يۋنۋس ەمرە اتىنداعى تۇرىك مادەنيەت ورتالىعى استانانىڭ 20 جىلدىق مەرەيتويىنا سىيلىق جاساماق. «تۇرىك فيلمدەرىنىڭ اي سايىنعى كورسەتىلىمى» شاراسى اياسىندا ەلوردا كورەرمەندەرىنىڭ نازارىنا ۇزدىك تۇرىك فيلمدەرى ۇسىنىلادى, دەپ حابارلايدى استانا اكىمدىگىنىڭ رەسمي سايتى.
ەكى باۋىرلاس ەل اراسىنداعى مادەني بايلانىستى نىعايتۋ ماقساتىندا يۋنۋس ەمرە اتىنداعى تۇرىك مادەنيەت ورتالىعى تۇركيانىڭ قازاقستانداعى ەلشىلىگىنىڭ قولداۋىمەن استانانىڭ 20 جىلدىعىنا وراي ەلوردا كورەرمەندەرىنىڭ نازارىنا ۇزدىك تۇرىك كينو تۋىندىلارىن ۇسىنباق.
2018 جىلى استانالىق كورەرمەننىڭ كوزايىمىنا اينالعان «120», «كوبەلەكتىڭ ءتۇسى», «سوڭعى حات» سياقتى فيلمدەرمەن قوسا, جاڭا كينوتۋىندىلار دا كورسەتىلەتىن بولادى. سولاردىڭ ءبىرى – تانىمال تۇرىك جازۋشىسى سايت فايك اباسيانىكتىڭ «كۇنكورىس قايىعى» اتتى رومانىنىڭ جەلىسىمەن تۇسىرىلگەن «ەكەۋمىزگە ءبىر الەم» ءفيلمى.
بۇل تۋىندىنى استانالىقتار 31 ناۋرىزدا تەگىن تاماشالاي الادى.
«وقيعا ءالي رىزا ەفەندي, ونىڭ شاشتاراز قىزى – مەلەك, ونىڭ وگەي ۇلى – حيكمەت جانە شاشتاراز كير ءدميتريدىڭ ءومىرى تۋرالى باياندايدى. مەلەك حيكمەتتى تۋعان اعاسىنداي جاقسى كورسە, حيكمەتتىڭ وعان دەگەن سەزىمى وزگەشە. مەلەكتىڭ ءومىرى بۋرگازاداعا فاحري كەلگەن سوڭ تۇبەگەيلى وزگەرەدى», - دەلىنگەن ءفيلمىنىڭ اڭداتپاسىندا.
تۋىندىنى «اتادەنيزفيلم» كومپانياسى بۋرگازادا ارالىندا 2016 جىلى تۇسىرگەن بولاتىن. باستى رولدەردى ەركان مەريچ پەن ياگمۋر ايدان سومدايدى.
سافا ءوڭال مەن سايت فايك اباسيانىكتىڭ ستسەناريىمەن تۇسىرىلگەن «ەكەۋمىزگە ءبىر الەم» ءفيلمى 31 ناۋرىزدا ساعات 17:00-دە «كەرۋەن» ساۋدا ورتالىعىنداعى كينوپاركتە كورسەتىلەتىن بولادى.