بىرنەشە كۇن بۇرىن كورەي حالىق دەموكراتيالىق رەسپۋبليكاسىنىڭ (كحدر) كوسەمى كيم چەن ىن كورشىلەس قىتاي ەلىندە بەيرەسمي ساپارمەن بولىپ, قحر توراعاسى سي تسزينپينمەن كەزدەستى. بۇل سولتۇستىك كورەيا باسشىسىنىڭ بيلىككە كەلگەننەن بەرگى العاشقى ساپارى بولىپ وتىر. ءبىر قىزىعى, قىتاي تاراپى سولتۇستىك كورەيا وكىلدەرى ءوز ەلىنە قايتقانشا بۇل اقپاراتتى قۇپيا ۇستادى.
قىتايدىڭ CCTV ارناسى كيم چەن ىننىڭ قحر-دا 25-28 ناۋرىز ارالىعىندا بولعانىن حابارلادى.سولتۇستىك كورەيا باسشىسىنىڭ قىتايعا ساپارلاۋىنىڭ ءمانىسى نەدە؟ الەمدىك ساراپشىلار بۇل تۋرالى ءتۇرلى بولجامدار ايتۋدا. «بۇل ساپار كيم چەن ىننىڭ الداعى ەكى ايعا جوسپارلانعان ماڭىزدى ەكى كەزدەسۋلەرىنە قاتىستى» دەسەدى بولجاۋشىلار. ايتا كەتۋ كەرەك, وسىعان دەيىن جابىق ساياسات ۇستانعان كحدر باسشىسى ءساۋىر ايىندا وڭتۇستىك كورەيا پرەزيدەنتى مۋ چجە ينمەن كەزدەسۋدى جوسپارلاپ وتىر. سونىمەن قاتار مامىردا اقش پرەزيدەنتى دونالد ترامپپەن كەلىسسوز وتكىزۋ نيەتى بار.
«سي تسزينپين دونالد ترامپپەن كەزدەسكەن. ونىمەن قالاي سويلەسۋ كەرەكتىگىن بىلەدى. دەگەنمەن قىتاي باسشىسى كيمنىڭ نەنى قالايتىنىن, قانداي ماقساتى بارىن انىقتاپ الۋى قاجەت. بۇگىنگە دەيىنگى الاۋىزدىققا قاراماستان قىتاي ءالى كۇنگە دەيىن كحدر-عا ىقپالىن جۇرگىزەدى», دەيدى امەريكالىق ديپلوماتتار.
ايتا كەتەرلىك ءبىر جايت, كحدر كوسەمىنىڭ بەيجىڭگە بروندى پويىزبەن بارعانى قىزىعۋشىلىق تۋدىرىپ وتىر. ءدال وسى پويىزبەن 2011 جىلى ونىڭ اكەسى كيم چەن ير دا قىتايعا جول سالعان. بۇدان بولەك, جاپونيانىڭ Nippon News Network ارناسى ۆوكزال ايماعىندا قاۋىپسىزدىك شارالارى كۇشەيتىلگەنىن, ال تيانانمەن الاڭىندا تۋريستەردىڭ جۇرۋىنە تىيىم سالىنعانىن جەتكىزدى.
قىتاي مەن كحدر-دىڭ بايلانىسى الداعى ۋاقىتتا دا ءوربيتىن سىڭايلى. سەبەبى سي تسزينپين دياويۋتايداعى رەزيدەنتسيادا وتكەن كەزدەسۋدە كيم چەن ىن مەن ونىڭ جۇبايى لي سول چجۋدى قىتايعا تاعى كەلۋگە شاقىردى.
ال كيم چەن ىن ءوز سوزىندە قىتاي توراعاسى سي تسزينپينمەن وتكەن العاشقى كەزدەسۋى ەكى ەلدىڭ دوستىق بايلانىستارىن نىعايتىپ, كورەي تۇبەگىندەگى بەيبىتشىلىك پەن تۇراقتىلىققا ىقپال ەتەتىنىنە سەنىمدىلىك ءبىلدىردى.
وتكەن جىلى سولتۇستىك كورەيانىڭ بالليستيكالىق زىمىرانداردى بىرنەشە رەت سىناقتان وتكىزگەنىن بۇكىل الەم سىنعا العان. وسىعان قاتىستى بۇل ەلگە ءتۇرلى سانكتسيا دا سالىندى. ال كيم چەن ىن باستاعان بىرنەشە لاۋازىمدى توپ قارا تىزىمگە ەنگىزىلدى.
وسىعان وراي, سەۋل مەن توكيو بەيجىڭنەن كحدر كوسەمىنىڭ ساپارى تۋرالى تۇسىنىكتەمە سۇراپ وتىر. وسىعان قاتىستى جاقىن كۇندەرى قىتاي ۇكىمەتىنىڭ وكىلى يان تسزەچي سەۋلگە بارماقشى.
جاھانعا جويقىن قارۋىمەن سەس كورسەتىپ وتىرعان سولتۇستىك كورەيانىڭ بيىلدان باستاپ الەمگە ەسىك اشا باستاعانى قۋانتارلىق جايت. ال جاقىن كۇندەرى سي تسزينپين مەن كيم چەن ىننىڭ كەزدەسۋىندە ناقتى قانداي ماسەلەلەر تالقىلانعانى بەلگىلى بولۋى مۇمكىن.
ايان ءابدۋالي,
«ەگەمەن قازاقستان»