بقو-دا تاسقىننىڭ الدىن الۋعا دايىندىق جۇرگىزىلۋدە

سوڭعى كۇندەرى اق جايىق وڭى­رىندە تابيعات توسىن مى­نەزىن كورسەتىپ تۇر: ناۋرىز ايىندا باتىس قازاقستان وبلىسىندا رەسپۋبليكالىق جا­نە جەرگىلىكتى ماڭىزى بار اۆتوجولدار بۇرقاسىنعا جانە كوكتايعاققا بايلانىس­تى بىرنەشە رەت جابىلدى.­ ءتىپ­تى ناۋرىزدىڭ 24-25-ءى كۇنى سوق­قان بوراننان قاز­تا­لوۆ اۋدا­نىنىڭ ەلدى مەكەن­دە­رىندە جول قاتىناسى كىدىرىپ, ورال قالاسىنان ارنايى ينجە­نەرلىك تەحنيكا كومەككە بارعان.

– سوڭعى بوراننان قاز­تالوۆ اۋدانىندا 12 ەلدى مە­كەننىڭ جولى جابىلىپ قال­دى. اۋدان باسشىلارى كومەك سۇراعان سوڭ قازتالوۆ جانە تاسقالا اۋدانىنا ارنايى تەحنيكالار جىبەردىك. ءدال قا­زىر تالدىقۇدىق پەن بو­لاشاق اۋىلىنان باسقا جەردە جول قاتىناسى قالپىنا كەلتىرىلدى, – دەيدى باتىس قازاق­­­ستان وبلىستىق توتەنشە جاع­دايلار دەپارتامەنتى باسشىسىنىڭ ورىنباسارى اقىلبەك احمەتجانوۆ.

ناۋرىزدىڭ 25-ءى كۇنى باتىس قازاقستان وبلىسىنىڭ اكى­مى التاي كولگىنوۆ بارلىق اۋدان جانە توتەنشە جاعداي قىزمەتى باسشىلارىمەن كوك­تەمگى سۋ تاسقىنىنىڭ الدىن الۋ بويىنشا قۇرىلعان شتاب ءماجىلىسىن وتكىزدى. ءوڭىر باس­شىسىنىڭ بۇيرىعىمەن 26 ناۋرىزدان باستاپ باتىس قازاقستان وبلىسىندا ازا­مات­تىق قورعانىس مەكەمە-ۇيىم­دارى ەڭ جوعارعى دايىن­دىق رەجىمىندە جۇمىس ىستەۋگە كوشتى. 

– كوپ جىلعى باقىلاۋ سا­راپ­تاماسىنا قاراعاندا كوك­تەمگى سۋ تاسقىنىنان زارداپ شەگۋى مۇمكىن ايماقتا وبلىس بويىنشا 36 ەلدى مەكەن ور­نالاسقان. بۇل جەرلەردە 9 مىڭ ءۇي بار, 36 مىڭ ادام تۇرادى. ال قالا ماڭىنداعى ساياجايلاردا, وزەندەر اڭعا­رىن­دا ورنالاسقان 75 باۋ-باق­شا سەرىكتەستىگىن 13 مىڭ ادام جىل بويى مەكەن ەتەدى. بۇ­لار­دىڭ 4 مىڭى – بالالار. ءبىز بيىلعى سۋ تاسقىنىن توسىن شىعىنسىز وتكىزۋگە بارلىق كۇش-جىگەرىمىزدى سالىپ جاتىرمىز, – دەيدى اقىل­بەك قوسمان ۇلى.

«قازگيدرومەت» رمك با­تىس قازاقستان وبلىستىق في­ليا­لىنىڭ ديرەكتورى نۇر­جان شياپتىڭ ايتۋىنشا, ءساۋىر ايىنان باستاپ اۋا تەمپەرا­تۋراسى تۇندە دە جىلىنا باس­تا­يدى. ءبىرىنشى ونكۇندىكتە جى­لىلىق +12 گرادۋسقا جەتسە, ەكىنشى ونكۇندىكتە +20 گرا­دۋسقا دەيىن كوتەرىلۋى مۇم­كىن. جەردەگى توڭنىڭ قالىڭدىعى وڭتۇستىك اۋدانداردا جۇقارىپ كەلەدى ەكەن. بىراق داريان اۋىلى تۇسىندا توڭ قاباتى 115-تەن 119 سانتيمەترگە قا­­لىڭداعانى باي­قالعان. جال­پى, وبلىستىڭ سول­تۇس­تىك وڭىرىندە, ورال قا­­لا­­سى ماڭىندا توڭ ءالى قا­لىڭ. «تاسقىن قاۋپى بار, تۇر­عىن­دارعا ءبىز ونى اشىق ايتىپ وتىر­مىز», دەيدى نۇرجان ايت­­­­ماعانبەت ۇلى.

اۋا رايىن بولجاۋشىلار جايىق وزەنىنىڭ مۇزى 8-13 ءساۋىر ارالىعىندا بۇزىلىپ, سەڭ جۇرەدى دەپ وتىر. باسقا دا شاعىن وزەندەردىڭ مۇزى, اسىرەسە سەڭ جينالىپ, سۋ ارناسى بىتەلىپ قالۋ قاۋپى بار تۇستاردىڭ مۇزى ارنايى ارامەن ءتىلىنىپ, كەپتەلىستىڭ الدىن الۋ جۇمىستارى جۇرگىزىلگەن. بىلتىر 50 مىڭ شارشى مەتر مۇز ايدىنى تىلىنسە, بيىل ونىڭ كولەمى 209 مىڭ شارشى مەترگە جەتكەن. «تابيعات اپاتىنىڭ الدىن الۋعا ادام كۇشى دە, تەحنيكا دا, قارجى دا جەتكىلىكتى» دەپ سەندىرەدى توتەنشەلىكتەر. لايىم سولاي بولسىن!

قازبەك قۇتتىمۇرات ۇلى, «ەگەمەن قازاقستان»

باتىس قازاقستان وبلىسى