پرەزيدەنت ءوزىنىڭ ۇندەۋىندە بەس باستاما بويىنشا ناقتى-ناقتى كورسەتكىشتەردى كورسەتە وتىرىپ, ورىن الىپ وتىرعان ماسەلەلەردى جويۋ باعىتىندا جۇمىس جۇرگىزۋ قاجەتتىگىن اتاپ ءوتتى.
يۋري كۋستادينچەۆ, «ۆوزروجدەنيە» بولگار ەتنو-مادەني قوعامىنىڭ توراعاسى, وبلىستىق ءماسليحات دەپۋتاتى:
استانانى گازداندىرۋ ماسەلەسى باياعىدان بەرى ايتىلىپ كەلە جاتىر. ەلباسى نۇرسۇلتان نازارباەۆ ۇسىنعان گازداندىرۋ جونىندەگى جاڭا باستاما دەر كەزىندە كوتەرىلدى. رەسپۋبليكاداعى ەكولوگيالىق جاعدايدى جاقسارتۋدىڭ ماڭىزى زور ەكەنى بەلگىلى. وسىعان بايلانىستى ەلدە «جاسىل» تەحنولوگيانى قولدانۋ قاجەت. ال استانانى گازداندىرۋ سارىارقانى كومىردىڭ تۇتىنىنەن تازارتىپ, اۋانى لاستانۋدان ساقتايدى.
بۇل جوبانىڭ قىمبات ءارى قيىن ەكەنىن ءتۇسىنۋ قاجەت. تاپسىرمانىڭ ورىندالۋ مەرزىمى ءبىر جارىم جىل دەپ بەكىتىلدى. بۇل مەرزىمدە قانشالىقتى ءۇمىت اقتالاتىنىن ۋاقىت كورسەتەدى. ەلباسى كوتەرگەن باستامانى ورىنداۋعا بىلەك سىبانا قۇلشىنىپ وتىرعاندار جەتەرلىك ەكەنىنە سەنىمدىمىن. سارىارقانى گازداندىرۋدىڭ اسەرى ەكولوگيانى جانە ەكونوميكانى ىلگەرىلەتۋگە ەلەۋلى ۇلەس قوسادى. وسى ورايدا, قارجى بولۋگە ەرەكشە كوڭىل ءبولىپ, ونى باقىلاۋدى كۇشەيتۋ كەرەك.
اتىراۋ وبلىسى
بايعابىل مايكوتوۆ, «پاۆلودار وبلىسىنىڭ اۋعان سوعىسى ارداگەرلەرى جانە مۇگەدەكتەرى» قب توراعاسى:
مەملەكەت باسشىسى نۇرسۇلتان نازارباەۆتىڭ بەس الەۋمەتتىك باستاماسى قازاقستاننىڭ دامىعان 30 ەلدىڭ قاتارىنا قوسىلۋىنا جاسالعان ءساتتى قادام دەپ ەسەپتەيمىن. ءبىز اۋعان سوعىسىنىڭ ارداگەرلەرى, ەلباسى باستامالارىن قازاقستان حالقىنىڭ جاعدايىن جاقسارتۋعا باعىتتالعان وڭدى شەشىم دەپ قابىلدادىق.
اتاپ ايتقاندا, وتانداستارىمىزعا نەسيەمەن ءۇي الۋ ايتارلىقتاي جەڭىلدەگەلى تۇر. ماسەلەن, 2017 جىلى پايدالانۋعا بەرىلگەن پاتەر سانى رەكوردتىق كورسەتكىشكە جەتكەن. ەندى مەملەكەت بۇل جەتىستىكتەرمەن شەكتەلمەي, قازاقستاندىق ءاربىر ازاماتتىڭ اقىلعا سىياتىن اقىعا ءۇيلى بولۋىنا مۇمكىندىك تۋىپ وتىر.
سونداي-اق سالىق جۇكتەمەسىن جەڭىلدەتۋ ارقىلى جالاقىسى تومەن ادامداردىڭ ەڭبەكاقىسىنىڭ كوتەرىلۋىنە اسەرىن تيگىزەدى. بۇل باستاما كۇنكورىسى تومەن وتباسىلارعا دەمەۋ بولارى انىق.
وقۋ گرانتتارىنىڭ قوسىمشا 20 مىڭعا كوبەيتىلۋى, ونىڭ 11 مىڭى تەحنيكالىق ماماندىقتار بويىنشا باكالاۆرلىق ءبىلىم بەرۋگە تيەسىلى بولۋى مەملەكەتكە قاجەتتى مامانداردىڭ تاپشىلىعىن جويۋعا سەبەپكەر بولادى. ونىڭ ۇستىنە مەملەكەت-جەكەمەنشىك ارىپتەستىگى نەگىزىندە ستۋدەنتتەر جاتاقحانالارىن سالۋ مىندەتى ناقتىلانعاندىعى كوڭىلىمىزدەن شىقتى.
كاسىپكەرلىكتى دامىتۋ ماقساتىندا شاعىن نەسيەلەردىڭ كولەمى 2 ەسەگە ارتادى, بۇل قامقورلىقتىڭ شاپاعاتى اۋىلدىق ەلدى مەكەندەرگە دە تيەرىنە كامىل سەنەمىن. ال گازداندىرۋدىڭ بىرەگەي جوباسى ەلىمىزدىڭ ورتالىق جانە سولتۇستىك وڭىرلەرىندەگى ميلليونداعان تۇتىنۋشىنىڭ تىرشىلىگىنە وڭ وزگەرىس اكەلەرى ءسوزسىز.
دەنيز جامالوۆا, قازاقستان دۇنگەندەرى جاستار قاناتىنىڭ توراعاسى:
ءبىرىنشى باستاما – باسپانا الۋدىڭ مۇمكىندىگىن كەڭەيتۋ. وسىعان بايلانىستى «7 – 20 – 25» تۇرعىن ءۇي يپوتەكالىق باعدارلاماسىنىڭ قولجەتىمدىلىگىن ارتتىرۋعا تاپسىرما بەرىلدى. پايىزدىق كورسەتكىش ەكى ەسەگە ازايىپ, العاشقى جارنا 20 پايىزعا دەيىن ءتۇسىپ, نەسيەلەۋ مەرزىمى 25 جىلعا ۇزارتىلدى. جاستارعا بۇل باستاما ۇناۋى ءتيىس دەپ ەسەپتەيمىن, ويتكەنى وسىنداي جاعدايدىڭ ارقاسىندا باسپانا الۋ ماسەلەسى جەڭىلدەيدى. ەلباسى ءوز سوزدەرىنىڭ بىرىندە جاستاردىڭ ومىرلىك مۇراتىنا قول جەتكىزۋ ءۇشىن مەملەكەت ساپالى بىلىممەن, جۇمىسپەن جانە باسپانامەن قامتاماسىز ەتە وتىرىپ, قولدان كەلگەننىڭ ءبارىن جاسايتىنىن مالىمدەگەن بولاتىن. سوندىقتان پرەزيدەنت ۇسىنعان جاڭا باستامانىڭ جاستارعا قانشالىقتى قاجەت ەكەنى ايتپاسا دا تۇسىنىكتى.
ەلباسى 2019 جىلعى 1 قاڭتاردان باستاپ سالىقتىق جۇكتەمەنى ون ەسەگە ازايتۋعا تاپسىرما بەردى. بۇل از جالاقى الاتىنداردىڭ ەڭبەكاقىسىن كوبەيتەدى.
سونىمەن قاتار جوعارى وقۋ ورىندارىنا قوسىمشا 20 مىڭ مەملەكەتتىك گرانت ءبولۋ جونىندە مىندەتتەمە جۇكتەدى. بۇل ءوز كەزەگىندە ەلدىڭ دامۋىنا ولشەۋسىز ۇلەس قوساتىن مامان يەلەرىن ازىرلەپ شىعۋعا مۇمكىندىك بەرەدى. ايتا كەتەرلىگى, 20 مىڭ گرانتتىڭ 11 مىڭى تەحنيكالىق سالالارعا بولىنەدى. مۇنىڭ سەبەبى – ءتورتىنشى ەكونوميكالىق رەۆوليۋتسيا. مەملەكەتتىڭ جاستارعا قولداۋىن 75 مىڭ ورىندىق جاتاقحانالار سالۋ جونىندەگى تاپسىرمادان دا بايقاۋعا بولادى. وسى ورايدا ەلباسىنا ءوز اتىمنان زور العىس ايتقىم كەلەدى.
تابىلدى ءامىروۆ, مۇنايلى اۋداندىق قوعامدىق كەڭەسىنىڭ توراعاسى:
بەس باستاما – بۇل قازىرگى كۇندە ەل ەكونوميكاسىنىڭ دامۋىنا, حالىقتىڭ الەۋمەتتىك جاعدايىن جاقسارتۋعا, ءبىلىمدى كادرلارمەن قامتاماسىز ەتۋگە باعىتتالعان جۇمىستاردى نۇسقاپ تۇرعان باعدار. بۇل باستامالاردىڭ قاي-قايسىسىن الىپ قاراساق تا قازىرگى ۋاقىتتاعى وتە وزەكتى ماسەلەلەردىڭ قاتارىنان.
بىرىنشىدەن – جاس وتباسىلاردىڭ تۇرعىن ۇيگە قول جەتكىزۋ مۇمكىندىكتەرىن ەسەلەي تۇسەدى, ەكىنشىدەن – تومەن جالاقى الاتىن ادامدارعا ايتارلىقتاي جەڭىلدىك جاسايدى, ءۇشىنشى باستاما – جاستاردىڭ ءبىلىم الۋىنا جاسالعان تاعى دا ءبىر يگى ءىس, ءتورتىنشى باعىتى – جاپپاي كاسىپكەرلىكتى دامىتۋعا باعىتتالسا, بەسىنشىدەن – ماڭعىستاۋ ءۇشىن باسىم باعىتقا يە بولماسا دا, قازاقستان اتتى ۇلان-عايىر ەلىمىزدىڭ وزگە وبلىستارى ءۇشىن دە, ەكولوگيا جاناشىرلارى ءۇشىن دە وتە جاقسى جاڭالىق.
پرەزيدەنت وسىلايشا حالىقتىڭ ءال-اۋقاتىن اتتىرۋدىڭ ناقتى تەتىگىن حالىقتىڭ كورسەتتى.
ماڭعىستاۋ وبلىسى