ششۆەيتساريانىڭ بازەل قالاسىندا جىل سايىنعى Baselworld 2018 زەرگەرلىك بۇيىمدار مەن ساعاتتار كورمەسىنىڭ اياسىندا فۋتبولدان Hublot Match of Friendship ءتۋرنيرى ءوتتى. فۋتبولدان رەسەيدە وتەتىن الەم چەمپيوناتىنا 80 كۇن قالۋىنا وراي Hublot برەندى تاريحتا تۇڭعىش رەت ءوزىنىڭ سپورتتاعى سەرىكتەستەرىنىڭ باسىن قوسىپ, فۋتبولدان دوستىق كەزدەسۋ ۇيىمداستىردى. جاسىل الاڭدا ءبىر مەزەتتە جەڭىل اتلەتيكادان الەم چەمپيونى جانە Hublot ەلشىسى ۋسەين بولت جانە ەكى كوماندانىڭ جاتتىقتىرۋشىلارى جوزە موۋرينيۋ مەن ديەگو مارادونا دوپ تەپتى.
مارادونانىڭ كومانداسىندا: تينو اسپريليا, روبەرتو كارلوس, ەرنان كرەسپو, دجانني ينفانتينو, كريستيان كارامبە, ماركو ماتەراتستسي, گايسكا مەندەتا, اندجەلو پەرۋتستسي جانە داۆيد ترەزەگە وينادى.
موۋرينيۋدىڭ قۇراماسىندا: بولت, ۆيتور بايا, ستەفان شاپيۋيزا, مارسەل دەساي, دەمەن دافف, روببي كين, پاتريك كليۋيۆەرت, ريچارد ورلينسكي جانە الەكسەي سمەرتين دوپ تەپتى. ال جۇلدىزدى ماتچتى ۋەفا-نىڭ تانىمال تورەشىسى – نيكولا ريتستسولي باسقاردى.
ءالي بيتورە,
«ەگەمەن قازاقستان»