بۇگىن قر پرەمەر-ءمينيسترى باقىتجان ساعىنتاەۆ قىزىلوردا وبلىسىنا جۇمىس ساپارى اياسىندا پرەزيدەنتتىڭ بەس الەۋمەتتىك باستاماسىن جۇزەگە اسىرۋ ماسەلەلەرى بويىنشا ءبىلىم بەرۋ, دەنساۋلىق ساقتاۋ جانە الەۋمەتتىك سالا قىزمەتكەرلەرىمەن كەزدەستى, دەپ حابارلايدى primeminister.kz.
كەزدەسۋ بارىسىندا مەملەكەت باسشىسىنىڭ الەۋمەتتىك باستامالارىن اشاتىن جاڭا مۇمكىندىكتەرى: قولجەتىمدى باسپانا, سالىق سالۋدى تومەندەتۋ, ستۋدەنتتەرگە ارنالعان جاڭا پاكەت – قوسىمشا گرانتتار مەن جاتاقحانالار, ميكروكرەديتتەۋدى كەڭەيتى, تۇرمىس ساپاسىن جاقسارتۋ ءۇشىن جاڭا گاز قۇبىرلارىن تارتۋ جانە وڭىرلەردە بيزنەستى دامىتۋ تولىقتاي قارالدى.
سونداي-اق, مەملەكەت باسشىسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىن جۇزەگە اسىرۋ اياسىندا ينفراقۇرىلىمدى جاڭعىرتۋ, مەملەكەتتىك-جەكەشەلىك ارىپتەستىكتى دامىتۋ جانە سالانى ىرىقتاندىرۋ ارقىلى دەنساۋلىق ساقتاۋ جۇيەسىن جەتىلدىرۋ ماسەلەلەرى تالقىلاندى.
باقىتجان ساعىنتاەۆ بەرىلگەن تاپسىرمالاردى جۇزەگە اسىرۋ ءۇشىن ۇكىمەتتىڭ بارلىق قاجەتتى شارالاردى قابىلداپ جاتقانىن اتاپ ءوتتى. بەس باستاما بويىنشا ناقتى ءىس-شارالار مەن ورىندالۋ مەرزىمىن قامتيتىن جول كارتاسى ىسكە قوسىلۋدا. بارلىق ءىس-شارالار 2022 جىلعا دەيىن جۇزەگە اسىرىلماق. قازىرگى ۋاقىتتا ولاردىڭ ورىندالۋ تەتىكتەرى تولىقتاي پىسىقتالۋدا - ناۋرىز ايىنىڭ سوڭىنا دەيىن قاجەتتى زاڭنامالىق وزگەرىستەر جاسالادى.
ينۆەستيتسيالار جانە دامۋ ءمينيسترى ج.قاسىمبەك قازاقستاندىقتارعا ءتيىمدى شارتتارمەن باسپانا بەرۋ بويىنشا قولجەتىمدى يپوتەكامەن قامتاماسىز ەتەتىن «7–20–25» باعدارلاماسىنىڭ جاسالۋى, ىسكە قوسىلاتىن مەرزىمى مەن قاتىسۋ شارتتارى تۋرالى مالىمدەدى.
ءبىلىم جانە عىلىم ۆيتسە-ءمينيسترى ت.ەشەنقۇلوۆ ءبىلىم بەرۋ ماسەلەلەرى جانە جوعارى ءبىلىم بەرۋدىڭ ساپاسى مەن قولجەتىمدىلىگىن ارتتىرۋ, ستۋدەنتتىك جاستاردىڭ تۇرمىس جاعدايىن جاقسارتۋ جوسپارلارى تۋرالى بايانداما جاسادى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ن. التاەۆ «ميكروكرەديتتەۋدى كەڭەيتۋ» ءتورتىنشى باستاماسى اياسىندا بەرىلەتىن جاڭا مۇمكىندىكتەردى ءتۇسىندىردى.
ۇلتتىق ەكونوميكا ءمينيسترى ت.سۇلەيمەنوۆ جالاقىسى تومەن جۇمىسشىلاردىڭ ەڭبەكاقىسىن كوتەرۋ ءۇشىن سالىق جۇكتەمەسىن تومەندەتۋ تۋرالى ايتتى.
تالقىلاۋ بارىسىندا «بولاشاق» ۋنيۆەرسيتەتىنىڭ عىلىمي باسشىسى ب.دوسمانبەتوۆ, جىراۋ ا. الماتوۆ, وبلىستىق مەديتسينا ورتالىعىنىڭ دارىگەر-حيرۋرگى ن. اميتوۆ, وبلىستىق مۋزىكالىق دراما تەاتردىڭ كوركەمدىك جەتەكشىسى ا. حۋسەين پىكىر ءبىلدىردى.