بۇل اپتا ىرگەمىزدەگى ەجەلگى كورشىمىز رەسەي ءۇشىن وڭاي باستالعان جوق. كەمەروۆوداعى قايعىلى وقيعا تالاي وتباسىنا قاسىرەت شەكتىرىپ قانا قويماي, قاۋىپسىزدىك ماسەلەسىندە ويلاناتىن تۇستار وتە كوپ ەكەندىگىن كورسەتىپ بەردى.
وسى جاعدايدىڭ لەگىمەن كەشە وتاندىق تانىمال ىسكەر ازامات نۇرلان سماعۇلوۆ ساۋدا ويىن-ساۋىق وتالىقتارىنىڭ يەلەرىن استانا جانە الماتى توتەنشە جاعدايلار دەپارتامەنتتەرىمەن مەموراندۋمعا قول قويۋعا شاقىردى.
جانە وسى باستاماعا وراي, MEGA Alma-Ata ساۋدا ويىن-ساۋىق ورتالىعىندا جوسپارلى ءورت-تاكتيكالىق وقۋ-جاتتىعۋ ءىس-شارالارى مەن ءورت قاۋىپسىزدىگى بويىنشا بريفينگ ءوتتى.
وقۋ-جاتتىعۋ شارالارىنىڭ ستسەناريى تومەندەگىدەي بولدى: شارتتى تۇردە كينوتەاتر اۋماعىنان ء«ورت» شىقتى. ءورت قاۋىپسىزدىك دابىل قاققىشتارى, سونىمەن قاتار ەۆاكۋاتسيانى باسقارۋ مەن حابارلاندىرۋ جۇيەلەرى ىسكە قوسىلادى. كەلۋشىلەرگە ساۋدا ويىن-ساۋىق ورتالىعى عيماراتىنان 46 شىعۋ ەسىگى ارقىلى سىرتقا شىعۋعا ارنايى نۇسقاۋدان وتكەن اكىمشىلىك قىزمەتكەرلەرى, كۇزەتشىلەر مەن جالعا الۋشىلار جانۇشىرا كومەكتەستى.
وعان قوسا MEGA Alma-Ata ساۋدا ويىن-ساۋىق ورتالىعىنىڭ ورتكە قارسى قىزمەتىنىڭ كۇشىمەن شارتتى تۇردەگى ءورت كوزىن جويۋ جۇمىستارى جەدەل ءجۇرىپ جاتتى. شىنايى ءورت كوزى تىركەلگەندەي, ءورت اۋدانى قانداي ەكەنىنە قاراماستان, 20-دان استام قالالىق ءورت ءسوندىرۋ كولىك قىزمەتى, ونىڭ ىشىندە 4 اۆتوباسپالداق ءبىر مەزەتتە جەتىپ كەلدى.
وسى ارادا MEGA ساۋدا جەلىلەرى – 3 ساۋدا ويىن-ساۋىق ورتالىعىنان, ياعني الماتىدا MEGA Alma-Ata جانە MEGA Park, سونداي-اق استاناداعى MEGA Silk Way-دەن تۇرادى. بارلىق ساۋدا ويىن-ساۋىق ورتالىعىنىڭ عيماراتتارى قر قۇرىلىس تالاپتارى مەن ەرەجەلەرىنە, سونىمەن قاتار №439 ء"ورت قاۋىپسىزدىگىنە بايلانىستى جالپى تالاپتارعا» سايكەس جوبالانعان, ءارى سولاي سالىنعان.
ء«بىز ساۋدا ويىن-ساۋىق ورتالىقتارىن جىلىنا ءبىر رەت تەكسەرۋ جەتكىلىكسىز دەپ ەسەپتەيمىز. سوندىقتان, الماتى جانە استانا قالالارىنىڭ توتەنشە جاعدايلار دەپارتامەنتىمەن ءبىزدىڭ ساۋدا ويىن-ساۋىق ورتالىقتارىن جوسپاردان تىس رەتتىك تەكسەرۋ شارالارى جونىندە مەموراندۋمعا قول قويعىمىز كەلەدى. كەز كەلگەن ۋاقىتتا كەلىپ, تەكسەرە بەرسىن. وعان قوسا مەن بارلىق ساۋدا ورتالىق يەلەرىن, الماتى مەن استانا قالالارى مەن وبلىس ورتالىعى مەنەدجەرلەرىن جوعارىداعى مەموراندۋمعا قوسىلۋعا شاقىرامىن. حالىقتىڭ بىزگە دەگەن سەنىمى ارتىپ, تج دەپارتامەنتى زاڭدى تۇردەگى شەكتەۋگە قاراماستان ارقاشان كەلىپ, قالاعان ۋاقىتىندا تەكسەرۋ شارالارىن ۇيىمداستىرا بەرسىن. ەرىكتى تۇردە وسى مەموراندۋمعا قويا وتىرىپ, وزگە دە ساۋدا ويىن-ساۋىق ورتالىقتارىن بىزگە قوسىلۋعا شاقىرامىز», – دەدى ASTANA GROUP كومپانياسىنىڭ باسشىسى نۇرلان سماعۇلوۆ.
ءوز كەزەگىندە MEGA – ورتكە قارسى ءوزىنىڭ جەكە ءبولىمى جانە ءتورت ءورت ءسوندىرۋ ماشيناسى بار قازاقستان اۋماعىنداعى جالعىز ساۋدا ويىن-ساۋىق ورتالىعى ەكەنى ءمالىم بولدى. MEGA جەلىسىندە ءورت قاۋىپسىزدىك بويىنشا 70 قىزمەتكەر جۇمىس ىستەيدى. ولار 4 اۋىسىم سايىن كەزەكشىلىككە ءتۇسىپ وتىرادى. ساۋدا ويىن-ساۋىق ورتالىق اۋماعىندا ءورت ءسوندىرۋ ءۇشىن ارنايى سۋ قويمالار مەن ءورت ءسوندىرۋ گيدرانتتارى بار. مىسالى, MEGA Alma-Ata رەزەرۆۋار كولەمى 1 800 م3 قۇرايدى. سۋ دەڭگەيى كۇندەلىكتى باقىلاۋدا. عيماراتتاردا ورتكە سۋ سەبەتىن تۇتىك قابىر, وقپان جانە ۇنتاقتى ءورت سوندىرگىشىمەن جابدىقتالعان ءورت ءسوندىرۋ كراندارى بار. ساۋدا ويىن-ساۋىق ورتالىقتىڭ ءار بۋتيگى ۇنتاقتى ءورت سوندىرگىشپەن جابدىقتالعان.
MEGA جەلىسىنىڭ ءار ساۋدا ويىن-ساۋىق ورتالىعى «شىعۋ» جانە «اپاتتىق شىعۋ» اتتى جارىق تابلوسىمەن, باعىتتالعان بەلگىلەرىمەن تابۋعا بولاتىن بىرنەشە نەگىزگى شىعۋ ەسىگىمەن, قوسىمشا شىعۋ ەسىكتەرىمەن جابدىقتالعان. جوعارى قاباتتاردان ادامداردى ەۆاكۋاتسيالاۋ ءۇشىن ءورت ساتىلارى قاراستىرىلعان. ولاردىڭ كولەمى ءورت قاۋىپسىزدىگى تالاپتارىنا سايكەس كەلەدى. MEGA Alma-Ata ساۋدا ويىن-ساۋىق ورتالىعىندا – 46 ەۆاكۋاتسيالىق شىعۋ ەسىگى, MEGA Park-تە – 11 ەۆاكۋاتسيالىق شىعۋ ەسىگى, MEGA Silk Way-دە – 20 ەۆاكۋاتسيالىق شىعۋ ەسىگى, وعان قوسا عيماراتتىڭ وزگە دە بولىكتەرىندە ورنالاسقان شىعۋ ەسىكتەرى (مىسالى, كينوتەاتر نەمەسە سۋپەرماركەت) بار. ەۆاكۋاتسيالىق شىعۋ ەسىكتەرى «انتيپانيكا», ياعني قاۋىپسىز ەۆاكۋاتسيانى قامتاماسىز ەتەتىن ق ۇلىپتارمەن جابدىقتالعان. توتەنشە جاعداي ورىن العان كەزدە بارلىق ەسىكتەر اۆتوماتتى تۇردە اشىلادى.
ساۋدا ويىن-ساۋىق ورتالىعىندا ءجيى ۇيىمداستىرىلاتىن ورتكە قارسى وقۋ-جاتتىعۋ ءىس-شارالارى كورسەتىپ وتىرعانداي, كەلۋشىلەردى ەۆاكۋاتسيالاۋ ۋاقىتى شامامەن 10 مينۋتتى قۇرادى.
ايناش ەسالي, «ەگەمەن قازاقستان»
الماتى