باقىتجان ساعىنتاەۆ وقو-دا دەنساۋلىق ساقتاۋ جۇيەسىن دامىتۋدىڭ وزەكتى ماسەلەلەرىن تالقىلادى

كەزدەسۋ بارىسىندا دەنساۋلىق ساقتاۋ جۇيەسىن دامىتۋدىڭ وزەكتى ماسەلەلەرى تالقىلاندى. اتاپ ايتقاندا, اۋرۋلاردى باسقارۋ باعدارلامالارىن تسيفرلاندىرۋ جانە ازىرلەۋ, اۋرۋلاردى ەمدەۋدەن ۋاقىتىلى اۋرۋلاردىڭ الدىن-الۋعا كوشۋ, مىندەتتى مەديتسينالىق ساقتاندىرۋدى ەنگىزۋ, كادرلاردى دايارلاۋ, دەنساۋلىق ساقتاۋ نارىعىن ىرىقتاندىرۋ جانە جەكەمەنشىك ۇيىمداردىڭ اكىمشىلىك كەدەرگىلەرىن ازايتۋ, ينۆەستيتسيالار تارتۋ, ينفراقۇرىلىمدى جەتىلدىرۋ جانە مەملەكەتتىك-جەكەشەلىك ارىپتەستىكتى دامىتۋ.

قر پرەمەر-ءمينيسترى باقىتجان ساعىنتاەۆ ۇكىمەت اتالعان ماسەلەلەردىڭ بارلىعىن ەرەكشە باقىلاۋدا ۇستاپ وتىرعانىن اتاپ ءوتتى. 2017 جىلى جەكە سەكتورعا قويىلاتىن شەكتەۋلەر 1,7 ەسە جويىلدى. بۇل دەنساۋلىق ساقتاۋ سالاسىنا سالىناتىن جەكە ينۆەستيتسيالاردى ەكى ەسەگە — 44,2 ملرد تەڭگەگە دەيىن ۇلعايتۋعا جول اشادى. ءمامس جۇيەسىن ەنگىزۋ بويىنشا جۇيەلى جۇمىستار جالعاسۋدا: زاڭنامالىق بازا قۇرىلدى, وتكەن جىلدان باستاپ قور جۇمىس ىستەي باستادى, جۇمىس بەرۋشىلەر اقشا اۋدارىمدارىن جۇرگىزىپ جاتىر.

بۇدان وزگە, پرەزيدەنتتىڭ بەس الەۋمەتتىك باستاماسى اياسىندا بەرىلىپ جاتقان مۇمكىندىكتەر تالقىلاندى. بۇل — ءتيىمدى شارتتار بويىنشا تۇرعىن ءۇي ساتىپ الۋعا مۇمكىندىك بەرەتىن «7–20–25» جاڭا يپوتەكالىق باعدارلاماسى, جانە حالىقتىڭ جەكەلەگەن توپتارىنا 2019 جىلدىڭ 1 قاڭتارىنان باستاپ سالىق جۇكتەمەسىنىڭ 10 ەسەگە – 1%-كە دەيىن تومەندەۋى.

دەنساۋلىق ساقتاۋ ۆيتسە-ءمينيسترى ءلاززات اقتاەۆا دەنساۋلىق ساقتاۋ جۇيەسىن جەتىلدىرۋ سالاسىندا قابىلدانىپ جاتقان شارالار تۋرالى ەگجەي-تەگجەيلى بايانداپ بەردى. 

سونداي-اق, تالقىلاۋ بارىسىندا وبلىستىڭ مەديتسينا قاۋىمداستىعىنىڭ وكىلدەرى: دەنساۋلىق ساقتاۋ باسقارماسىنىڭ باسشىسى م. ەگىزباەۆ, №6 قالالىق ەمحانانىڭ باس دارىگەرى گ. كولباەۆا, جەكەمەنشىك ەمحانا وكىلى ۋ. ورىنباەۆا, تۋبديسپانسەردىڭ باس دارىگەرى ب. ساعىنبەكوۆ پىكىر ءبىلدىردى.