭ مول تاجىريبەسى بار. ءبىز سول تاجىريبەمەن ءبولىسۋدى گازەتىمىزدىڭ ميسسياسى سانايمىز», دەدى ول.
ساباققا جينالعان جاستار دا بەلسەندىلىك تانىتىپ, سپيكەرگە ءوز ساۋالدارىن قويدى. جاڭا جوبانىڭ ارتىقشىلىقتارى جايلى پىكىرلەرىن ءبىلدىردى.
«ۋنيۆەرسيتەتتە العان تەوريالىق ءبىلىمىمىزدى توپپەن بىرگە كەلىپ, رەداكتسيانىڭ وزىندە تاجىريبە ارقىلى جۇزەگە اسىرۋ مۇمكىندىگىنە يە بولعانىما وتە قۋانىشتىمىن. بۇل ەلىمىزدەگى ەڭ ۇزدىك گازەتتىڭ, ەڭ ۇلكەن رەداكتسيانىڭ بولاشاق جۋرناليستەر ءۇشىن جاساپ وتىرعان جاناشىر جوباسى دەپ ەسەپتەيمىن. ستۋدەنتتەرگە گازەت شىعاتىن قايناعان ورتانى كورۋ تاماشا وراي دەپ ويلايمىن», دەيدى III كۋرس ستۋدەنتى ايمان تالعات.
ءجۇز جىلعا جۋىق تاريحى بار باسىلىمداعى تاجىريبەنى جاس جۋرناليستەرمەن ءبولىسىپ, اقپارات سالاسىنا بىلىكتى ماماندار دايىنداۋعا ۇلەس قوسۋدى كوزدەگەن جوبادا ءار كۋرس ءۇش اي ۋاقىتتى قامتيدى. اپتاسىنا ءبىر رەت بولاتىن ءدارىستى باسىلىم قىزمەتكەرلەرىنەن بولەك ارنايى سپيكەرلەر دە جۇرگىزەدى. ستۋدەنتتەر بىلىكتى مامانداردىڭ ءدارىسىن تىڭداي وتىرىپ, ماقالا جازۋ, حات قورىتۋدان باستاپ, باسىلىمنىڭ باسپاحانادان شىعۋىنا دەيىنگى پروتسەسىمەن جان-جاقتى تانىسادى. ساباقتار بويىنشا تانىمدىق ماقالا, ەسسە جانە ساراپتامالىق ماتەريال جازعان بەلسەندى قاتىسۋشىلارعا كۋرس اياقتالعان كەزدە ارنايى سەرتيفيكاتتار تابىستالادى. العاشقى ماۋسىمدا تاقىرىپ تاڭداۋ, تاقىرىپ قويۋ, زەرتتەۋ ماقالاسىن جازۋ, ساراپتامالىق ماقالا جازۋ, ءماتىندى وڭدەۋ, سۇحبات الۋ, فوتوجۋرناليستيكا, بەتتەۋ سەكىلدى تاقىرىپتار قامتىلادى.
مايگۇل سۇلتان,
سۋرەتتى تۇسىرگەن ەرلان ومار
«ەگەمەن قازاقستان»