تاۋەلسىزدىك بەدەرىندە تولاسسىز ءوتىپ كەلە جاتقان «قازاقستان ارۋى» ۇلتتىق بايقاۋىنا بيىل 21 جىل تولادى. استاناداعى ناۋرىزدىڭ سوڭعى كۇنىندە ەلىمىزدىڭ ەڭ سۇلۋىنىڭ ەسىمى بەلگىلى بولادى. ال وعان دەيىن 31 ناۋرىز كۇنى بەيبىتشىلىك جانە كەلىسىم سارايىندا مارەگە جەتەتىن بايقاۋ بيىل كوكتەمنىڭ شۋاقتى مەرەكەسى – ناۋرىزعا باعىشتالاتىندىعىن باياندايمىز.
باعامداپ وتىرساق, وسى جىلدار ىشىندە ەلىمىزدىڭ ءار ايماعىندا بايقاۋدىڭ وكىلدىكتەرى اشىلىپتى. وبلىستىق تۋرلاردىڭ جەڭىمپازدارى جىل سايىن ءوز وڭىرلەرىنىڭ نامىسىن بايقاۋدىڭ ۇلتتىق فينالىندا قورعاپ ءجۇر.
ءبىر جاعىنان وسىناۋ سۇلۋلىق دۋمانىن ۇرپاقتان ۇرپاققا جالعاسىپ كەلە جاتقان اتا-بابامىزدىڭ كورەگەندىگى مەن دانالىعىنان, ءداستۇرىن ۇلىقتايتىن شارا دەپ قاراۋ كەرەك. ازيا مەن ەۋروپا مادەنيەتتەرىنىڭ توعىسىندا تۇرعان قازاقستاننىڭ گەوگرافيالىق ورنالاسۋى نازىك جاندىلارعا ءتان سۇلۋلىقتىڭ بىرەگەي, وزىندىك, ەرەكشە ۇلگىسىن جاساۋعا سەپتىگىن تيگىزدى.
وليمپيادا ويىندارى سياقتى, ارۋلار بايقاۋى دا ەلىمىزدىڭ جاستارىن ەستەتيكالىق تۇرعىدان تاربيەلەۋدى ناسيحاتتاۋ جانە دامىتۋ ءۇشىن قاتىسۋشىلاردى بىرىكتىرىپ, جاقىنداستىرادى, ولاردىڭ بويىنداعى جاقسى قاسيەتتەرىن اشادى.
جوبا مەملەكەتتىك ءتىلدى, ۇلتتىق كاسىپ, مادەني مۇرا, ۇلتتىق كيىم, ءداستۇرلى تاعام سياقتى ەتنيكالىق نەگىزدەردى ساقتاۋ جانە ناسيحاتتاۋعا تالپىنادى.
وعان قوسا «قازاقستان ارۋى» بايقاۋى قازاقستان رەسپۋبليكاسى اۋماعىندا «دۇنيەجۇزى ارۋى» (اقش), «الەم ارۋى» ( ۇلىبريتانيا) سياقتى ءىرى الەمدىك بايقاۋلاردىڭ ارنايى ليتسەنزيالارىنىڭ بىردەن-ءبىر يەلەنۋشىسى بولىپ تابىلادى.
«قازاقستان ارۋى» ۇلتتىق بايقاۋى – جاي عانا سۇلۋلىق بايقاۋى ەمەس. سوڭعى جىلدارى ول «سۇلۋلىق پەن قايىرىمدىلىقتىڭ ۇيلەسىمى!» دەگەن ۇرانمەن وتكىزىلىپ جۇرگەن ۇلكەن دۋمان. «قازاقستان ارۋى» بايقاۋىنىڭ جەڭىمپازدارى مەيىرىمدىلىكتى ءوز ەركىمەن اتقاراتىن ەلشى بولا وتىرىپ, سۇلۋلىق ءتاجىن ءىس-ارەكەتىمەن اقتاۋى ءتيىس. قىسقاسى ەلدە وتكىزىلەتىن قايىرىمدىلىق جوبالارىنا بەلسەنە اتسالىسىپ, ەلىمىزدىڭ بارلىق جاستارىنا ۇلگى بولماعى دا ءلازىم.
ايناش ەسالي
«ەگەمەن قازاقستان»
الماتى