اقتاۋدا «دارا» قايىرىمدىلىق قورىمەن ء«بارىمىز بىردەيمىز-كەمسىتۋدى بىلمەيمىز: قازاقستاندا ينكليۋزيۆتى قوعام قۇرۋ» جوباسىنىڭ اياسىندا «اقتاۋ پسيحولوگيالىق-پەداگوگيكالىق تۇزەۋ كابينەتى» كوممۋنالدىق مەملەكەتتىك مەكەمەسى اشىلدى. سالتاناتتى ءراسىم ماڭعىستاۋ وبلىسىنىڭ اكىمى ەرالى توعجانوۆ پەن «دارا» قايىرىمدىلىق قورىنىڭ قۇرىلتايشىسى گۇلنار دوساەۆانىڭ قاتىسۋىمەن ءوتتى.
«پرەزيدەنتىمىز نۇرسۇلتان ءابىش ۇلى نازارباەۆ «قازاقستاننىڭ الەۋمەتتىك جاڭعىرتىلۋى» باعدارلاماسىندا: «مەنىڭ نازارىمداعى باستى ماسەلە – ءار قازاقستاندىققا قامقورلىق كورسەتۋ» دەگەن بولاتىن. ولاي بولسا, بۇگىن «دارا» قايىرىمدىلىق قورىنىڭ قۇرىلتايشىسى, قازاقتىڭ قاراپايىم قىزى گۇلنار دوساەۆانىڭ قولداۋىمەن مۇمكىندىگى شەكتەۋلى بالالارعا ارنالعان پسيحولوگيالىق-پەداگوگيكالىق تۇزەتۋ مەكەمەسىنىڭ اشىلۋىنا وزدەرىڭىز كۋا بولىپ وتىرسىزدار. اتالعان مەكەمە بۇگىننىڭ وزىندە اقتاۋ قالاسىنداعى 270-كە جۋىق مۇمكىندىگى شەكتەۋلى بالانىڭ 35-ءىن قابىلداپ, ءوز جۇمىسىن باستاپ كەتتى», دەدى ماڭعىستاۋ وبلىسىنىڭ اكىمى ەرالى توعجانوۆ.
«اقتاۋ قالالىق پسيحولوگيالىق-پەداگوگيكالىق تۇزەۋ كابينەتىنىڭ ماقساتى – سويلەۋ, كورۋ, ەستۋ قابىلەتىندە, وقىپ-ۇيرەنۋ, قارىم-قاتىناس جاساۋ مەن دامۋىندا قانداي دا ءبىر قيىندىقتارى بار بالالار مەن جاسوسپىرىمدەرگە پسيحولوگيالىق-پەداگوگيكالىق جانە مەديتسينالىق كومەك كورسەتۋ. جەكە دامۋ باعدارلاماسىنا سايكەس دەفەكتولوگ, لوگوپەد, تيفلوپەداگوگ, ستاردوپەداگوگ, وليگوفرەنوپەداگوگ, پسيحولوگ, الەۋمەتتىك پەداگوگپەن جەكە جانە توپتىق جۇمىستار جۇرگىزىلەدى», دەدى «دارا» قورىنىڭ وكىلى گۇلنار دوساەۆا.
مالىمەتتەرگە سۇيەنسەك, قازىرگى تاڭدا ماڭعىستاۋ وبلىسى بويىنشا 4968 مۇمكىندىگى شەكتەۋلى تاربيەلەنۋشىلەر تىركەلگەن. ارنايى ءبىلىم بەرۋ ۇيىمدارىندا 49 ارنايى پەداگوگ, 23 لوگوپەد, 19 وليگوفرەنوپەداگوگ, 7 سۋردوپەداگوگ جۇمىس جاسايدى. «دارا» قايىرىمدىلىق قورى مۇمكىندىگى شەكتەۋلى بالالارعا ارنالعان مەكتەپ-ينتەرناتىنداعى كوزى كورمەيتىن بالالارعا ارنالعان برايل جۇيەسى بويىنشا جازۋ ماشينكاسىن تابىستادى.
«دارا» قايىرىمدىلىق قورىنىڭ قۇرىلتايشىسى گۇلنار دوساەۆا مەن ماڭعىستاۋ وبلىسىنىڭ اكىمى ەرالى توعجانوۆ قۇرىق پسيحولوگيالىق-پەداگوگيكالىق كابينەتىنىڭ جۇمىسىمەن تانىسىپ, مۇمكىندىگى شەكتەۋلى بالالارعا ارنالعان ويىن الاڭىنىڭ اشىلۋىنا قاتىستى. وڭىردە 2018 جىلدىڭ سوڭىنا دەيىن مۇمكىندىگى شەكتەۋلى بالالارعا ارنالعان مۇنايلى اۋدانىنان پەداگوگيكالىق-پسيحولوگيالىق جانە مەديتسينالىق كەڭەس (پمپك), تۇپقاراعان اۋدانى, اقشۇقىر اۋىلىنان پسيحولوگيالىق-پەداگوگيكالىق تۇزەتۋ كابينەتىن اشۋ باعىتىندا جۇمىستار جۇرگىزۋدە.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى