حالىقارالىق تەاتر كۇنىنە وراي الماتىداعى ۇلتتىق كىتاپحانادا م.اۋەزوۆ اتىنداعى ادەبيەت جانە ونەر ينستيتۋتى تەاتر جانە كينو ءبولىمى بيىل جارىققا شىعارعان بەس كىتابىنىڭ تۇساۋكەسەرى ءوتتى.
كىتاپتاردىڭ مازمۇنىمەن تانىستىرۋعا ارنالعان دوڭگەلەك ۇستەل باسىندا ونەرتانۋ عىلىمدارىنىڭ كانديداتى امانگەلدى مۇقان جاڭا جيناقتاردىڭ ەرەكشەلىگى مەن عىلىمي سالماعىنا توقتالدى. كىتاپتاردىڭ ءبارى دە ءبىلىم جانە عىلىم مينيسترلىگىنىڭ ارنايى بولگەن گرانتتارىنىڭ قارجىسىنا شاعىن باسپا تاباقپەن شىعارىلعان.
«يسكۋسستۆو كازاحوۆ ۆ اسپەكتە وبششەتيۋركسكيح كۋلتۋرنىح تراديتسي» اتتى ۇجىمدىق مونوگرافيادا قازاقتاردىڭ بەينەلەۋ ونەرى, مۋزىكا, تەاتر ونەرىندە كوركەم بەينەلەر مەن سيمۆولداردىڭ دارالىعى مەن امبەباپتىق ءداستۇر جالعاستىعى, كوركەمونەردەگى جالپىتۇركىلىك ورتاق الەمىنىڭ كوركەم كەلبەتى, بىرلىگى مەن وزىندىك ەرەكشەلىكتەرى ايقىندالادى. ا.مۇقاننىڭ جاۋاپتى رەداكتورلىعىمەن جارىق كورگەن «قازاق ساحناسىنىڭ شەبەرلەرى: شىعارماشىلىق پورترەتتەر» جيناعىندا قازاق مادەنيەتىنىڭ ماڭىزدى سالاسى تەاتر جانە كينو ونەرىندەگى تانىمال تۇلعالاردىڭ ونەرى جان-جاقتى زەردەلەنىپ, ولاردىڭ وتاندىق مادەنيەتتەگى الاتىن ورنى, وزىندىك سۋرەتكەرلىك ەرەكشەلىگى اشىپ كورسەتىلەدى. كورەرمەننىڭ كوڭىلىن جاۋلاعان تالانتتى اكتەرلەر مەن رەجيسسەرلەردىڭ شىعارماشىلىعىن دارىپتەپ, ۇرپاق جادىندا ساقتاۋعا ىقپال ەتۋ – كىتاپتىڭ باستى ماقساتى.
ال ء«ححى عاسىرداعى قازاق تەاترى: ءداستۇر جانە يننوۆاتسيا» اتتى كىتاپتا قازاقستان تەاترلارىنداعى جۇزەگە اسىپ جاتقان يننوۆاتسيالىق جوبالار, ساحنا ونەرىنىڭ بۇگىنگى كەلبەتىن اشاتىن ستيليستيكالىق دامۋ باعىت-باعدارى مەن ەرەكشەلىكتەرى, جەتىستىكتەرىن الەمدىك وركەنيەتكە جاناساتىن كوركەمدىك كەلبەتى قاراستىرالادى. قۇراستىرۋشى ا.مۇقاننىڭ ايتۋىنشا, ساحناداعى ءار سپەكتاكل – يننوۆاتسيا. رەجيسسەر مەن دراماتۋرگتىڭ ونەردە جاساعان جاڭاشىلدىعى, ەڭبەگى. تاۋەلسىز قازاقستاننىڭ تەاتر ساحنالارىندا سونى الەمدىك وزىق تاجىريبەنى ەنگىزگەن ساحنالىق قويىلىمدارى, كورەرمەننىڭ كوڭىلىنەن شىققان دراما, قۋىرشاق, وپەرا جانە بالەت ونەرىندەگى يننوۆاتسيالىق ىزدەنىستەر ساراپتالادى.
ونەرتانۋ كانديداتى انار ەركەبايدىڭ جەتەكشىلىگىمەن شىققان «مۇمكىندىگى شەكتەۋلى جاندار شىعارماشىلىعىنداعى ونەردىڭ ءرولى مەن ورنى» مونوگرافياسى قازاقستان ونەرىندەگى مۇمكىندىگى شەكتەۋلى ازاماتتاردىڭ شىعارماشىلىعىنا ارنالعان. مۇندا اۆتورلار اربادا وتىرىپ شىعارماشىلىقپەن اينالىسقان ازاماتتاردىڭ ونەرگە اكەلگەن جاڭالىقتارى, جەتىستىكتەرى, وزىندىك وزەكتى ماسەلەلەرىنە نازار اۋدارتادى. بەسىنشى جيناق – «قازاقستاننىڭ زاماناۋي تەاتر ۇدەرىسىندەگى فەستيۆالدىڭ حالىقارالىق بايلانىس رەتىندەگى ءرولى» اتتى عالىمدار ەڭبەگى قازاق تەاترىن شەتەلدەرگە تانىتاتىن, ساحنا ونەرىنىڭ دامۋىنا ەرەكشە ۇلەس قوساتىن حالىقارالىق, رەسپۋبليكالىق دەڭگەيدەگى تەاتر فەستيۆالدارىنىڭ تاريحى مەن قالىپتاسۋىن, باستى باعىتتارى مەن ىزدەنىس جولدارىن, باعدارى مەن تەاتر ونەرىن دامىتۋعا تيگىزەتىن اسەرىن ايقىنداۋعا ارنالعان.
دوڭگەلەك ۇستەلدەگى اڭگىمەگە بەلگىلى ونەر زەرتتەۋشىلەرى, تەاتر سىنشىلارى, جاس عالىمدار قاتىسىپ, جاڭا جيناقتار تۋرالى پايىمدارىن ءبىلدىردى.
ايگۇل احانبايقىزى, «ەگەمەن قازاقستان»
الماتى